ଅପରାଧୀଙ୍କ ଅଭୟାରଣ୍ୟ ପାଲଟିଛି ନବୀନ ଓଡିଶା: ବିଜେପି

ଭୁବନେଶ୍ୱର,ତା.୧୩/୦୮ ମମିତା ମେହେର, ପରୀ, ଗୋବିନ୍ଦ ସାହୁ ହତ୍ୟା, ମାହାଙ୍ଗା ଟ୍ରିପଲ ମଡର, ଦିବାଲୋକରେ ମନ୍ତ୍ରୀ ନବ ଦାସଙ୍କୁ ହତ୍ୟା ଭଳି ଘଟଣା ରାଜ୍ୟର ବିପର୍ଯ୍ୟସ୍ତ ଆଇନଶୃଙ୍ଖଳାକୁ ପଦାରେ ପକାଇଛି । ମନ୍ତ୍ରୀ ନବ ଦାସଙ୍କ ମୃତ୍ୟୁ ନେଇ ପୋଲିସ ଡିଜି ହାତଟେକି ଦେଇ ଜଗନ୍ନାଥଙ୍କୁ ମନେ ପକାଇଥିଲେ ଯାହା ପ୍ରମାଣିତ କରିଥିଲା ଓଡ଼ିଶାର ପୋଲିସ ପ୍ରଶାସନ କେତେ ଅସହାୟ । ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତିକୁ ସୁଧାରିବା ସହିତ ପୋଲିସ ଓ ପ୍ରଶାସନର କାର୍ଯ୍ୟକୁ ସାଧାରଣ ଲୋକଙ୍କ ପାଖରେ ବିଶ୍ୱସନୀୟ କରିବାରେ ସଂପୂର୍ଣ୍ଣ ବିଫଳ ହୋଇଛନ୍ତି ରାଜ୍ୟ ସରକାର । ଶାସକ ବିଜେଡିର ହାତବାରିସୀ ସାଜି ପୋଲିସ ପ୍ରଶାସନ କାର୍ଯ୍ୟ କରୁଥିବାରୁ ଅପରାଧ ଓ ଅପରାଧୀଙ୍କ ଚରାଭୁଇଁ ପାଲଟିଛି ଓଡିଶା ଏବଂ ଆଇନଶୃଙ୍ଖଳା ପରିସ୍ଥିତି ସଂପୂର୍ଣ୍ଣ ଭୁଷୁଡି ପଡିଛି । ୨୩ ବର୍ଷର ବିଜେଡି ଶାସନରେ “ଅପରାଧୀଙ୍କ ଅଭୟାରଣ୍ୟ ପାଲଟିଛି ନବୀନ ଓଡିଶା’ ବୋଲି ରାଜ୍ୟ କାର୍ଯ୍ୟାଳୟଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖପାତ୍ର ଶ୍ରୀ ଦିଲୀପ ମହାନ୍ତି କହିଛନ୍ତି ।

ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖପାତ୍ର ଶ୍ରୀ ମନୋଜ ମହାପାତ୍ର କହିଲେ ଯେ, ଓଡ଼ିଶା ଲୋକ ସମର୍ଥନ ଦେଇଥିଲେ ମୁଖ୍ୟମନ୍ତ୍ରୀଙ୍କୁ ଶାସନ କରିବା ପାଇଁ କିନ୍ତୁ ଏବେ ବିଜେଡିର ନେତା, ମନ୍ତ୍ରୀ, ସାଂସଦ ଓ ବିଧାୟକମାନେ ରାଜ୍ୟରେ ୫-ଟି ଶାସନ ଚାଲିଛି ଓ ୫-ଟି ବୁଲାଉଥିବା ଅଫିସରଙ୍କୁ ରାଜ୍ୟସାରା ବୁଲାଉଛନ୍ତି । ପ୍ରକୃତରେ ତାହାଲେ ମୁଖ୍ୟମନ୍ତ୍ରୀଙ୍କ ଶାସନ ଚାଲୁନାହିଁ, ଏଠି ୫-ଟିର ଶାସନ ଚାଲିଛି କି ବୋଲି ପ୍ରଶ୍ନ କରିଥିଲେ । ଶ୍ରୀ ମହାପାତ୍ର କହିଲେ ଯେ, ଶାସକ ଦଳର ନେତା, ମନ୍ତ୍ରୀ ଟେଂଟ ବାନ୍ଧୁଛନ୍ତି, ଲୋକ ଯୋଗାଡ କରୁଛନ୍ତି ଓ ୫-ଟି ସଚିବ ଭାଷଣ ଦେଉଛନ୍ତି । ବିଜେଡି ନେତାମାନେ କହୁଛନ୍ତି ୫-ଟି ଶାସନ ଚାଲିଛି । ତାହାଲେ ମୁଖ୍ୟମନ୍ତ୍ରୀ କେବେ ଶାସନ କରିବେ ନା ୫ଜଣଙ୍କୁ ଶାସନ ଠିକାଦେଇ ୫-ଟି ଶାସନର ପ୍ରଚାର କରାଯାଉଛି ବୋଲି କଟାକ୍ଷ କରିଛନ୍ତି ।
ଓଡ଼ିଶାରେ ଏବେ ଅରାଜକତା ସମସ୍ତ ସୀମା ଉଲ୍ଲଂଘନ କରିଛି । ଗତକାଲି ରାଜଧାନୀ ଭୁବନେଶ୍ୱର ମାଷ୍ଟର କ୍ୟାଂଟିନ ଛକରେ ଜଣେ ଯୁବକଙ୍କୁ ଗୋଡାଇ ଗୋଡାଇ ହାଣିବାର ଚିତ୍ର ସାମ୍ନାକୁ ଆସିଛି, ଯାହାକି ଅତ୍ୟନ୍ତ ଚିନ୍ତାଜନକ । ପ୍ରତିଦିନ ଖବରକାଗଜ ଓ ଗଣମାଧ୍ୟମରେ ଭୟଙ୍କର ଆଇନଶୃଙ୍ଖଳା ଘଟଣାମାନ ସାମ୍ନାକୁ ଆସୁଛି । ଗତ କିଛି ଦିନ ତଳେ ଭୁବନେଶ୍ୱର ୟୁନିଟ-୧ ଅଂଚଳର ଜଣେ ନାବାଳିକା ପୀଡିତାର ଅଭିଯୋଗକୁ ପୋଲିସ କର୍ତୃପକ୍ଷ ଅବହେଳା କରିଥିବା କାରଣରୁ ଅଭିଯୁକ୍ତର କ୍ରୋଧର ଶିକାର ହୋଇ ପୀଡିତାର ଦାଦାଙ୍କ ପ୍ରାଣ ଚାଲିଗଲା । ବାସ୍ତବରେ ନବୀନ ଶାସନରେ ପୋଲିସ ତଦନ୍ତରେ ପକ୍ଷପାତିତା କାରଣରୁ ପ୍ରକୃତ ଦୋଷୀ ଖସିଯାଉଛି ଏବଂ ନିର୍ଦୋଷ ଦଣ୍ଡିତ ହେଉଛି । ଶାସକ ବିଜେଡିର ନେତା ଓ ମନ୍ତ୍ରୀଙ୍କ ଦ୍ୱାରା ନିର୍ଯ୍ୟାତନା ପାଇ ଅନେକ ମା ଓ ଭଉଣୀ ପ୍ରାଣ ହରାଇବାର ଅନେକ ଘଟଣା ପ୍ରମାଣ ସହିତ ରହିଛି । ମାତ୍ର ମୁଖ୍ୟମନ୍ତ୍ରୀ ଅପରାଧ ଓ ଅପରାଧୀଙ୍କୁ ସୁରକ୍ଷା ଦେଇ ଚାଲିଛନ୍ତି । ଏହି କାରଣରୁ ଓଡିଶାରେ ଦଣ୍ଡବିଧାନ ହାର ମାତ୍ର ୫ ପ୍ରତିଶତ ଏବଂ ଏହା ସମଗ୍ର ଦେଶରେ ସର୍ବନିମ୍ନ ବୋଲି ଶ୍ରୀ ମହାପାତ୍ର କହିଛନ୍ତି ।
