ବିହାରରେ ଲାଗୁ ହେବ ରାତ୍ରିକାଳୀନ କର୍ଫ୍ୟୁ, ବିବାହ କାର୍ଯ୍ୟକ୍ରମରେ ଯୋଗ ଦେବେ ସର୍ବାଧିକ ୫୦ ଜଣ

ଦିନକୁ ଦିନ ଦେଶରେ ଓମିକ୍ରନ ମାମଲା ବଢୁଥିବାବେଳେ ବିହାର ସରକାର ଆଜି ନୂତନ ମାର୍ଗଦର୍ଶିକା ଜାରି କରିଛନ୍ତି | ନୂତନ ନିର୍ଦ୍ଦେଶନାମା ମୁତାବକ ଜାନୁଆରୀ ୬ ରୁ ୨୧ ପର୍ଯ୍ୟନ୍ତ ବିହାରରେ ରାତ୍ରିକାଳୀନ କର୍ଫ୍ୟୁ ଲାଗୁ ହେବ | ଏହା ରାତି ୧୦ଟାରୁ ସକାଳ ୫ଟା ପର୍ଯ୍ୟନ୍ତ କାର୍ଯ୍ୟକାରୀ ହେବ | ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ବିଦ୍ୟାଳୟ ଏବଂ କୋଚିଂ ବନ୍ଦ ରହିବ | ସେହିପରି ନବମ ଏବଂ ତଦୁର୍ଦ୍ଧ ଶ୍ରେଣୀର ବିଦ୍ୟାଳୟ, କୋଚିଂ ଏବଂ ଶିକ୍ଷାନୁଷ୍ଠାନଗୁଡିକ ୫୦ ପ୍ରତିଶତ ଉପସ୍ଥାନ ସହିତ ଖୋଲିବାକୁ ଅନୁମତି ଦିଆଯାଇଛି |

ମଙ୍ଗଳବାର ସନ୍ଧ୍ୟାରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଅଧ୍ୟକ୍ଷତାରେ ବିପର୍ଯ୍ୟୟ ପରିଚାଳନା ଗୋଷ୍ଠୀର ବୈଠକରେ ଏହି ନିଷ୍ପତ୍ତି ନିଆଯାଇଛି। କରୋନା ମାମଲା ହଠାତ୍ ବୃଦ୍ଧି ପାଉଥିବାରୁ ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଅନେକ ପ୍ରତିବନ୍ଧକ ଲଗାଇଛନ୍ତି, ଯାହାଦ୍ୱାରା ସଂକ୍ରମଣର ବନ୍ଦ ହୋଇପାରିବ | ନୂତନ ନିର୍ଦ୍ଦେଶନାମା ମୁତାବକ ବିବାହ ଉତ୍ସବରେ ସର୍ବାଧିକ ୫୦ ଜଣଙ୍କୁ ଯୋଗ ଦେବାକୁ ଅନୁମତି ଦିଆଯିବ | ତେବେ ଡିଜେ ଏବଂ ଶୋଭାଯାତ୍ରାକୁ ଅନୁମତି ଦିଆଯିବ ନାହିଁ |