ପୋଷ୍ଟ୍ ହେବାର ୧୦୦ ବର୍ଷ ପରେ ନିର୍ଦ୍ଦିଷ୍ଟ ଠିକଣାରେ ପହଞ୍ଚିଲା ଚିଠି
ଲଣ୍ଡନ୍: ୧୯୧୬ ମସିହାରେ ଇଂଲଣ୍ଡ୍ର ବେଥ୍ ନଗରୀରେ ପୋଷ୍ଟ୍ ହୋଇଥିବା ଗୋଟାଏ ଚିଠି ଶତାଧିକ ବର୍ଷ ପରେ ଲଣ୍ଡନ୍ ଠିକଣାରେ ପହଞ୍ଚିଥିବା କଥା ବିଭିନ୍ନ ଗଣମାଧ୍ୟମ ରିପୋର୍ଟ କରିଛନ୍ତି। ରାଜା ପଞ୍ଚମ ଜର୍ଜଙ୍କ ଚିତ୍ର ଥିବା ଗୋଟିଏ ‘ପେନି’ (ଏକ ପଇସିଆ) ମୂଲ୍ୟର ଡାକଟିକେଟ୍ ଲଗାଯାଇଥିବା ଏହି ଚିଠିଟିରେ ବେଥ୍ ଓ ସିଡେନ୍ହାମ୍ ଡାକ ମୋହର ବାଜିଛି। ଏହି ଚିଠିଟିକୁ ୨୦୨୧ରେ ଥିଏଟର୍ ନିର୍ଦେଶକ ଫିନ୍ଲେ ଗ୍ଲେନ୍ଙ୍କ ‘କ୍ରିଷ୍ଟାଲ୍ ପାଲେସ୍’ ଫ୍ଲାଟ୍ରେ ଥିବା ଚିଠିବାକ୍ସରେ ପକାଯାଇଥିଲା। ଅପ୍ରତ୍ୟାଶିତ ଚିଠିଟି ପାଇ ୨୭ ବର୍ଷିୟ ଗ୍ଲେନ୍ ଓ ତାଙ୍କ ପ୍ରେମିକା ତାଜୁବ ହୋଇଯାଇଥିଲେ। ଗ୍ଲେନ୍ କହିଛନ୍ତି, ଚିଠିଟି ୧୦୦ ବର୍ଷ ଧରି କେମିତି ପଡ଼ି ରହିଥିଲା ଭାବି ଆଚମ୍ବିତ ହେବା ସ୍ବାଭାବିକ। ନିଜ ଘରେ ପ୍ରାୟ ବର୍ଷେ ରଖିବା ପରେ ଗ୍ଲେନ୍ ଏହି ଚିଠିଟିକୁ ନେଇ ସ୍ଥାନୀୟ ଐତିହାସିକ ସମାଜକୁ ଯାଇଥିଲେ। ଚଠିଟି କିଏ ଦେଇଥିଲା ଜାଣିବା ଥିଲା ତାଙ୍କର ଉଦ୍ଦେଶ୍ୟ ବୋଲି ‘ସିଏନ୍ଏନ୍’ ରିପୋର୍ଟ କରିଛି।