ପ୍ରଧାନମନ୍ତ୍ରୀ ମୋଦୀଙ୍କ ଜନ୍ମଦିନରେ ଟୁଇଟରରେ ଟ୍ରେଣ୍ଡ କଲା #ନ୍ୟାସନାଲଅନଏମ୍ପଲଏମେଣ୍ଟଡେ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆଜି ହେଉଛି ୭୦ ତମ ଜନ୍ମଦିନ । ବିଶ୍ୱର ଲୋକପ୍ରିୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ୭୦ ବର୍ଷ ବୟସରେ ପାଦ ଥାପିଛନ୍ତି । ଏହି ଅବସରରେ ତାଙ୍କୁ ଦେଶ ବିଦେଶରୁ ଜଣାଶୁଣା ବ୍ୟକ୍ତିମାନେ ଶୁଭେଚ୍ଛା ଜଣାଇଛନ୍ତି । ହେଲେ କିଛି ଯୁବପିଢ଼ି ଟୁଇଟରରେ #ନ୍ୟାସନାଲଅନଏମ୍ପଲଏମେଣ୍ଟଡେ ଅଭିଯାନ ଆରମ୍ଭ କରିଛନ୍ତି। ଟୁଇଟରରେ ଏବେ #ନ୍ୟାସନାଲଅନଏମ୍ପଲଏମେଣ୍ଟଡେ ଟ୍ରେଣ୍ଡ କରୁଛି।ଟ୍ୱିଟରରେ କିଛି ବ୍ୟବହାରକାରୀ ଆଜି ସର୍ବନିମ୍ନ ଜିଡିପି (-୨୩.୯%), ସ୍ୱଳ୍ପ ଚାଷ ଆୟ, ଉଚ୍ଚ ଜିଏସ୍ଟି, ପେଟ୍ରୋଲ ମୂଲ୍ୟ ବୃଦ୍ଧି ଇତ୍ୟାଦି ଦର୍ଶାଇ ପ୍ରଧାନମନ୍ତ୍ରୀଙ୍କୁ ଟୁଇଟ କରିଛନ୍ତି ଯେ, “ଆମେ ପ୍ରଧାନମନ୍ତ୍ରୀଙ୍କୁ ଅସମ୍ମାନ କରୁନାହୁଁ। ଦେଶରେ ବେକାରୀ ସମସ୍ୟା ପ୍ରତି ପ୍ରଧାନମନ୍ତ୍ରୀ ଧ୍ୟାନ ଦିଅନ୍ତୁ ବୋଲି ଆମେ ଚାହୁଁଛୁ। ତେଣୁ ବେକାରୀ ସମସ୍ୟାକୁ ନେଇ ଜାଗ୍ରତ ହୁଅ ଏବଂ ଜୁମ୍ଲା ବନ୍ଦ କର। ଅନ୍ୟ ଜଣେ ଟ୍ୱିଟ୍ କରି କହିଛନ୍ତି ଯେ, କୋଭିଡ-୧୯ ମହାମାରୀ ଅପେକ୍ଷା ବେକାରୀ ସମସ୍ୟା ଅଧିକ ବିପଜ୍ଜନକ ଅଟେ। ରୋଜଗାର ହେଉଛି ଯୁବକମାନଙ୍କ ଅଧିକାର | ସେମାନେ ସେମାନଙ୍କର ଅଧିକାର ପାଇଁ ଲଢ଼ିବେ। ଜୁମଲାବାଜୀ ବନ୍ଦ କର, ରୋଜଗାର ଦିଅ। ଦେଶର ଯୁବପିଢ଼ିଙ୍କ ସହ କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ନ୍ୟାସନାଲଅନଏମ୍ପଲଏମେଣ୍ଟଡେ ଅଭିଯାନରେ ସାମିଲ ହୋଇ ଚାକିରି ସୁଯୋଗ ସୃଷ୍ଟି କରିବା ପାଇଁ ଟୁଇଟ୍ କରିଥିଲେ। ଦେଶର ବିଭିନ୍ନ ସ୍ଥାନରେ ବେରୋଜଗାର ଦିବସ ପାଳନ କରାଯାଇଥିବା ବେଳେ ଭୁବନେଶ୍ବରରେ ମଧ୍ୟ ଯୁବ କଂଗ୍ରେସ ବେରୋଜଗାର ଦିବସ ପାଳନ କରିଥିବା ଦେଖାଯାଇଛି।