ଗୋବିନ୍ଦପୁର ଫାଣ୍ଡି ନିକଟରୁ ସନ୍ଦେହ ଜନକ ଭାବେ କାର ଓ ବୁଲେଟ ଜବତ କଲା ପୋଲିସ, ୪ ଯୁବକ ଅଟକ

ଢେଙ୍କାନାଳ, ୧୨।୦୧: ଢେଙ୍କାନାଳ ଜିଲ୍ଲା ରାସୋଳ ସ୍ଥିତ ଓଡିଶା ଗ୍ରାମ୍ୟବ୍ୟାଙ୍କ ଡକାୟତି ଘଟଣାରେ ପୋଲିସ ସନ୍ଦେହ ଜନକ ଭାବେ ଏକ ସ୍ୱିଫ୍ଟ କାର ଓ ବୁଲେଟକୁ ଜବତ କରିଛି । ଏହି କାର ଓ ବୁଲେଟକୁ ଢେଙ୍କାନା ଳ ଗୋବିନ୍ଦପୁର ଫାଣ୍ଡି ପୋଲିସ ଧରିବାରେ ସକ୍ଷମ ହୋଇଛି । କାର ଭିତରୁ କିଛି ସୁନା ଅଳଙ୍କାର ଓ ଟଙ୍କା ମଧ୍ୟ ପୋଲିସ ଉଦ୍ଧାର କରିଥିବା ସୂଚନା ମିଳିଛି । ତେବେ କେତେ ଓଜନର ଅଳଙ୍କାର ଓ କେତେ ପରିମାଣର ଟଙ୍କା ତାହା ତଦନ୍ତ ପରିସରରେ ଥିବାରୁ ପୁଲିସ ଗୋପନ ରଖିଛି । ଏ ସମ୍ପର୍କରେ ପୋଲିସ ତିନି ଜଣଙ୍କୁ ଅଟକ ରଖି ପଚରା ଉଚରା ଜାରି ରଖିଛି ।

ସୂଚନା ଥାଉକି,  ସେପଟେ ରାସୋଳ ସ୍ଥିତ ଓଡିଶା ଗ୍ରାମ୍ୟ ବ୍ୟାଙ୍କରେ ଆଜି ଅପରାହ୍ନ ପ୍ରାୟ ସାଢ଼େ ତିନିଟା ସମୟରେ ଦୁଇଟି ବୁଲେଟରେ ୪ଜଣ ମୁଖା ପିନ୍ଧା ଦୁର୍ବୁତ୍ତ ପିସ୍ତଲ ଓ ଛୁରି ଧରି କର୍ମଚାରୀଙ୍କୁ ଭୟଭୀତ କରିଥିଲେ । ପରେ ଲକର ଖୋଲି ପ୍ରାୟ ୭ଲକ୍ଷ ଟଙ୍କା ଓ କୋଟିଏ ଟଙ୍କାର ସୁନା ଅଳଙ୍କାର ଲୁଟିନେଇ ପଳାଇଯାଇଥିଲେ । ଫଳରେ ଏହି ଡକାୟତି ଘଟଣାରେ ଜିଲ୍ଲା ବ୍ୟାପି ପୋଲିସକୁ ଆଲର୍ଟ କରାଯାଇଥିଲା । ଏପରିସ୍ଥିତିରେ  ଗୋବିନ୍ଦ ପୁର ଫାଣ୍ଡି ନିକଟରେ ଏହି କାର ଉପରେ ସନ୍ଦେହ ହେବାରୁ ପୋଲିସ ଚଢ଼ାଉ କରିଥିଲେ ।

ତେବେ କାର ଭିତରେ ଥିବା ତିନିଜଣ ଦୁର୍ବୁତ୍ତ ପଳାଇଯାଇଥିଲେ । ଫଳରେ ପୁଲିସ ଗୋଡ଼ାଇ ଜଣଙ୍କୁ କାବୁ କରିଥିଲା । ପରେ ଏହି ଯୁବକଙ୍କ ଠାରୁ ସୂଚନା ପାଇ ଆଉ ଦୁଇଜଣଙ୍କୁ ପୋଲିସ କାବୁ କରିବା ସହ ଏକ ବୁଲେଟ ମଧ୍ୟ ଜବତ କରିଛି । ଏହି କାର ଭିତରୁ ରାସୋଳ ଗ୍ରାମ୍ୟ ବ୍ୟାଙ୍କରୁ ଲୁଟକରିଥିବା ଟଙ୍କା ଓ ସୁନା ମଧ୍ୟ ପୋଲିସ ଉଦ୍ଧାର କରିଛି । ଲୁଟେରା ମାନେ ସ୍ଥାନୀୟ ଗୋବିନ୍ଦପୁର ଅଂଚଳର ବୋଲି ସନ୍ଦେହ କରାଯାଇଛି । ଜବତ ସ୍ୱିଫ୍ଟ ଡିଜାୟାର କାର ଢେଙ୍କାନାଳ ଅଂଚଳର । ଢେଙ୍କାନାଲ ଏସ୍‌ଡିପିଓ ପହଂଚି ଏହି ଘଟଣାରେ ତନାଘନା ଆରମ୍ଭ କରିଛନ୍ତି ।