ପୁଣି ମହଙ୍ଗା ହେଲା CNG, ୧୦ ମାସରେ ୧୪ ଥର ଦାମ୍ ବୃଦ୍ଧି
ନୂଆଦିଲ୍ଲୀ ୨୮/୧୧: ପେଟ୍ରୋଲ୍ ଡିଜେଲ୍ର ବିକଳ୍ପ ଭାବେ ଯେଉଁ ଇନ୍ଧନ ବ୍ୟବହାର କରିବାକୁ ସରକାର ପରାମର୍ଶ ଦେଉଛନ୍ତି ତାହାର ମଧ୍ୟ ଦର ବୃଦ୍ଧି ଚିନ୍ତାର କାରଣ ପାଲଟିଛି । ବିଶେଷ କରି ପେଟ୍ରୋଲ-ଡିଜେଲ୍ ବିନା ଅନ୍ୟ ଇଞ୍ଜିନ୍ ସିଏନଜିରେ ଚାଲୁଛି। କିନ୍ତୁ ଏହି ସିଏନଜିର ଦାମ ସରକାର ଲଗାତାର ବଢ଼ାଇ ଚାଲିଛନ୍ତି । ମୁମ୍ବାଇରେ ପୁଣି ଏହାର ଦାମ ବଢ଼ିଛି।
କଂପ୍ରେସଡ୍ ନ୍ୟାଚୁରାଲ୍ ଗ୍ୟାସ୍ (ସିଏନଜି) କିଲୋ ପ୍ରତି ୩.୯୬ ଟଙ୍କା ବୃଦ୍ଧି ପାଇ ୬୧.୫ ଟଙ୍କା ହୋଇଛି। ଏହି ନୂଆ ଦାମ ଶନିବାରଠୁ ଲାଗୁ ହୋଇଛି। ୨ ମାସ ମଧ୍ୟରେ ତୃତୀୟ ଥର ସିଏନଜି ଦାମ୍ ବୃଦ୍ଧି ହୋଇଛି । ୧୦ ମାସ କଥା କହିଲେ ସିଏନଜି ଦାମ୍ ୧୪ ଥର ବଢ଼ିଛି । ପେଟ୍ରୋଲ ଏବଂ ଡିଜେଲ୍ର ବ୍ୟବହାର ଯୋଗୁଁ ବାୟୁ ପ୍ରଦୂଷଣ ବଢ଼ୁଥିବାରୁ ସିଏନଜି ସବୁଠୁ ଭଲ ଗ୍ରୀନ୍ ଇନ୍ଧନ ।
ପେଟ୍ରୋଲ୍ ଏବଂ ଡିଜେଲ୍ ଦାମ ତୁଳନାରେ ସିଏନଜିର ଦାମ କମ୍ ରହିଛି । ମୁମ୍ବାଇରେ ପେଟ୍ରୋଲ ଦର ୧୦୦ ଟଙ୍କା ଅତିକ୍ରମ କରିଯିବା ପରେ ଅନେକ ଅଟୋ, ଟ୍ୟାକ୍ସି, ଟ୍ରକ୍ ଆଦି ସିଏନଜିକୁ ପରିବର୍ତ୍ତିତ ହୋଇଛି। କିନ୍ତୁ ପୁଣି ଥରେ ସିଏନଜି ଦାମ ବୃଦ୍ଧି ସାଧାରଣ ଲୋକଙ୍କ ପାଇଁ ଚିନ୍ତାର କାରଣ ପାଲଟିଛି।