ଗୋଡାଲ ଅନୁସୂଚିତ ଜନଜାତି ଛାତ୍ର ନିବାସରେ ଛାତ୍ରଙ୍କ ମୃତ୍ୟୁ

ନୂଆପଡା: :ନୂଆପଡ଼ା ଜିଲ୍ଲା ସିନାପାଲି ବ୍ଲକ ସ୍ଥିତ ଗୋଡାଳ ଅନୁସୂଚିତ ଜନଜାତି ଛାତ୍ର ନିବାସ ରେ ଗତ ମଙ୍ଗଲବାର ରାତ୍ରି ରେ ଜଣେ ଛାତ୍ର ଙ୍କ ମୃତ୍ୟୁ ହୋଇଥିବା ଜଣାପଡିଛି। ମୃତ ଛାତ୍ର ଜଣକ ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ କଛାରପଡା ଗ୍ରାମର ସ୍ବର୍ଗତ ଅର୍ଜୁନ ମାଝୀଙ୍କ ପୁଅ ଲାଲଧର ମାଝୀ (୧୨) ବୋଲି ଜଣାପଡ଼ିଛି। ସେ ସ୍ଥାନୀୟ ଗୋଡାଲ ବିଦ୍ୟାଳୟରେ ଅଷ୍ଟମ ଶ୍ରେଣୀରେ ପଢ଼ୁଥିବା ସୂଚନା ମିଳିଛି। ପ୍ରାପ୍ତ ଖବର ଅନୁସାରେ ଗତ ମଙ୍ଗଲବାର କୌଣସି କାରଣରୁ ଛାତ୍ର ଙ୍କ ଦେହ ଅସୁସ୍ଥ ଥିବାରୁ ତାଙ୍କୁ ରାତି ୧୧ଟା ରେ ଚିକିତ୍ସା ପାଇଁ ସିନାପାଲି ସରକାରୀ ହସପିଟାଲ ନିଆଯାଇଥିଲା। ସେଠାରେ ଛାତ୍ର ଜଣକ ଚିକିତ୍ସା ପରେ ସ୍ୱାସ୍ଥ୍ୟ ଅବସ୍ଥା ସ୍ଥିର ଥିବାରୁ ପୁଣି ଛାତ୍ର ନିବାସକୁ ଫେରି ଆସିଥିଲେ। ବୁଧବାର ସକାଳେ ଛାତ୍ର ଜଣକ ମୃତ୍ୟୁବରଣ କରିଥିବା ଜାଣିପାରି ତୁରନ୍ତ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରିବାର ଲୋକେ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ହୋହାଲ୍ଲା କରିବା ସହ କ୍ଷତିପୂରଣ ଦାବୀ କରିବା ସହ ସମ୍ପୃକ୍ତ ବିଦ୍ୟାଳୟର ଛାତ୍ର ନିବାସ ଦାୟିତ୍ୱ ରେ ଥିବା ଅଧିକାରୀ କର୍ମଚାରୀଙ୍କ ବିରୋଧ ରେ ଦୃଢ଼ କାର୍ଯ୍ୟାନୁଷ୍ଠାନ ଦାବୀ କରିଥିଲେ। ପରେ ଛାତ୍ର ଙ୍କ ମୃତଦେହ ବ୍ୟବଛେଦ ପରେ ଶବ ସଂସ୍କାର ପାଇଁ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ସୁଚନା ଯୋଗ୍ୟ ଯେ ଉକ୍ତ ନିବାସର ପ୍ରଧାନ ଶିକ୍ଷକ ଗତ ୨୪ତାରିଖରୁ ଛୁଟିରେ ରହିଥିବା ବେଳେ ଜଣେ ସହ ଶିକ୍ଷକ ଙ୍କୁ ଦାୟିତ୍ୱ ପ୍ରଦାନ କରିଥିଲେ। ହେଲେ ଦାୟିତ୍ୱ ରେ ଥିବା କର୍ମଚାରୀ ମାନଙ୍କ ଅବହେଳା ରୁ ଏଭଳି ଅଭାବନୀୟ ଘଟଣା ଘଟିଥିବା ଅଞ୍ଚଳ ରେ ଅସନ୍ତୋଷ ପ୍ରକାଶ ପାଇଛି। ଘଟଣା ସ୍ଥଲରେ ସିନାପାଲି ପୁଲିସ ପହଞ୍ଚି ତଦନ୍ତ ଚଳାଇ ଥିବା ବେଳେ ସିନାପାଲି ଡବ୍ଲୁଇଓ, ଏଡବ୍ଲୁଇଓ , ବିଇଓ, ଏବିଇଓ ପହଞ୍ଚି ଘଟଣା ସମ୍ପର୍କରେ ଅନୁଧ୍ୟାନ କରୁଥିବା ଜଣାପଡିଛି। ଅପରାହ୍ଣରେ ନୂଆପଡା ଉପଜିଲ୍ଲାପାଳ ଯୋଗେନ୍ଦ୍ର ମାଝୀ ସମ୍ପୃକ୍ତ ବିଦ୍ୟାଳୟର ଛାତ୍ର ନିବାସରେ ପହଞ୍ଚି ତଦନ୍ତ କରୁଥିବା ଜଣାପଡିଛି। ଏନେଇ ଉପଜିଲ୍ଲାପାଳ ଙ୍କୁ ପଚାରିବାରୁ ତଦନ୍ତ ଚାଲିଛି, ତଦନ୍ତ ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଛନ୍ତି।