ପ୍ରଖ୍ୟାତ ସାହିତ୍ୟିକ ବିନୋଦ କୁମାର ଶୁକ୍ଳା ପାଇବେ ୫୯ତମ ଜ୍ଞାନପୀଠ ପୁରସ୍କାର
ନୂଆଦିଲ୍ଲୀ: ପ୍ରଖ୍ୟାତ ହିନ୍ଦୀ ଲେଖକ ବିନୋଦ କୁମାର ଶୁକ୍ଳାଙ୍କୁ ଭାରତର ସର୍ବୋଚ୍ଚ ସାହିତ୍ୟ ସମ୍ମାନ ୫୯ତମ ଜ୍ଞାନପୀଠ ପୁରସ୍କାର ପାଇଁ ମନୋନୀତ କରାଯାଇଛି। କବିତା, କ୍ଷୁଦ୍ରଗଳ୍ପ ଓ ପ୍ରବନ୍ଧ ପାଇଁ ପ୍ରସିଦ୍ଧ ୮୮ ବର୍ଷୀୟ ଲେଖକ ଶୁକ୍ଳା ଛତିଶଗଡ଼ର ପ୍ରଥମ ସାହିତ୍ୟିକ ଭାବେ ଏହି ସମ୍ମାନ ପାଇବେ। ଏହି ସମ୍ମାନ ପାଇବା ପରେ ଶୁକ୍ଳା ଜ୍ଞାନପୀଠରେ ସମ୍ମାନିତ ହୋଇଥିବା ୧୨ ଜଣ ବିଶିଷ୍ଟ ହିନ୍ଦୀ ଲେଖକଙ୍କ ମଧ୍ୟରେ ସାମିଲ ଦେବେ।
ଶୁକ୍ଳାଙ୍କୁ ଜଣେ ଶ୍ରେଷ୍ଠ ସମସାମୟିକ ହିନ୍ଦୀ ଲେଖକ ଭାବରେ ବିବେଚନା କରାଯାଏ, ଯାହାଙ୍କ ଲେଖାରେ ଗଭୀର ଭାବନାତ୍ମକ ଆବେଦନ ଦେଖିବାକୁ ମିଳେ। ୧୯୯୯ ମସିହାରେ ସେ ତାଙ୍କ ଉପନ୍ୟାସ ‘ଦିୱାର ମେଁ ଏକ ଖିଡ୍କୀ ରହତୀ ଥି’ ପାଇଁ ସାହିତ୍ୟ ଏକାଡେମି ପୁରସ୍କାର ପାଇଥିଲେ। ନିର୍ଦ୍ଦେଶକ ମଣି କୌଲଙ୍କ ଦ୍ୱାରା ଏକ ଚଳଚ୍ଚିତ୍ରରେ ରୂପାନ୍ତରିତ ହୋଇଥିବା ‘ନୌକର କୀ କମିଜ୍’ (୧୯୭୯) ଓ କବିତା ସଂକଳନ ‘ସବ୍ କୁଛ ହୋନା ବଚା ରହେଗା’ (୧୯୯୨) ତାଙ୍କ ଉଲ୍ଲେଖନୀୟ କୃତି ମଧ୍ୟରେ ଅନ୍ତର୍ଭୁକ୍ତ। ଓଡ଼ିଶାର ବିଶିଷ୍ଟ କଥାକାର ତଥା ଜ୍ଞାନପୀଠ ପୁରସ୍କାରପ୍ରାପ୍ତ ପ୍ରତିଭା ରାୟଙ୍କ ଅଧ୍ୟକ୍ଷତାରେ ଗଠିତ ଜ୍ଞାନପୀଠ ଚୟନ କମିଟି ଶୁକ୍ଳାଙ୍କୁ ସମ୍ମାନିତ କରିବାକୁ ନିଷ୍ପତ୍ତି ନେଇଛି। ବିନୋଦ କୁମାର ଶୁକ୍ଳା ଛତିଶଗଡ଼ ରାଜ୍ୟର ପ୍ରଥମ ଲେଖକ ଭାବେ ଏହି ପୁରସ୍କାରରେ ସମ୍ମାନିତ ହେବେ। ହିନ୍ଦୀ ସାହିତ୍ୟ, ସୃଜନଶୀଳତା ଓ ସ୍ବତନ୍ତ୍ର ଲେଖା ଶୈଳୀ ପାଇଁ ତାଙ୍କୁ ଏହି ସମ୍ମାନ ପ୍ରଦାନ କରାଯାଉଛି।
ଚୟନ କମିଟି ବୈଠକରେ ମାଧବ କୌଶିକ, ଦାମୋଦର ମୌଜୋ, ପ୍ରଭା ବର୍ମା, ଅନାମିକା, ଏ କ୍ରିଷ୍ଣା ରାଓ, ପ୍ରଫୁଲ୍ଲ ଶିଲେଦାର, ଜାନକୀ ପ୍ରସାଦ ଶର୍ମା ଓ ଜ୍ଞାନପୀଠ ନିର୍ଦ୍ଦେଶକ ମଧୁସୂଦନ ଆନନ୍ଦ ପ୍ରମୁଖ ଉପସ୍ଥିତ ଥିଲେ। ଜ୍ଞାନପୀଠ ପୁରସ୍କାର ୧୯୬୧ ମସିହାରେ ସ୍ଥାପିତ ହୋଇଥିଲା ଏବଂ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପ୍ରତିବର୍ଷ ଭାରତୀୟ ଲେଖକମାନଙ୍କୁ ଏହା ପ୍ରଦାନ କରାଯାଏ। ଏଥିରେ ନଗଦ ୧୧ ଲକ୍ଷ ଟଙ୍କା, ଦେବୀ ସରସ୍ୱତୀଙ୍କ କାଂସ୍ୟ ପ୍ରତିମୂର୍ତ୍ତି ଓ ପ୍ରଶଂସାପତ୍ର ରହିଛି।