କଂଗ୍ରେସର ‘ରାତ୍ରି ଭୋଜନ କୂଟନୀତି’: ବେଙ୍ଗାଲୁରୁ ବୈଠକରେ ଚୂଡ଼ାନ୍ତ ହେବ ବିରୋଧୀଙ୍କ ରଣନୀତି

ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ଆସନ୍ତା ଜୁଲାଇ ୧୭ ଓ ୧୮ ତାରିଖରେ ଦୁଇଦିନ ବ୍ୟାପୀ ବେଙ୍ଗାଲୁରୁରେ ହେବାକୁ ଥିବା ବିରୋଧୀ ଦଳ ନେତାଙ୍କ ପରବର୍ତ୍ତୀ ବୈଠକରେ ଯୋଗଦେବେ। ଏହି ବୈଠକ ପାଇଁ ୨୪ଟି ଦଳକୁ ନିମନ୍ତ୍ରଣ କରାଯାଇଛି। ୨୦୨୪ ଲୋକସଭା ନିର୍ବାଚନ ପୂର୍ବରୁ ଏକତା ସୃଷ୍ଟି ପାଇଁ ବିରୋଧୀ ଦଳଗୁଡ଼ିକର ପ୍ରଥମ ବୈଠକ ଜୁନ୍‌ ୨୩ରେ ବିହାରର ପାଟନାରେ ଅନୁଷ୍ଠିତ ହୋଇଥିଲା। ତେବେ ଏହି ସୋନିଆ ଗାନ୍ଧୀ ମିଳିତ ପ୍ରଗତିଶୀଳ ମେଣ୍ଟ (ୟୁପିଏ)ର ଅଧ୍ୟକ୍ଷା ଏବଂ ତାଙ୍କ ଉପସ୍ଥିତି ସମ୍ଭବତଃ ସୁନିଶ୍ଚିତ କରିବ ଯେ ବିରୋଧୀ ଦଳଗୁଡ଼ିକ ମଧ୍ୟରେ ସୌହାର୍ଦ୍ଦ୍ୟ ବଜାୟ ରହିବ ଏବଂ ଜଟିଳ ପ୍ରସଙ୍ଗଗୁଡ଼ିକ ସହଜରେ ସମାଧାନ ହୋଇଯିବ। ଜୁଲାଇ ୧୭ତାରିଖରେ ବେଙ୍ଗାଲୁରୁରେ ୨୪ଟି ରାଜନୈତିକ ଦଳର ନେତା ଏକ ଅନୌପଚାରିକ ପରିବେଶରେ ବୈଠକ କରିବେ ଏବଂ ପରଦିନ ଅଧିକ ଆନୁଷ୍ଠାନିକ ଆଲୋଚନା କରିବେ। କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମେୟା ପ୍ରଥମ ଦିନରେ ଆଲୋଚନା ଶେଷ ହେବା ପରେ ଏକ ଆନୁଷ୍ଠାନିକ ରାତ୍ରି ଭୋଜନର ଆୟୋଜନ କରିବେ।

ସୋନିଆଙ୍କ ଉପସ୍ଥିତିରେ ୨୦୨୪ ଲୋକସଭା ନିର୍ବାଚନ ପାଇଁ ଯୋଜନା, ଏହାର ସମାଧାନ ପାଇଁ ମୁଖ୍ୟ ପ୍ରସଙ୍ଗ ଏବଂ କାର୍ଯ୍ୟକ୍ରମ ଉପରେ ଦଳଗୁଡ଼ିକ ବୈଠକରେ ଆଲୋଚନା କରିବେ। ସାରା ଦେଶରେ ବିଜେପିକୁ କିପରି ମୁକାବିଲା କରାଯିବ ସେ ନେଇ ମଧ୍ୟ ବୈଠକରେ ଆଲୋଚନା ହେବ। ଏଥିସହ ଆସନ ବୁଝାମଣା କିପରି ଏବଂ କେଉଁ ଫର୍ମୁଲାରେ ହେବ ସେ ନେଇ ମଧ୍ୟ ଆଲୋଚନା ହେବ।

ମହାରାଷ୍ଟ୍ରରେ ଦାଦା ଶରଦ ପାୱାରଙ୍କ ବିରୋଧରେ ଅଜିତ ପାୱାରଙ୍କ ବିଦ୍ରୋହ ପରେ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି)ରେ ବିଭାଜନ ହେବାର ଗୋଟିଏ ଦିନ ପରେ ଜୁଲାଇ ୧୩ରୁ ଜୁଲାଇ ୧୭ ପର୍ଯ୍ୟନ୍ତ ଏହି ବୈଠକକୁ ସ୍ଥଗିତ ରଖାଯାଇଥିଲା। ଏହି ବିଭାଜନ ବିହାର ଭଳି ରାଜ୍ୟରେ ବିରୋଧୀ ମେଣ୍ଟ ଭାଙ୍ଗିବା ନେଇ କଳ୍ପନାଜଳ୍ପନା ସୃଷ୍ଟି କରିଥିଲା।