ପଇଡ ବୋଝେଇ ଟ୍ରକରେ ଗଞ୍ଜେଇ ଚାଲାଣ, ୪୫୦ କେଜିର ସବୁଜ ଜହର ଜବତ
ଲମତାପୁଟ,୨୨/୦୫: ପୁଣି ଅଭିନବ ଉପାୟରେ ପଇଡ ବୋଝେଇ ଟ୍ରକରେ ଗଞ୍ଜେଇ ଚୋରା ଚାଲାଣ । କୋରାପୁଟ ଜିଲ୍ଲା ପଡୁଆ ଅଞ୍ଚଳରୁ ଉତରପ୍ରଦେଶ ଚାଲାଣ ବେଳେ ନନ୍ଦପୁର ପୋଲିସ ହାତରେ ଧରା ପଡିଛି ବିପୁଳ ଗଞ୍ଜେଇ ।
ବିଶେଷ ସୂତ୍ରରୁ ଖବର ପାଇ କୋରାପୁଟ ଏସପିଙ୍କ ନିର୍ଦ୍ଦେଶକ୍ରମେ ନନ୍ଦପୁର ଏସ.ଡ଼ି.ପିଓଙ୍କ ନେତୃତ୍ଵରେ ନନ୍ଦପୁର ବ୍ଲକ କାର୍ଯ୍ୟାଳୟ ନିକଟରେ ନନ୍ଦପୁର ଥାନା ଅଧିକାରୀ ନାକାବନ୍ଦୀ କରି ଗାଡି ଯାଞ୍ଚ କରୁଥିଲେ । ଏହି ସମୟରେ ହିକିମପୁଟ ଅଞ୍ଚଳରୁ ଦ୍ରୁତ ଗତିରେ ଆସୁଥିବା ଟ୍ରକକୁ ଅଟକାଇଥିଲା ପୋଲିସ । କିନ୍ତୁ ଟ୍ରକରେ ପଇଡ ବୋଝେଇ ଥିବାରୁ ପୋଲିସ ଦେଖି ପ୍ରଥମେ ଗାଡିକୁ ଛାଡିଦେଉଥିଲା । କିନ୍ତୁ ଗାଡି ନମ୍ବର ମେଳ ଖାଉଥିବାରୁ ଟ୍ରକରେ ଥିବା ୩ ଜଣ ମଫିଆଙ୍କୁ କାବୁ କରିଥିଲା ପୋଲିସ ।
ପଇଡ ଗୁଡିକ ବାହାର କରି ଟ୍ରକକୁ ଯାଞ୍ଚ କରିବା ବେଳେ ବିପୁଳ ପରିମାଣର ଗଞ୍ଜେଇ ଥିବା ଜଣାପଡିଥିଲା । ଗଞ୍ଜେଇ ଚାଲାଣ ବେଳେ ବ୍ୟବହୃତ ହୋଇଥିବା ଟ୍ରକକୁ ଜବତ କରିଛି ପୋଲିସ । ଏଥିରେ ୨୨ଟି ବସ୍ତାରେ ପ୍ରାୟ ୪କୁଇଣ୍ଟା୫୦ କେଜି ଗଞ୍ଜେଇଥିଲା । ଏହାର ମୂଲ୍ୟ ପ୍ରାୟ ୪୫ ଲକ୍ଷ ଟଙ୍କାର ହେବ ବୋଲି ପୋଲିସ ସୂଚନା ଦେଇଛି । ଗିରଫ ଗଞ୍ଜେଇ ମଫିଆମାନେ ହେଲେ ଉତର ପ୍ରଦେଶ ଆଞ୍ଚଳର ବିପେନ୍ଦ୍ର ସିଂ, ନିତୀଶ ସିଂ ଏବଂ ବିହାର ଅଞ୍ଚଳର ରାଜୁ କୁମାର । ଗଞ୍ଜେଇ ମାଫିଆମାନେ ଏହି ଅଞ୍ଚଳରୁ ବହୁ ବାର ଗଞ୍ଜେଇ ନେଇଥିବା ପୋଲିସ ଆଗରେ ସ୍ଵୀକାର କରିଥିବା ବେଳେ ଏଥିରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି ପୋଲିସକୁ କହିଥିବା ସୂଚନା ମିଳିଛି ।