ଡାକ୍ତରରୁ କେନ୍ଦ୍ରମନ୍ତ୍ରୀ: ଜାଣନ୍ତୁ ଦେବେନ୍ଦ୍ରଙ୍କ କ୍ୟାରିୟର

ଭୁବନେଶ୍ୱର: ଓଡ଼ିଶାରେ ବିଜେପିକୁ ମଜଭୁତ କରିବାରେ ଏକ ପ୍ରମୁଖ ଭୂମିକା ନେଇଥିବା ପୂର୍ବତନ କେନ୍ଦ୍ରମନ୍ତ୍ରୀ ଦେବେନ୍ଦ୍ର ପ୍ରଧାନଙ୍କ ପରଲୋକ ହୋଇଯାଇଛି | ଜଣେ ଡାକ୍ତର ଭାବେ ନିଜ କ୍ୟାରିୟର ଆରମ୍ଭ କରିଥିବା ଦେବେନ୍ଦ୍ର ପ୍ରଧାନଙ୍କ ମିଶିଥିବା ବ୍ୟକ୍ତିମାନଙ୍କ କହିବା କଥା ଯେ ଶାନ୍ତ, ସରଳ ଓ ମିଷ୍ଟଭାଷୀ ଚରିତ୍ରର ମଣିଷ ଜଣକ ଆଜି ସମସ୍ତଙ୍କୁ ପର କରି ଚାଲିଯାଇଛନ୍ତି | ରାଜନୀତିକୁ ଆସିବା ପୂର୍ବରୁ ପେସାରେ ଡାକ୍ତର ଥିବା ଦେବେନ୍ଦ୍ର ଏସ୍ସିବି ମେଡିକାଲ କଲେଜରୁ ଏମବିବିଏସ ପାସ କରିବା ପରେ ତାଳଚେର ଡେ଼ରାରେ ମେଡିକାଲ ଅଫିସର ଭାବେ ଚାକିରୀ ଜୀବନ ଆରମ୍ଭ କରିଥିଲେ |୧୯୭୩ ମସିହାରେ ଚାକିରୀରୁ ସ୍ବେଛାକୃତ ଅବସର ନେଇ ୧୯୮୦ ମସିହାରେ ରାଜନୀତିରେ ପାଦ ଥାପିଥିଲେ | ବିଜେପିରେ ଯୋଗ ଦେବା ସହ ଦଳକୁ କିଭଳି ମଜଭୁତ କରିହେବ ସେଥିପାଇଁ ପ୍ରୟାସ ଆରମ୍ଭ କରିଥିଲେ | ୧୯୮୩ରୁ ୧୯୮୫ ଓ ୧୯୮୫ରୁ ୧୯୮୮ ପର୍ଯ୍ୟନ୍ତ ଅବିଭକ୍ତ ଢେଙ୍କାନାଳ ଜିଲ୍ଲା ବିଜେପି ସଭାପତି ଦାୟିତ୍ଵ ତୁଲାନ୍ତି । ୧୯୮୮ରେ ହୁଅନ୍ତି ରାଜ୍ୟ ବିଜେପି ସଭାପତି । ୧୯୯୦ରେ ପୁଣି ରାଜ୍ୟ ସଭାପତି ଭାବେ ପୁନଃ ନିର୍ବାଚିତ ହୁଅନ୍ତି ।ତା ପରେ ୧୯୯୫ରୁ ୧୯୯୭ ଯାଏଁ ପୁନଃଶ୍ଚ ମିଳେ ରାଜ୍ୟ ବିଜେପି ସଭାପତି ପଦ । ୧୯୯୮ରେ ଦେବଗଡ଼ ଲୋକସଭା ଆସନରୁ ନିର୍ବାଚିତ ହେବା ସହ ବାଜପେୟୀଙ୍କ ସରକାରରେ କେନ୍ଦ୍ର ରାଷ୍ଟ୍ର ପରିବହନ ମନ୍ତ୍ରୀ ହୋଇଥିଲେ | ଏହାପରେ ପୁଣିଥରେ ୧୯୯୯ ମସିହାରେ ଲୋକସଭାକୁ ନିର୍ବାଚିତ ହୋଇଥିଲେ | ଓଡ଼ିଶାରେ ବିଜେପିକୁ କିଭଳି ଲୋକଙ୍କ ପାଖରେ ପହଞ୍ଚାଇହେବ ସେଥିପାଇଁ ଗାଁରୁ ଗାଁ ବୁଲିଥିଲେ |