ଅନ୍ତଃକନ୍ଦଳ ନ ଦୂରେଇଲେ ଏସବୁ ରାଜ୍ୟରେ ବି ପରାସ୍ତ ହୋଇପାରେ ବିଜେପି

ନୂଆଦିଲ୍ଲୀ: ଗୁଜୁରାଟ ନିର୍ବାଚନରେ ​​ବମ୍ପର ବିଜୟ ସତ୍ତ୍ୱେ ହିମାଚଳ ପ୍ରଦେଶରେ ପରାଜୟ ବିଜେପିର ବିଜୟ ଉତ୍ସବକୁ ଫିକା କରିଦେଇଛି। ହିମାଚଳପ୍ରଦେଶରେ କ୍ଷମତା ହରାଇବା ପରେ ବିଜେପି ଏବେ ପରାଜୟର ସମୀକ୍ଷା କରିବାରେ ବ୍ୟସ୍ତ ଅଛି । ପ୍ରାରମ୍ଭିକ ରିପୋର୍ଟ ଅନୁଯାୟୀ, ସଂଗଠନରେ ଅନ୍ତଃକନ୍ଦଳ କାରଣରୁ ବିଜେପି ପରାସ୍ତ ହୋଇଥିଲା । ରିପୋର୍ଟ ଅନୁଯାୟୀ, ନିର୍ବାଚନ ଫଳାଫଳ ପରେ ଅମିତ ଶାହା ଜାତୀୟ ଅଧ୍ୟକ୍ଷ ଜେପି ନଡ୍ଡା ଏବଂ ସଂଗଠନର ସାଧାରଣ ସମ୍ପାଦକ ବି.ଏଲ୍ ସନ୍ତୋଷଙ୍କ ସହ ଆଲୋଚନା କରିଥିଲେ। କେନ୍ଦ୍ରରେ ଏକ ଶକ୍ତିଶାଳୀ ସରକାର ଥିବା ସତ୍ତ୍ୱେ ରାଜ୍ୟଗୁଡିକରେ ଆଭ୍ୟନ୍ତରୀଣ କନ୍ଦଳ ପାଇଁ ଦଳ ପରାସ୍ତ ହେବା ଏବେ ବିଜେପି ନେତୃତ୍ୱଙ୍କ ଟେନସନକୁ ବଢ଼ାଇଦେଇଛି। ଯଦି ବିଜେପି ଠିକ୍ ସମୟରେ ଏହି କନ୍ଦଳକୁ ନ ରୋକିପାରିବ ତେବେ ଆସନ୍ତା ବର୍ଷ ଦଳକୁ ଅନେକ ରାଜ୍ୟରେ ପରାଜୟର ସମ୍ମୁଖୀନ ହେବାକୁ ପଡିପାରେ। ଆସନ୍ତୁ ଜାଣିବା, କେଉଁ ରାଜ୍ୟରେ ଦଳ ମଧ୍ୟରେ ଅନ୍ତଃକନ୍ଦଳ ରହିଛି ?

ରାଜସ୍ଥାନ: ବସୁନ୍ଧରା ବନାମ ଗଜେନ୍ଦ୍ର ଶେଖାୱତ
୨୦୧୮ରେ ନିର୍ବାଚନରେ ହାରିବା ପରଠାରୁ ରାଜସ୍ଥାନ ବିଜେପିରେ ଅନ୍ତଃକନ୍ଦଳ ଜାରି ରହିଛି। ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ଏବଂ କେନ୍ଦ୍ର ମନ୍ତ୍ରୀ ଗଜେନ୍ଦ୍ର ଶେଖାୱତଙ୍କ ମଧ୍ୟରେ ତିକ୍ତତା ବଢ଼ିଥିବାବେଳେ ରାଜ୍ୟ ସଭାପତି ସତୀଶ ପୁନିୟାଙ୍କୁ ମଧ୍ୟ ବସୁନ୍ଧରା ଗୋଷ୍ଠୀ ଖୋଲାଖୋଲି ବିରୋଧ କରିଆସୁଛନ୍ତି | ଜୁଲାଇ ୨୦୨୧ ମସିହାରେ, ଶେଖାୱତ-ପୁନିୟାଙ୍କ ବିରୋଧରେ ବିବୃତ୍ତି ଦେଇଥିବାରୁ ବିଜେପି ବସୁନ୍ଧରାଙ୍କ ଘନିଷ୍ଠ ସହଯୋଗୀ ତଥା ପୂର୍ବତନ ମନ୍ତ୍ରୀ ରୋହିତାସ୍ଵ ଶର୍ମାଙ୍କୁ ଦଳରୁ ବହିଷ୍କାର କରିଥିଲା । ଆଉ ଏହି ବର୍ଷ ମଧ୍ୟ ରାଜ୍ୟସଭା ନିର୍ବାଚନରେ ବସୁନ୍ଧରାଙ୍କ ଘନିଷ୍ଠ ବିଧାୟକ ଶୋଭାରାନୀ ଦଳ ବିରୋଧରେ ଯାଇ କ୍ରସ-ଭୋଟିଂ କରିଥିଲେ।

