କାଲି ଭଙ୍ଗାଯିବ ବୈକୁଣ୍ଠ ଧାମ ଆଶ୍ରମ

ଭୁବନେଶ୍ୱର : କାଲି ଭଙ୍ଗାଯିବ ବୈକୁଣ୍ଠ ଧାମ ଆଶ୍ରମ  ।  ଏଥିପାଇଁ ଆସନ୍ତାକାଲି ଦିନ ୧୨ଟା ସୁଦ୍ଧା ଖଣ୍ଡଗିରି ସ୍ଥିତ ବୈକୁଣ୍ଠଧାମ ଆଶ୍ରମ ଖାଲି କରିବାକୁ ବିଡିଏ ପକ୍ଷରୁ ଡାକବାଜି ଯନ୍ତ୍ର ଯୋଗେ ପ୍ରଚାର କରାଯାଇଛି । ଆଶ୍ରମ ଖାଲି କରାଯିବା ପରେ ଏହାକୁ ଭଙ୍ଗାଯିବ । ପୂର୍ବରୁ ଭୁବନେଶ୍ବର ଖଣ୍ଡଗିରି ସ୍ଥିତ ବୈକୁଣ୍ଠଧାମ ଆଶ୍ରମ ଉପରେ ଜାରି ପାଇଁ ଅନ୍ତରୀଣ ସୁରକ୍ଷା ଆଦେଶକୁ ଉଠାଇଦେଇଥିଲେ ହାଇକୋର୍ଟ ।

ଏହି ବିବାଦୀୟ ଆଶ୍ରମ ସରକାରୀ ଜାଗାରେ ଗଢ଼ି ଉଠିଥିବା ଅଭିଯୋଗ ହୋଇଥିଲା ।  ନଭେମ୍ବର ମାସରେ ସାମ୍ନାକୁ ଆସିଥିଲା ଖଣ୍ଡଗିରିସ୍ଥିତ ବୈକୁଣ୍ଠ ଧାମ ଆଶ୍ରମ ବିବାଦ  । ପ୍ରଥମେ ନାବାଳକଙ୍କୁ କଳକୀ ଅବତାର ସଜାଇ ଧର୍ମ ନାଁରେ ଚାଲିଥିଲା ବେପାର। ପ୍ରବଚନ ପାଇଁ ଜମୁଥିଲା ତଥାକଥିତ ବାବାଙ୍କ ଦରବାର । ଆଶ୍ରମକୁ ବିଦେଶୀ ଭକ୍ତଙ୍କ ଅବାଧ ଯିବାଆସିବା ରହିଥିବା ବେଳେ ସ୍ଥାନୀୟ ବାସିନ୍ଦାଙ୍କ ପାଇଁ ଗେଟ ଖୋଲୁନଥିଲା । ବୈକୁଣ୍ଠ ଧାମର ଏକ ଘରେ ରହୁଥିଲେ ବିଦେଶୀ ଭକ୍ତ ।

ବାହାରୁ ଆସୁଥିବା ବିଦେଶୀ ଭକ୍ତଙ୍କ ରହିବା ପାଇଁ ସେଠାରେ କରାଯାଇଥିଲା ସ୍ଵତନ୍ତ୍ର ବ୍ୟବସ୍ଥା । ଯାଜପୁର, କେନ୍ଦୁଝର, ବଡ଼ବିଲ, ଯୋଡ଼ା, ରାଉରକେଲା, ବୋଲଗଡ଼ ଆଦି ବିଭିନ୍ନ ସ୍ଥାନ ପ୍ରବଚନ ଦେଉଥିଲେ ପାଣ୍ଡବ ପରିଡା  l ଅଭିଯୋଗ ପରେ ଖୋଲତାଡ ଆରମ୍ଭ ହୋଇଥିଲା । ଆଶ୍ରମ ଜମିର ଖୋଳତାଡ଼ ପରେ ଏହା ସରକାରୀ ଜମିରେ ନିର୍ମାଣ ହୋଇଥିବା ସ୍ପଷ୍ଟ ହୋଇଥିଲା । ସାଧାରଣ ପ୍ରଶାସନ ବିଭାଗର ମାପଚୁପ ପରେ ୧୪୦ ଡିସିମିଲ୍ ସରକାରୀ ଜମିରେ ଆଶ୍ରମ ନିର୍ମାଣ ହୋଇଥିବା ଜଣାପଡ଼ିଥିଲା  ।