ମନ୍ତ୍ରୀ ନବ ଦାସ ହତ୍ୟାକାଣ୍ଡ, ମମିତା ମେହେର ହତ୍ୟାକାଣ୍ଡ, ପରୀ ହତ୍ୟାକାଣ୍ଡ ଭଳି ଏକାଧିକ ଆଇନଶୃଙ୍ଖଳା ପ୍ରସଙ୍ଗରେ ଭାରତୀୟ ଜନତା ପାର୍ଟୀ ରାଜ୍ୟ ସରକାରଙ୍କୁ ପ୍ରଶ୍ନ ପଚାରୁଥିବାବେଳେ ଶାସକ ଦଳର ପ୍ରବକ୍ତାମାନେ ଜବାବ୍ ରଖିବା ପରିବର୍ତେ “ଗୋଲାପି ଗପ” କହି ଲୋକଙ୍କୁ ଭୂଆଁ ବୁଲାଉଛନ୍ତି । ମମିତା ମେହେର ହତ୍ୟାକାଣ୍ଡର ମୁଖ୍ୟ ଆସାମୀ ଗୋବିନ୍ଦ ସାହୁର ଜେଲ୍ ଭିତରେ ମୃତ୍ୟୁ; ମିଡିଆ ରିପୋର୍ଟ ଅନୁଯାୟୀ ନବ ଦାସ ହତ୍ୟାକାଣ୍ଡରେ ପ୍ରଥମ ସାକ୍ଷୀ ଭାବେ ଖୋଦ୍ ମୃତ ନବ ଦାସଙ୍କୁ ସ୍ଥାନିତ କରାଯିବା; ଫିରିଙ୍ଗିଆ ଘଟଣାର ମୁଖ୍ୟ ଅଭିଯୁକ୍ତ ତଥା ଥାନାଧିକାରୀଙ୍କ ବିରୋଧରେ ଫୋଜଧାରୀ ମାମଲା ରୁଜୁ ନକରି କେବଳ ସସ୍ପେଣ୍ଡ କରିଦେବା ଭଳି ଅନେକ ସ୍ପର୍ଶକାତ ପ୍ରସଙ୍ଗରେ ରାଜ୍ୟ ସରକାରଙ୍କ ନୀରବତା ଆଗାମୀ ଦିନରେ ବିସ୍ପୋରଣ ହେବ ବୋଲି ଶ୍ରୀ ମହାପାତ୍ର ଚେତାଇ ଦେଇଛନ୍ତି ।
ଓଡ଼ିଶାର ଲୋକେ ଭୋଟ ଦେଇଥିଲେ ମୁଖ୍ୟମନ୍ତ୍ରୀଙ୍କୁ କିନ୍ତୁ ସେ ଏବେ ଶାସନ ବ୍ୟବସ୍ଥାରେ ନାହାନ୍ତି ଏବଂ ସଚିବଙ୍କୁ ଖୁସି କରିବା ପାଇଁ ୫-ଟି ଶାସନ ବ୍ୟବସ୍ଥାର ଡିଣ୍ଡିମ ପିଟୁଛନ୍ତି ଶାସକ ବିଜେଡିର ବିଧାୟକ, ମନ୍ତ୍ରୀ ଓ ନେତାମାନେ । ୫-ଟି ଅର୍ଥାତ୍ ଜଣେ ଆଇଏଏସ, ଜଣେ ଆଇପିଏସ, ଆତ୍ମଘୋଷିତ ସେକେଣ୍ଡ ଇନ୍ କମାଣ୍ଡ୍ ଜଣେ ବିଧାୟକ, ସାଂସଦ ଓ ଖଣି ମାଫିଆଙ୍କ ଭଳି ୫ ଠିକାଦାରଙ୍କ ହାତରେ ଓଡିଶାର ଶାସନ ବ୍ୟବସ୍ଥାକୁ ଟେକି ଦିଆଯିବା ଓଡିଶା ଓ ଓଡିଶାବାସୀଙ୍କ ପାଇଁ ଆଦୌ ଶୁଭଙ୍କର ନୁହେଁ ବୋଲି ଶ୍ରୀ ମହାପାତ୍ର କହିଛନ୍ତି । ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ଗଣମାଧ୍ୟ ସହମୁଖ୍ୟ ସୁଜିତ୍ କୁମାର ଦାସ ଉପସ୍ଥିତ ଥିଲେ ।