ଜରୁରୀକାଳୀନ ହୃଦରୋଗ ପ୍ରାଥମିକ ଚିକିତ୍ସା ନିମନ୍ତେ ଓଡ଼ିଶାରେ ସମ୍ ହସ୍ପିଟାଲ୍ ଏକମାତ୍ର ଆଂଚଳିକ ତାଲିମ କେନ୍ଦ୍ର ଭାବେ ମନୋନୀତ
ଭୁବନେଶ୍ୱର, ମାର୍ଚ୍ଚ ୨୬: ଜରୁରୀକାଳୀନ ପରିସ୍ଥିତିରେ ହୃଦରୋଗୀର ଜୀବନ ରକ୍ଷା ନିମନ୍ତେ ଆବଶ୍ୟକୀୟ ପ୍ରାଥମିକ ଚିକିତ୍ସା ସମ୍ବନ୍ଧୀୟ ଆଂଚଳିକ ତାଲିମ କେନ୍ଦ୍ର ଭାବେ ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ସ୍ଥାନୀୟ ଇନ୍ଷ୍ଟିଚ୍ୟୁଟ ଅଫ୍ ମେଡିକାଲ ସାଇନ୍ସେସ୍ ଆଣ୍ଡ ସମ ହସ୍ପିଟାଲ୍କୁ ଇଣ୍ଡିଆନ ରେସୁସିଟେସନ୍ କାଉନ୍ସିଲ୍ (ଆଇଆର୍ସି) ଦ୍ୱାରା ମନୋନୀତ କରାଯାଇଛି । ଏହି କେନ୍ଦ୍ରରେ ବେସିକ୍ କାର୍ଡିଆକ୍ ଲାଇଫ୍ ସପୋର୍ଟ (ବିସିଏଲ୍ଏସ୍) ଓ କମ୍ପ୍ରେହେନସିଭ୍ କାର୍ଡିଆକ୍ ଲାଇଫ୍ ସପୋର୍ଟ (ସିସିଏଲ୍ଏସ୍) ବିଷୟରେ ଡାକ୍ତର ତଥା ଅନ୍ୟ ସ୍ୱାସ୍ଥ୍ୟକର୍ମୀଙ୍କୁ ତାଲିମ ଦିଆଯିବ । ଓଡ଼ିଶାରେ କେବଳ ଆଇଏମଏସ୍ ଆଣ୍ଡ ସମ୍ ହସ୍ପିଟାଲ୍କୁ ଏଥି ନିମନ୍ତେ ମନୋନୀତ କରାଯାଇଛି ବୋଲି ହସ୍ପିଟାଲ୍ର ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର (ଡାକ୍ତର) ପୁଷ୍ପରାଜ ସାମନ୍ତସିଂହାର କହିଛନ୍ତି ।
ଏଥି ନିମନ୍ତେ ହସ୍ପିଟାଲ୍ରେ ମାର୍ଚ୍ଚ ୨୩ ଓ ୨୪ ଦୁଇ ଦିନ ଧରି ଆଇଆରସି ଦ୍ୱାରା ଅନୁମୋଦିତ ଏକ କର୍ମଶାଳା ଅନୁଷ୍ଠିତ ହୋଇଥିଲା । ଏଥିରେ ଆଇଆରସିର ଅଧ୍ୟକ୍ଷ ପ୍ରଫେସର (ଡାକ୍ତର) ଏସ୍. ଚକ୍ର ରାଓ, ତିରୁପତିସ୍ଥିତ ଭେଙ୍କଟେଶ୍ୱର ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ର ଆନେସ୍ଥେସିଆ ଓ କ୍ରିଟିକାଲ୍ କେୟାର ମେଡିସିନ୍ ବିଭାଗର ମୁଖ୍ୟ ପ୍ରଫେସର (ଡାକ୍ତର) ଆଲୋକ ସାମନ୍ତରାୟ ଓ ତିରୁପତିସ୍ଥିତ ଏସ୍.ଭି. ମେଡିକାଲ୍ କଲେଜର ଆନେସ୍ଥେସିଓଲୋଜି ବିଭାଗର ମୁଖ୍ୟ ପ୍ରଫେସର (ଡାକ୍ତର) ଶ୍ରୀନିବାସ ରାଓ ବିଶେଷଜ୍ଞ ଭାବେ ଯୋଗ ଦେଇ ଏହି ତାଲିମ୍ ପ୍ରଦାନ କରିଥିଲେ । ଏହି କର୍ମଶାଳାରେ ୪୫ ଜଣ ଡାକ୍ତର ଓ ପି.ଜି ଛାତ୍ରଛାତ୍ରୀ ଯୋଗ ଦେଇ ତାଲିମ ନେଇଥିଲେ । କର୍ମଶାଳାର ଉଦ୍ଯାପନୀ କାର୍ଯ୍ୟକ୍ରମରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଡିନ୍ ପ୍ରଫେସର (ଡାକ୍ତର) ସଂଘମିତ୍ରା ମିଶ୍ର ଓ ପ୍ରଫେସର (ଡାକ୍ତର) ସାମନ୍ତସିଂହାର ଯୋଗ ଦେଇଥିଲେ । ହସ୍ପିଟାଲ୍ର ଇମର୍ଜେନ୍ସି ମେଡିସିନ୍ ବିଭାଗର ମୁଖ୍ୟ ପ୍ରଫେସର (ଡାକ୍ତର) ସୁଖଦେବ ନାୟକଙ୍କ ଦ୍ୱାରା ପରିଚାଳିତ ଏହି କାର୍ଯ୍ୟକ୍ରମକୁ ଆଡିସ୍ନାଲ୍ ଡିନ୍ (ଏକାଡେମିକ) ପ୍ରଫେସର (ଡାକ୍ତର) ପ୍ରକାଶ କୁମାର ସାହୁ ସଂଚାଳନ କରିଥିଲେ ।
କର୍ମଶାଳାରେ ଯୋଗ ଦେଇଥିବା ବିଶେଷଜ୍ଞ ବୃନ୍ଦ ତଥା ପ୍ରଫେସର (ଡାକ୍ତର) ନାୟକ ଓ ପ୍ରଫେସର (ଡାକ୍ତର) ସାହୁ ମାର୍ଚ୍ଚ ୨୪ ତାରିଖ ଦିନ ରାଜଭବନ ଠାରେ ଓଡ଼ିଶାର ରାଜ୍ୟପାଳ ଡ. ହରିବାବୁ କମଭାମପଟିଙ୍କୁ ଭେଟି ଏହି ତାଲିମର ଆବଶ୍ୟକତା ଓ ଗୁରୁତ୍ୱ ବିଷୟରେ ଆଲୋଚନା କରିଥିଲେ ।