ଜେଇଇ ପାଇଁ 3ରୁ ପଞ୍ଜୀକରଣ
ଭୁବନେଶ୍ବର ସମେତ ଦେଶରେ ଥିବା 23ଟି ଆଇଆଇଟି ଓ ଧାନବାଦସ୍ଥିତ ଇଣ୍ଡିଆନ୍ ସ୍କୁଲ ଅଫ୍ ମାଇନ୍ସ(ଆଇଏସ୍ଏମ୍)ରେ ନାମଲେଖା ପାଇଁ ମେ’ 27ରେ ଜେଇଇ ଆଡଭାନ୍ସଡ୍ ଅନୁଷ୍ଠିତ ହେବ। ଏଥିପାଇଁ ମେ’ ୩ରୁ ଅନ୍ଲାଇନ୍ ପଞ୍ଜୀକରଣ ଆରମ୍ଭ ହୋଇ ମେ’ 9 ପର୍ଯ୍ୟନ୍ତ ଚାଲିବ। ଜେଇଇ ମେନ୍ର ଶ୍ରେଷ୍ଠ 2ଲକ୍ଷ 45 ହଜାର ରୢାଙ୍କ ହାସଲ କରିଥିବା ଛାତ୍ରଛାତ୍ରୀ ଜେଇଇ ଆଡଭାନ୍ସଡ୍ ପାଇଁ ନାମ ପଞ୍ଜୀକରଣ କରିପାରିବେ। ଯେଉଁମାନେ ନାମ ପଞ୍ଜୀକରଣ କରିଥିବେ, ସେମାନେ ମେ’ 10 ତାରିଖ ସନ୍ଧ୍ୟା 5ଟା ସୁଦ୍ଧା ଫି’ ଦାଖଲ କରିପାରିବେ। ମେ’ 20ରୁ ଆଡମିଟ୍ କାର୍ଡ ଡାଉନ୍ଲୋଡ୍ କରିହେବ ବୋଲି ବିଜ୍ଞପ୍ତି ପ୍ରକାଶ ପାଇଛି।
ତେବେ ଏପ୍ରିଲ ମାସରେ ଅନୁଷ୍ଠିତ ଜେଇଇ ମେନ୍ ରେଜଲ୍ଟ ଏପର୍ଯ୍ୟନ୍ତ ପ୍ରକାଶ ପାଇ ପାରିନଥିବାରୁ ଛାତ୍ରଛାତ୍ରୀଙ୍କ ଚିନ୍ତା ବଢ଼ିଛି। କେବେ ପରୀକ୍ଷା ଫଳ ପ୍ରକାଶ ପାଇବ, ତାହାକୁ ଚାହିଁ ବସିଛନ୍ତି। ଗତ ଜାନୁଆରି ମାସରେ ଅନୁଷ୍ଠିତ ହୋଇଥିବା ଜେଇଇ ମେନ୍ ପରୀକ୍ଷା ଫଳ ନିର୍ଦ୍ଧାରିତ ସମୟରେ ପ୍ରକାଶ ପାଇଥିଲା। ଗତ ଏପ୍ରିଲ 7 ରୁ 12ତାରିଖ ପର୍ଯ୍ୟନ୍ତ ଜେଇଇ ମେନ୍ ପରୀକ୍ଷା ଅନୁଷ୍ଠିତ ହୋଇଥିଲା। ଏପ୍ରିଲ 20 ସୁଦ୍ଧା ଫଳ ପ୍ରକାଶ ପାଇବା କଥା। କିନ୍ତୁ ଏଥର ବିଳମ୍ବ ହୋଇଛି। ଜେଇଇ ମେନ୍ ପରୀକ୍ଷା ପରିଚାଳନା କରୁଥିବା ନ୍ୟାସନାଲ ଟେଷ୍ଟିଂ ଏଜେନ୍ସି (ଏନ୍ଟିଏ)ର ସୂଚନା ଅନୁଯାୟୀ, ନିର୍ବାଚନ ପ୍ରକ୍ରିୟା ଚାଲିଥିବାରୁ ପରୀକ୍ଷା ଫଳ ପ୍ରକାଶ ପାଇବାରେ ବିଳମ୍ବ ହେଉଛି। ଆସନ୍ତା 30 ତାରିଖରେ ଫଳ ପ୍ରକାଶ ପାଇପାରେ।