ଚେନ୍ନାଇ ଉବୁଟୁବୁ, ଆଗକୁ ଡଜନେ ସହର ବୁଡ଼ିପାରେ
ନୂଆଦିଲ୍ଲୀ: ନିକଟରେ ଚେନ୍ନାଇରେ ସାମୁଦ୍ରିକ ଝଡ଼ ‘ମିଗଜୋମ’ ଯୋଗୁଁ ସୃଷ୍ଟି ହୋଇଥିବା ବନ୍ୟା ଜଳବାୟୁଜନିତ ବିପର୍ଯ୍ୟୟ ଦ୍ବାରା ଭାରତୀୟ ସହରଗୁଡ଼ିକ ପ୍ରଭାବିତ ହେବାର ଆଶଙ୍କାକୁ ପୁଣି ଥରେ ସାମନାକୁ ଆଣିଛି। ଡିସେମ୍ବର ୪ ସୁଦ୍ଧା ୪୮ ଘଣ୍ଟା ମଧ୍ୟରେ ୪୦ ସେଣ୍ଟିମିଟରରୁ ଅଧିକ ବର୍ଷା ଚେନ୍ନାଇ ସହରକୁ ଜଳମଗ୍ନ କରିଦେଇଥିଲା। ଆନ୍ଧ୍ରପ୍ରଦେଶ ଓ ତାମିଲନାଡୁରେ ସାମୁଦ୍ରିକ ଝଡ଼ ‘ମିଗଜୋମ’ରେ ଏକ ଡଜନରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ବ୍ୟାପକ କ୍ଷୟକ୍ଷତି ହୋଇଛି। ଆବାସିକ କୋଠାଗୁଡ଼ିକ ଜଳମଗ୍ନ ହେବା ସହ ଜଳମଗ୍ନ ରାସ୍ତାରେ କାର୍ଗୁଡ଼ିକ ପାଣିସୁଅରେ ଭାସି ଯାଉଥିବାର ଦେଖିବାକୁ ମିଳିଛି।
୨୦୨୧ରେ ଜଳବାୟୁ ପରିବର୍ତ୍ତନ ଉପରେ ଆନ୍ତଃସରକାରୀ ପ୍ୟାନେଲ (ଆଇପିସିସି)ର ଏକ ରିପୋର୍ଟରେ ଭାରତ ପାଇଁ ଚେତାବନୀ ଦିଆଯାଇଥିଲା। ଶତାବ୍ଦୀ ଶେଷ ସୁଦ୍ଧା ମୁମ୍ବାଇ, ଚେନ୍ନାଇ, କୋଚି ଏବଂ ବିଶାଖାପାଟଣା ସମେତ ଏକ ଡଜନ ଭାରତୀୟ ସହର ଜଳମଗ୍ନ ହୋଇପାରେ। ବନ୍ୟା ଆଶଙ୍କା କେବଳ ଉପକୂଳବର୍ତ୍ତୀ ସହରମାନଙ୍କ ପାଇଁ ନୁହେଁ। ବିହାର, ହିମାଚଳ ପ୍ରଦେଶ ଓ ଉତ୍ତରାଖଣ୍ଡର ସହରଗୁଡ଼ିକ ମୌସୁମୀ ଜନିତ ବନ୍ୟା ଓ ଭୂସ୍ଖଳନର ଶିକାର ହୋଇଛନ୍ତି। ଦିଲ୍ଲୀରେ ମଧ୍ୟ ଚଳିତ ବର୍ଷ ପ୍ରାରମ୍ଭରେ ପ୍ରବଳ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା।