ବିହାର ନିର୍ବାଚନ: ଏନଡ଼ିଏ ଆସନ ବୁଝାମଣା ଚୂଡ଼ାନ୍ତ: ଜେଡ଼ିୟୁକୁ ୧୨୨, ବିଜେପିକୁ ୧୨୧

ପାଟଣା, ୪/୧୦: ବିହାରରେ  ଆଜି ଏନଡିଏ ଆସନ ବୁଝାମଣା ଚୂଡ଼ାନ୍ତ ହୋଇଛି। ସୂଚନା ଅନୁଯାୟୀ, ନୀତୀଶ କୁମାରଙ୍କୁ ଶେଷରେ ବିଜେପି ଆଗରେ ମୁଣ୍ଡ ନୁଆଁଇବାକୁ ପଡ଼ିଛି ଏବଂ ବର୍ତ୍ତମାନ ସେ ୫୦-୫୦ ସୂତ୍ର ଅନୁଯାୟୀ ସିଟ୍ ବାଣ୍ଟିବାକୁ ରାଜି ହୋଇଛନ୍ତି।

ଜନତା ଦଳ (ୟୁନାଇଟେଡ୍) ବିଜେପି ଅପେକ୍ଷା ଅଧିକ ଆସନ ପ୍ରତିଦ୍ୱନ୍ଦ୍ୱିତା କରିବ ବୋଲି ନୀତୀଶ କୁମାର ଗତ କିଛି ଦିନ ଧରି ଜିଦ୍ ଧରିଥିଲେ, କିନ୍ତୁ ଶେଷରେ ତାଙ୍କୁ ଜିଦ୍‌ ଛାଡିବାକୁ ପଡିଛି । ସୂଚନା ଅନୁସାରେ  ଜେଡିୟୁ ୧୨୨ଟି ଆସନ ଏବଂ ଭାରତୀୟ ଜନତା ପାର୍ଟି୧୨୧ ଟି ଆସନରେ ପ୍ରତିଦ୍ୱନ୍ଦ୍ୱିତା କରିବ। ଜେଡିୟୁ ମଧ୍ୟ ବିଜେପିର ଅନେକ ପାରମ୍ପାରିକ ଆସନ ପାଇଁ ଦାବି କରିଥିଲା, କିନ୍ତୁ ବର୍ତ୍ତମାନ ଏହି ଦାବିରୁ ଜେଡ଼ିୟୁୁ ଓହରିଛି।

ନୀତୀଶ କୁମାରଙ୍କ ଦଳ ଏହାର କୋଟାରୁ ଜିତନ ରାମ ମାଞ୍ଝିଙ୍କ ହିନ୍ଦୁସ୍ତାନୀ ଆୱାମ ମୋର୍ଚ୍ଚାକୁ ଆସନ ପ୍ରଦାନ କରୁଥିବାବେଳେ ବିଜେପି ଏହାର କୋଟାରୁ ଲୋକସଭା ପାର୍ଟି (ଏଲଜେପି)କୁ ଆସନ ଦେବ। ଚିରାଗ ପାସୱାନ ଆସନ ବାଣ୍ଟିବା ନେଇ ବହୁତ ଦୃଢ଼ ମନୋଭାବ ପ୍ରଦର୍ଶନ କରିଛନ୍ତି ଏପରିକି ଅଲଗା ନିର୍ବାଚନ ଲଢ଼ିବ ବୋଲିଘୋଷଣା କରିଛନ୍ତି। ଏହି ସ୍ଥିତିରେ ପରବର୍ତୀ ଆସନ ବଣ୍ଟନ ଉପରେ ସମସ୍ତଙ୍କ ଦୃଷ୍ଟି ନିବଦ୍ଧ ହୋଇଛି ।

ଶନିବାର ଅପରାହ୍ନରେ ପାଟନାରେ ବିଜେପି ଓ ଜେଡିୟୁ ମଧ୍ୟରେ ଶେଷ ରାଉଣ୍ଡ ଆଲୋଚନା ହୋଇଥିଲା। ଶନିବାର ଦିନ  ଲଲାନ ସିଂ, ଆରସିପି ସିଂ, ବିଜୟ ଚୌଧୁରୀ ଏବଂ ବିଜନ୍ଦର ଯାଦବଙ୍କ ସହ ୪ ନେତା ଦେବେନ୍ଦ୍ର ଫଡନାଭିସ୍, ଭୁପେନ୍ଦ୍ର ଯାଦବଙ୍କ ସହ ୪ ଘଣ୍ଟିଆ ଦୀର୍ଘ ମାରାଥନ ବୈଠକ କରିଛନ୍ତି।

ଏହି ବୈଠକ ପରେ ଦେବେନ୍ଦ୍ର ଫଡନାଭିସ୍ ଏବଂ ଭୁପେନ୍ଦ୍ର ଯାଦବ ଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି, ଯେଉଁଠାରେ ସିଟ୍ ବଣ୍ଟନ ପ୍ରସଙ୍ଗରେ ବିଜେପି ହାଇକମାଣ୍ଡ ସହ ଆଲୋଚନା ହୋଇଛି। ବିହାରରେ ପ୍ରଥମ ପର୍ଯ୍ୟାୟ ମତଦାନ ପାଇଁ ନାମାଙ୍କନ ପ୍ରକ୍ରିୟା ଅକ୍ଟୋବର ୧ ରୁ ଆରମ୍ଭ ହୋଇଛି। ଅକ୍ଟୋବର ୨୮ ରୁ ବିହାରରେ ତିନିଟି ପର୍ଯ୍ୟାୟରେ ମତଦାନ ଅନୁଷ୍ଠିତ ହେବାକୁ ଥିବାବେଳେ ଫଳାଫଳ ନଭେମ୍ବର ୧୦ ରେ ଆସିବ।