କର୍ଣ୍ଣାଟକ: ବୋମ୍ମାଇ ବନାମ ୟେଦୁରୁପ୍ପା
ରାଜସ୍ଥାନ ପରି କର୍ଣ୍ଣାଟକରେ ଦଳ ମଧ୍ୟରେ ଅନ୍ତଃକନ୍ଦଳ ଚରମ ସୀମାରେ ରହିଛି। ଏଠାରେ ପୂର୍ବତନ ମୁଖ୍ୟମନ୍ତ୍ରୀ ୟେଦୁରୁପ୍ପା ଏବଂ ବର୍ତ୍ତମାନର ମୁଖ୍ୟମନ୍ତ୍ରୀ ବିଏସ୍ ବୋମ୍ମାଇ ଦଳ ମୁହାଁମୁହିଁ ହୋଇଛନ୍ତି। ଅପରେସନ୍ ଲୋଟସ୍ ପରେ ୨୦୧୯ ରେ ସରକାର ଗଠନ କରିବା ପରେ ବିଜେପି ୟେଦୁରୁପ୍ପାଙ୍କୁ ମୁଖ୍ୟମନ୍ତ୍ରୀ କରିଥିଲା। ଜୁଲାଇ ୨୦୨୧ ରେ, ଦଳ ୟେଦୁରୁପ୍ପାଙ୍କୁ ହଟାଇ ବିଏସ୍ ବୋମ୍ମାଇଙ୍କୁ ରାଜ୍ୟର ମୁଖ୍ୟମନ୍ତ୍ରୀ କରିଥିଲା। ଫେବୃଆରୀ ୨୦୨୩ରେ କର୍ଣ୍ଣାଟକରେ ନିର୍ବାଚନ ଅନୁଷ୍ଠିତ ହେବ। ଏଭଳି ପରିସ୍ଥିତିରେ ଯଦି ୟେଦୁରୁପ୍ପାଙ୍କୁ ନେଇ କୌଣସି ନିଷ୍ପତ୍ତି ନ ନିଆଯାଏ ତେବେ କର୍ଣ୍ଣାଟକରେ ବିଜେପି ହାତରୁ କ୍ଷମତା ଚାଲିଯାଇପାରେ | କାରଣ ଲିଙ୍ଗାୟତ ସମ୍ପ୍ରଦାୟ ସହ ୟେଦୁରୁପ୍ପା ସମ୍ପୃକ୍ତ ହୋଇଥିବାବେଳେ କର୍ଣ୍ଣାଟକର ଜନସଂଖ୍ୟାର ପ୍ରାୟ ୧୮% ହେଉଛନ୍ତି ଲିଙ୍ଗାୟତ ସମ୍ପ୍ରଦାୟ |

ଛତିଶଗଡ
୨୦୧୮ରେ ବିଜେପିକୁ ଛତିଶଗଡରେ ମଧ୍ୟ ପରାଜୟର ସମ୍ମୁଖୀନ ହେବାକୁ ପଡିଥିଲା। ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ, ବିରୋଧୀ ଦଳର ପୂର୍ବତନ ନେତା ଧରମଲାଲ କୌଶିକ, ପୂର୍ବତନ ଅଧ୍ୟକ୍ଷ ବିଷ୍ଣୁଦେବ ସାଏଙ୍କ ମଧ୍ୟରେ ବିବାଦ ଜାରି ରହିଛି | ଆସନ୍ତା ବର୍ଷ ଛତିଶଗଡରେ ମଧ୍ୟ ନିର୍ବାଚନ ଅନୁଷ୍ଠିତ ହେବ। ଏଭଳି ପରିସ୍ଥିତିରେ ଯଦି ଦଳ ଭିତରେ ଅନ୍ତଃକନ୍ଦଳ ଜାରି ରହେ, ତେବେ ଭୁପେଶ ବଘେଲଙ୍କୁ ଟକ୍କର ଦେବା କଷ୍ଟକର ହେବ।

୨୦୨୩ ମସିହାରେ କର୍ଣ୍ଣାଟକ, ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏଥିମଧ୍ୟରେ କର୍ଣ୍ଣାଟକ ଏବଂ ମଧ୍ୟପ୍ରଦେଶରେ ବିଜେପି ସରକାର ଥିବାବେଳେ ଛତିଶଗଡ ଏବଂ ରାଜସ୍ଥାନରେ ଦଳ ବିରୋଧୀ ଭୂମିକାରେ ଅଛି ।