ମହାଭାରତକୁ କାହିଁକି ଘରେ ପାଠ କରାଯାଏ ନାହିଁ ?

ହିନ୍ଦୁ ଶାସ୍ତ୍ରରେ ମହାଭାରତର ମହତ୍ୱ ଅତ୍ୟନ୍ତ ପବିତ୍ର । ବିଶ୍ୱାସ ରହିଛି ଯେ ଏହି ଗ୍ରନ୍ଥରେ ଥିବା ଶିକ୍ଷା ଅନ୍ୟ କୌଣସି ସ୍ଥାନରେ ବି ମିଳିବା କଷ୍ଟକର ।  ଧର୍ମ, ନୀତି, ସମ୍ମାନ, ବିବେକ ଏବଂ ଗୁଣର ଶିକ୍ଷା ଦେଉଥିବା ଏହି ଗ୍ରନ୍ଥର ମାନ୍ୟତା ରହିଛି ଯେ, ଏହାକୁ ଘରେ ରଖାଯିବା ଉଚିତ୍ ନୁହେଁ । ମହାଭାରତକୁ ପଞ୍ଚମ ବେଦ ଭାବରେ ମଧ୍ୟ ବିବେଚନା କରାଯାଏ। କୁହାଯାଏ ଯେ ମହାଭାରତ ସହିତ ଜଡିତ କୌଣସି ଜିନିଷକୁ ଘରେ ରଖିବା ଅତ୍ୟନ୍ତ ଦୁର୍ଭାଗ୍ୟଜନକ । ହିନ୍ଦୁ ଧର୍ମର ଲୋକମାନେ ରାମାୟଣ, ଗୀତା ଇତ୍ୟାଦି ଗ୍ରନ୍ଥଗୁଡ଼ିକୁ ଘରେ ରଖନ୍ତି ଏବଂ ଏହାକୁ ପଢିବା ଶୁଭ ବୋଲି ମଧ୍ୟ ବିବେଚନା କରାଯାଏ । ଅନ୍ୟପକ୍ଷରେ, ମହାଭାରତର ପାଠ ବିଷୟରେ ଏକ ବିଶ୍ୱାସ ଅଛି ଯେ, ଘରେ ମହାଭାରତ ପାଠ କରିବା ଦ୍ୱାରା ଘରେ ଝଗଡା ହୁଏ ଏବଂ ପାରିବାରିକ ଅସନ୍ତୋଷ ଦେଖା ଦିଏ ।

ମହାଭାରତର ପାଠ ଘରେ ନୁହେଁ ବରଂ କୌଣସି ମନ୍ଦିରରେ କିମ୍ବା ଖାଲି ସ୍ଥାନରେ କରାଯାଏ । କେବଳ ସେତିକି ନୁହେଁ ବିଶ୍ୱାସ କରାଯାଏ ଯେ ଆପଣ ଯେଉଁଠାରେ ବି ମହାଭାରତ ପାଠ କରିବେ, ଏହାକୁ ସମ୍ପୂର୍ଣ୍ଣ ପାଠ କରିବେ ନାହିଁ, ଗୋଟିଏ ପୃଷ୍ଠାକୁ ଛାଡି ଦେବେ । ଏମିତି କରିବାର କାରଣ ହେଉଛି କିଛି ପ୍ରସଙ୍ଗ ଯେପରିକି ରାମାୟଣରେ ଜଣେ ଭାଇ ଅନ୍ୟ ଭାଇ ପାଇଁ ସିଂହାସନ ଛାଡିଛନ୍ତି । ମହାଭାରତରେ, ସିଂହାସନ ପାଇଁ ଜଣେ ଭାଇ ଅନ୍ୟ ଭାଇର ଶତ୍ରୁ ହୋଇ ଭାଇ ଭାଇର ଜୀବନ ନେବାକୁ ଚେଷ୍ଟା କରିଛି । ବିଶ୍ୱାସ କରାଯାଏ ଯେ ରାମାୟଣ ଜୀବନରେ କ’ଣ ଶୁଭ ଅଟେ ତାହା ଦର୍ଶାଇ ଥିବା ବେଳେ ମହାଭାରତରେ କ’ଣ କରିବା ଉଚିତ୍ ନୁହେଁ ତାହା ବ୍ୟାଖ୍ୟା ହୋଇଛି । ତେଣୁ ମହାଭାରତକୁ ସମ୍ପୂର୍ଣ୍ଣ ପାଠ କରିବା ପରିବର୍ତ୍ତେ ଗୋଟିଏ ପୃଷ୍ଠା ଛାଡ଼ି ଦେବା ଉଚିତ୍ । ପୌରାଣିକ ମାନ୍ୟତାର ପ୍ରତିବାଦରେ, ସମାଲୋଚନା କରାଯାଏ ଦୁଇଟି ଯାକ ଗ୍ରନ୍ଥରେ ତ ଯୁଦ୍ଧ ରହିଛି ତେବେ ଏହା କିଭଳି ଶୁଭ ଓ ଅଶୁଭ ଭାବେ ବିବେଚନା କରାଯାଇଛି । ତେଣୁ ଉଭୟ ରାମାୟଣ ଏବଂ ମହାଭାରତରେ ଯୁଦ୍ଧକୁ ବ୍ୟାଖ୍ୟା କରାଯାଇଛି କିନ୍ତୁ ରାମାୟଣ ଏବଂ ମହାଭାରତ ଯୁଦ୍ଧ ମଧ୍ୟରେ ବହୁତ ପାର୍ଥକ୍ୟ ରହିଛି । ରାମାୟଣରେ ସତ୍ୟର ସହିତ ଯୁଦ୍ଧ ହୋଇଥିଲା ଏବଂ ମହାଭାରତରେ ଛଳର ସହ ଯୁଦ୍ଧ ହୋଇଥିଲା । ରାମାୟଣ ଯୁଦ୍ଧରେ ପ୍ରଭୁ ଶ୍ରୀରାମ ଅସୁର ବିରୁଦ୍ଧରେ ମଇଦାନକୁ ଓହ୍ଲାଇ ଥିଲେ ଏବଂ ମହାଭାରତ ଯୁଦ୍ଧରେ ଜଣେ ଭାଇ ସିଂହାସନର ଲୋଭ ପାଇଁ ଅନ୍ୟ ଭାଇ ବିରୁଦ୍ଧରେ ଲଢିଥିଲା । ଏହି ବିଶ୍ୱାସକୁ ଆଧାର କରି ମହାଭାରତ ସହିତ ଜଡିତ କୌଣସି ବି ବସ୍ତୁକୁ ଘରେ ରଖାଯାଏ ନାହିଁ କି ମହାଭାରତ ଘରେ ପାଠ କରାଯାଏ ନାହିଁ ।