ବିକ୍ରି ହୋଇଯିବ ଭାରତ ପେଟ୍ରୋଲିୟିମ !

ବିକ୍ରି ହେବ ଭାରତ ପେଟ୍ରୋଲିୟମ । ଭାରତ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍‌ (ବିପିସିଏଲ୍‌)ରେ ଥିବା ସରକାରୀ ଅଂଶଧନ ବିକ୍ରି କରିବା ପ୍ରସ୍ତାବକୁ କ୍ୟାବିନେଟ୍‌ର ନୀତିଗତ ମଞ୍ଜୁରି ମିଳିଛି। ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍ କମିଟି  ବୈଠକରେ ଏହି ନିଷ୍ପତ୍ତି ଗ୍ରହଣ କରାଯାଇଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ତେବେ ଆସାମର ନୁମାଲିଗଡ଼ ଠାରେ କମ୍ପାନୀଠାରେ  ଯେଉଁ ବିଶୋଧନାଗାର ରହିଛି ତାହାକୁ ବିକ୍ରି କରାଯିବ ନାହିଁ ବୋଲି ନିର୍ମଳା ସ୍ପଷ୍ଟ କରିଦେଇଛନ୍ତି। ନୁମାଲିଗଡ଼ ଠାରେ ଥିବା ବିଶୋଧନାଗାରରେ ବିପିସିଏଲ୍‌ର 61 % ଅଂଶଧନ ରହିଛି। ତାହାକୁ ଅନ୍ୟ ସରକାରୀ କମ୍ପାନୀକୁ ହସ୍ତାନ୍ତର କରାଯିବ। ଭାରତ ପେ‌ଟ୍ରୋଲିୟମ୍ ବ୍ୟତୀତ ଅନ୍ୟ 4 ଟି ସରକାରୀ ସଂସ୍ଥାରୁ ମଧ୍ୟ ପୁଞ୍ଜି ପ୍ରତ୍ୟାହାର ହେବ। ସେହି ସଂସ୍ଥାଗୁଡ଼ିକ ହେଉଛି ସିପିଙ୍ଗ୍‌ କର୍ପୋରେସନ୍ ଅଫ୍‌ ଇଣ୍ଡିଆ, କଣ୍ଟେନର୍ କର୍ପୋରେସନ୍ ଅଫ୍ ଇଣ୍ଡିଆ, ଟିଏଚ୍‌ଡିସିଆଇଏଲ୍‌ ଓ ଏନ୍‌ଇଇପିସିଓ।

କେତେକ ରାଷ୍ଟ୍ରାୟତ୍ତ ଉଦ୍ୟୋଗରେ ସରକାରୀ ଅଂଶଧନ ପରିମାଣକୁ 51 %ରୁ କମ୍ କରିବାକୁ ମଧ୍ୟ ଆଜି କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଏଭଳି କଂପାନି ତାଲିକାରେ ଭାରତୀୟ ତୈଳ ନିଗମର ନାମ ରହିଛି। ଏହି ସଂସ୍ଥାଗୁଡ଼ିକରେ ସରକାରୀ ଅଂଶଧନ ପରିମାଣ ଯଦିଓ 51 %ରୁ କମ୍ ହେବ କିନ୍ତୁ ତାହା ସରକାରଙ୍କ ମାଲିକାନାରେ ହିଁ ରହିବ। କମ୍ପାନୀ କର୍ତ୍ତୃପକ୍ଷଙ୍କ ମାଲିକାନା ସରକାରଙ୍କ ପାଖରେ ରହିବ।