କ୍ଲାସରୁମକୁ ମୋବାଇଲ ନେଇ ପାରିବେନି ଶିକ୍ଷକ !

ଭୁବନେଶ୍ବର: କ୍ଲାସରୁମକୁ ଯିବା ବେଳେ ଶିକ୍ଷକ ନେଇ ପାରିବେନି ମୋବାଇଲ । ଯଦି ନେବେ ତେବେ ଫୋନ୍ ସୁଇଚ୍ ଅଫ୍ କରିବେ । ପିଲାଙ୍କ ପାଠବଢ଼ା ବେଳେ ବନ୍ଦ ରହିବ ଶିକ୍ଷକଙ୍କ ମୋବାଇଲ ଫୋନ । ପିଲାଙ୍କ ପାଠପଢ଼ାକୁ ନେଇ ଏମିତି କିଛି ନିୟମ ଆଣିବାକୁ ବିଚାର କରୁଛନ୍ତି ରାଜ୍ୟ ସରକାର । ସୂଚନା ଦେଲେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ।

ନୂଆବର୍ଷ ଅଭିନନ୍ଦନ ଜଣାଇବା ସହ ମନ୍ତ୍ରୀ ଶିକ୍ଷକଙ୍କୁ ତାଗିଦ କରି କ୍ଲାସରୁମକୁ ଫୋନ ନେବା ଅନୁଚିତ ବୋଲି କହିଛନ୍ତି । କ୍ଲାସରୁମକୁ ଶିକ୍ଷକ ମୋବାଇଲ ନେଇ ଯାଇପାରିବେନି ବୋଲି ସମ୍ବଲପୁର ଡିଇଓ ନିର୍ଦ୍ଦେଶ ଦେଇଛନ୍ତି । ଏହାକୁ ନେଇ ମନ୍ତ୍ରୀ କହିଛନ୍ତି, ‘ସମ୍ବଲପୁର ଡିଇଓ ଯେଉଁ ନିଷ୍ପତ୍ତି ନେଇଛନ୍ତି, ତାହା ଭଲ। ଆଗମୀ ଦିନରେ ଏହା ସାରା ରାଜ୍ୟରେ ଲାଗୁ କରିବାକୁ ଵିଚାରବିମର୍ଶ ଚାଲିଛି। ବିଦ୍ୟାଳୟକୁ ଫୋନ ନେବାକୁ ମନା ନାହିଁ, ହେଲେ କ୍ଲାସରୁମକୁ ନୁହେଁ। କ୍ଲାସରୁମକୁ ଫୋନ ନେବାର କିଛି ଆବଶ୍ୟକତା ନାହିଁ। ପାଠପଢ଼ା ସମୟରେ ଫୋନ ଆସିବା ଦ୍ବାରା ଶିକ୍ଷାଦାନ ବ୍ୟାଘାତ ହେଉଛି ।’