ଦେଶର GDP ଠାରୁ ବି ଭଲ ରହିଛି ଏହି ୧୭ ରାଜ୍ୟର ଜିଡିପି, ତାଲିକାରେ ରହିଛି ଓଡ଼ିଶାର ନାଁ

ଆର୍ଥିକ ବର୍ଷ ୨୦୨୪-୨୫ର ଦ୍ବିତୀୟ ତ୍ରୈମାସିକରେ ଦେଶର ଜିଡିପି ୫.୪ ପ୍ରତିଶତକୁ ଖସି ଆସିଛି। ଯେତେବେଳେକି ଗତ ପ୍ରଥମ ତ୍ରୖମାସିକରେ ଏହା ୬.୭ ପ୍ରତିଶତ ରହିଥିଲା। ଆଉ ଏଭଳି ହ୍ରାସର ଏକ ମୁଖ୍ୟ କାରଣ ହେଉଛି ସହାରାଞ୍ଚଳରେ ମଧ୍ୟବିତ୍ତଙ୍କ ଖର୍ଚ୍ଚ କମିବା। ତେବେ ଦେଶର ଜିଡିପିରେ ହ୍ରାସ ହୋଇଥିଲେ ମଧ୍ୟ ଅନେକ ରାଜ୍ୟର ଜିଡିପିରେ ବେଶ ଭଲ ବୃଦ୍ଧି ଦେଖିବାକୁ ମିଳିଛି।ଏହି ରାଜ୍ୟମାନେ କୋଭିଡ ମହାମାରୀ ପରଠାରୁ ହିଁ ଉଲ୍ଲେଖନୀୟ ବୃଦ୍ଧି ହାର ହାସଲ କରିଛନ୍ତି।

ପିଏଚଡି ଚାମ୍ବର ଅଫ୍ କମର୍ସ ଆଣ୍ଡ୍ ଇଣ୍ଡଷ୍ଟ୍ରିର ଏକ ରିପୋର୍ଟ ଅନୁଯାୟୀ, ଆର୍ଥିକ ବର୍ଷ ୨୦୨୧-୨୨ ଏବଂ ୨୦୨୨-୨୩ରେ ୨୫ ରାଜ୍ୟର ଅଭିବୃଦ୍ଧି ହାର ୭ ପ୍ରତିଶତରୁ ଅଧିକ ରହିଛି। ଏମାନଙ୍କ ମଧ୍ୟରୁ କେବଳ ୧୭ ରାଜ୍ୟ ୯ ପ୍ରତିଶତ ବୃଦ୍ଧି ହାରକୁ ଟପିଛନ୍ତି। ଯେଉଁଥିରେ ଗୁଜରାଟ, କେରଳ, ତେଲେଙ୍ଗାନା, ରାଜସ୍ଥାନ, ପଶ୍ଚିମବଙ୍ଗ, ବିହାର, କର୍ଣ୍ଣାଟକ, ଉତ୍ତର ପ୍ରଦେଶ, ହରିୟାଣ ଏବଂ ଓଡ଼ିଶା ଭଳି ରାଜ୍ୟ ରହିଛନ୍ତି।

ରିପୋର୍ଟ ଅନୁଯାୟୀ, ପଞ୍ଜାବ, ହରିୟାଣା ଏବଂ ଉତ୍ତର ପ୍ରଦେଶ କୃଷି ଉତ୍ପାଦନରେ ଆଗରେ ରହିଛନ୍ତି। ଯାହା ଖାଦ୍ୟ ସୁରକ୍ଷାକୁ ବଳ ଦେଇଛି। ଛତିଶଗଡ଼, ମଧ୍ୟ ପ୍ରଦେଶ ଏବଂ ଓଡ଼ିଶା ଖଣିଜ ସମ୍ପଦର ବ୍ୟବହାର କରି ଔଦ୍ୟୋଗିକ ପ୍ରଗତି କରିଛନ୍ତି। ସେହିଭଳି ମହାରାଷ୍ଟ୍ର, ଗୁଜରାଟ ଏବଂ କର୍ଣ୍ଣାଟକ ପ୍ରଯୁକ୍ତି ଏବଂ ଔଦ୍ୟୋଗିକ ବିକାଶରେ ଉତ୍କୃଷ୍ଟ ପ୍ରଦର୍ଶନ କରିଛନ୍ତି। କେରଳ, ରାଜସ୍ଥାନ ଏବଂ ଗୋଆ ଭଳି ରାଜ୍ୟ ପର୍ଯ୍ୟଟନ କ୍ଷେତ୍ରରେ ଭଲ ପ୍ରଦର୍ଶନ କରିଛନ୍ତି। ଫଳରେ ବିଦେଶୀ ମୁଦ୍ରା ଆୟରେ ବୃଦ୍ଧି ହୋଇଛି।

ସେହିଭଳି ତାମିଲନାଡୁ ଏବଂ ଆନ୍ଧ୍ର ପ୍ରଦେଶ ମୌଳିକ ଭିତ୍ତିଭୂମି ପ୍ରକଳ୍ପ, ରାଜସ୍ଥାନ ଏବଂ ଗୁଜରାଟ ଅକ୍ଷୟ ଶକ୍ତି କ୍ଷେତ୍ରରେ ଅଗ୍ରଣୀ ଭୂମିକା ନିଭାଇଛନ୍ତି। ପୂର୍ବୋତ୍ତର ରାଜ୍ୟରେ ଯୋଗାଯୋଗରେ ସୁଧାର ଏହି କ୍ଷେତ୍ରକୁ ବାଣିଜ୍ୟିକ ଏବଂ ପର୍ଯ୍ୟଟନର କେନ୍ଦ୍ରରେ ପରିବର୍ତ୍ତନ କରିଛି। କେରଳ ଏବଂ ତାମିଲନାଡୁ ଶିକ୍ଷା ଏବଂ ବ୍ୟବସ୍ଥାରେ ନୂଆ ପଦକ୍ଷେପ ମାନବ ବିକାଶ ସୂଚକାଙ୍କରେ ସୁଧାର ଆଣିଛି। ଭାଇବ୍ରେଣ୍ଟ ଗୁଜରାଟ ଶିଖର ସମ୍ମିଳନୀ, ପଞ୍ଜାବର PITEX ବାଣିଜ୍ୟ ମେଳା ଏବଂ ତେଲେଙ୍ଗାନାର ଆଇଟି କରିଡର ଭଳି ପଦକ୍ଷେପ ମଧ୍ୟ ବିଦେଶୀ ନିବେଶକୁ ଆକର୍ଷିତ କରିଛି।