ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ନାଁରେ ଠକେଇ ଅଭିଯୋଗ । ସହିଦନଗର ଥାନାରେ ଜଣେ ମହିଳା କଲ୍ୟାଣୀ ନାୟକ ଠକେଇ ନେଇ ଏତଲା ଦେଇଛନ୍ତି । ବର୍ଷାଙ୍କ ବିରୋଧରେ ଆଇପିସିର ଦଫା ୨୯୪, ୪୨୦, ୫୦୬ରେ ରୁଜୁ ହୋଇଛି ମାମଲା । ପୋଲିସ ଅଭିଯୋଗର ତଦନ୍ତ କରୁଛି । ଅଭିଯୋଗ ହୋଇଛି, ସହିଦନଗର ଅଞ୍ଚଳର ମହିଳା ଭୁବନେଶ୍ୱର ଜନତା ମୈଦାନକୁ ମେଳା ଦେଖିବାକୁ ଯାଇଥିଲେ । ଏତିକିବେଳେ କଟକର ଆୟୁଷୀ ପ୍ରିୟଦର୍ଶିନୀ ଓ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ସହ ତାଙ୍କର ଦେଖା ହୋଇଥିଲା । କଲ୍ୟାଣୀ ବର୍ଷାଙ୍କ ଫ୍ୟାନ୍ ହୋଇଥିବାରୁ ଫୋନ୍ ନମ୍ବର ମାଗିଥିଲେ । କଲ୍ୟାଣୀଙ୍କ ସହ ଭୁବନେଶ୍ୱରରେ ଆୟୁଷିଙ୍କ ସହ ଅନେକ ଥର ଦେଖା ହୋଇଛି । ସେ ତାଙ୍କୁ ଚାକିରି ପାଇଁ କହିଥିଲେ ।ଆୟୁଷି କହିଥିଲେ, ବର୍ଷାଙ୍କ ସହ କଥା ହୋଇ ଏକ ସୁନା ଦୋକାନରେ ଚାକିରି କରାଇ ଦେବେ । ଏଥିପାଇଁ ୫୦ ହଜାର ଟଙ୍କା ସିକ୍ୟୁରିଟି ମନି ଦାବି କରିଥିଲେ ଆୟୁଷୀ । କଲ୍ୟାଣୀ ଏତେ ଟଙ୍କା ଦେଇପାରିବେ ନାହିଁ କହିଥିଲେ । ଧାରକରଜ କରି ୩୦ ହଜାର ଟଙ୍କା ଆୟୁଷୀଙ୍କୁ ଦେଇଥିଲେ କଲ୍ୟାଣୀ । କିନ୍ତୁ ତାପରଠୁ ବର୍ଷା ଫୋନ ଉଠାଉ ନଥିବା ଅଭିଯୋଗ ହୋଇଛି । ପରେ ଆୟୁଷୀଙ୍କୁ ଭୁବନେଶ୍ୱର ଶ୍ରୀୟା ଛକରେ ଦେଖା କରିଥିଲେ ବି ସେ ଗାଳି ଗୁଳଜ କରି ପଳାଇଥିଲେ । ଅଭିଯୋଗ ପରେ ତଦନ୍ତ ଆରମ୍ଭ କରିଛି ସହିଦନଗର ଥାନା ପୋଲିସ । କିନ୍ତୁ ଏନେଇ ବର୍ଷା ପ୍ରିୟଦର୍ଶିନୀଙ୍କ ପ୍ରତିକ୍ରିୟା ମିଳି ପାରି ନାହିଁ ।
