ପୁଲିସ ଉପସ୍ଥିତିରେ ପୁଣି ସଂସଦ ଉପରେ ହେବ ଆକ୍ରମଣ!

ନୂଆଦିଲ୍ଲୀ: ସଂସଦ ଭବନର ସୁରକ୍ଷା ଉଲ୍ଲଂଘନ ମାମଲାରେ ଦିଲ୍ଲୀ ପୁଲିସ୍ ସ୍ପେଶାଲ୍ ସେଲର କାଉଣ୍ଟର ଇଣ୍ଟେଲିଜେନ୍ସ ଲୋକସଭା ବାଚସ୍ପତିଙ୍କୁ ଚିଠି ଲେଖି କ୍ରାଇମ ସିନ ରିକ୍ରିଏସନ ପାଇଁ ଅନୁମତି ମାଗିଛି। ଦିଲ୍ଲୀ ପୁଲିସ ସଂସଦ ଭିତରେ ଏବଂ ବାହାରେ କ୍ରାଇମ ସିନ ରିକ୍ରିଏସନ କରିବାକୁ ଚାହୁଁଛି, ଯାହା ଦ୍ୱାରା ଅଭିଯୁକ୍ତଙ୍କ ଦ୍ୱାରା କରାଯାଇଥିବା ଘଟଣା ସମ୍ପର୍କରେ ସଠିକ୍ ସୂଚନା ମିଳିପାରିବ। ସଂସଦ ସଚିବାଳୟର ଅନୁମତି ପାଇବା ପରେ ଦିଲ୍ଲୀ ପୁଲିସ କ୍ରାଇମ ସିନ ରିକ୍ରିଏସନ କରିବାରେ ସକ୍ଷମ ହେବ। ଅନ୍ୟପକ୍ଷରେ ଦିଲ୍ଲୀ ପୁଲିସ ଖୁବ ଶୀଘ୍ର କର୍ଣ୍ଣାଟକର ମହୀଶୂରରୁ ବିଜେପି ସାଂସଦ ଥିବା ପ୍ରତାପ ସିନ୍ହାଙ୍କ ବିବୃତ୍ତି ମଧ୍ୟ ରେକର୍ଡ କରିବ। ଯେତେବେଳେ ଦିଲ୍ଲୀ ପୁଲିସ ତାଙ୍କ ସହ ଯୋଗାଯୋଗ କରିଥିଲା, ସେ କହିଛନ୍ତି ଯେ ଆସନ୍ତା ସପ୍ତାହରେ ସେ ତାଙ୍କ ବାସଭବନରେ ଏବାବଦରେ କହିବେ | ସେ ଆସନ୍ତା ସପ୍ତାହରେ ଦିଲ୍ଲୀରେ ଥିବା ତାଙ୍କ ବାସଭବନକୁ ଫେରିବେ।

ବ୍ୟକ୍ତିଗତ ସହାୟକ ଦ୍ୱାରା ପାସ୍ ଦିଆଯିବା ପରେ ଦୁଇ ଅଭିଯୁକ୍ତ ସାଗର ଶର୍ମା ଏବଂ ମନୋରଂଜନ ସଂସଦ ଭବନରେ ପ୍ରବେଶ କରିବାରେ ସଫଳ ହୋଇଥିଲେ। ଅନ୍ୟପଟେ ସଂସଦ ସୁରକ୍ଷା ଭଙ୍ଗ ମାମଲାର ଷଷ୍ଠ ଅଭିଯୁକ୍ତ ମହେଶ କୁମାଓ୍ଵତଙ୍କୁ ଶନିବାର ଦିଲ୍ଲୀ ପୁଲିସ ଗିରଫ କରିଛି। ଉଲ୍ଲେଖ ଥାଉ କି ୨୦୦୧ ସଂସଦ ଆତଙ୍କବାଦୀ ଆକ୍ରମଣର ବାର୍ଷିକୀ ଅବସରରେ ବୁଧବାର ଦିନ ଦୁଇ ଜଣ ସାଗର ଶର୍ମା ଓ ମନୋରଂଜନ ଡି. ଶୂନ୍ୟକାଳରେ ଦର୍ଶକ ଗ୍ୟାଲେରୀରୁ ଲୋକସଭା ଭିତରକୁ ଡେଇଁ ହଳଦିଆ ଧୂଆଁ ଛାଡିଥିଲେ । ଏହାକୁ ନେଇ ସାରା ଦେଶରେ ଚହଳ ପଡ଼ିଯାଇଥିଲା । ଘଟଣା ପରେ ତୁରନ୍ତ ଉଭୟଙ୍କୁ ଗିରଫ କରାଯାଇଥିଲା। ଠିକ ସେହି ସମୟରେ ସଂସଦ ଭବନ ବାହାରେ ଅମୋଲ ସିନ୍ଦେ ଓ ନୀଲମ ଦେବୀ ଲାଲ ଓ ହଳଦିଆ ଧୂଆଁ ଛାଡ଼ି ‘ଏକଛତ୍ରବାଦ ଚାଲିବ ନାହିଁ’ ବୋଲି ସ୍ଲୋଗାନ ଦେଇଥିଲେ। ଏହି ୪ ଜଣଙ୍କ ଗିରଫଦାରିର ୨ ଦିନ ପରେ ଅନ୍ୟତମ ମୁଖ୍ୟ ଅଭିଯୁକ୍ତ ଲଲିତ ଝା ଗିରଫ ହୋଇଥିଲା ।