ବିଷାକ୍ତ ରାଜଧାନୀ ପବନ: ବ୍ୟାପୁଛି ଥଣ୍ଡା, କାଶ ଓ ଛିଙ୍କ ରୋଗ
ଭୁବନେଶ୍ବର: ଶୀତ ପଡ଼ିନି। ଦିନର ତାପମାତ୍ରା ୩୫ ଡିଗ୍ରି ପାଖାପାଖି ରହୁଛି। ରାତିର ତାପମାତ୍ରା ସ୍ବାଭାବିକଠାରୁ ୪ ଡିଗ୍ରି ଅଧିକ। ତା’ସତ୍ତ୍ବେ ରାତିରେ ରାଜଧାନୀ ଆକାଶରେ କୁହୁଡ଼ିର ଭ୍ରମ ସୃଷ୍ଟି ହେଉଛି। କେଉଁଠି ଅଧିକ ଦେଖିବାକୁ ମିଳୁଛି, ଆଉ କେଉଁଠି କମ୍। ଶିଳ୍ପାଞ୍ଚଳରେ ଏହାର ପରିମାଣ ଏତେ ରହୁଛି ଯେ ଅଧିକ ଦୂର ପର୍ଯ୍ୟନ୍ତ ରାସ୍ତା ଦୃଶ୍ୟମାନ ହେଉ ନାହିଁ। ଶୀତ ଆସି ନ ଥିବା ବେଳେ ରାତିରେ ଆକାଶରେ ଧୂଳିକଣା ଦେଖିବାକୁ ମିଳୁଛି। ଏଥିସହିତ ଏବେ ଘରେ ଘରେ ଥଣ୍ଡା, କାଶ ଓ ଛିଙ୍କ ବ୍ୟାପୁଛି। ଦୀର୍ଘଦିନ ଧରି ଥଣ୍ଡା ଲାଗି ରହୁଥିବାରୁ ଲୋକେ ଏହାକୁ ସାଧାରଣ ଭାବି ଚିକିତ୍ସା କରୁନାହାନ୍ତି, ଯାହାକି ଏବେ ବିପଦ ବଢ଼ାଇଲାଣି। ଅନୁସନ୍ଧାନରୁ ଜଣାପଡ଼ିଛି ଯେ ଏବେ ରାଜଧାନୀର ବାୟୁ ଅସ୍ବାସ୍ଥ୍ୟକର ହୋଇପଡ଼ିଛି।