ଉତ୍ତର ପ୍ରଦେଶ ନିର୍ବାଚନ: କେଉଁଠୁ ଲଢିବେ ଯୋଗୀ ଆଦିତ୍ୟନାଥ ?

ଲକ୍ଷ୍ନୌ,୧୨/୦୧:  ଆସନ୍ତା ବିଧାନସଭା ନିର୍ବାଚନରେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କେଉଁ ଆସନରୁ ଲଢିବେ ନିର୍ବାଚନ ? କେଉଁ ଆସନରୁ ଯୋଗୀଙ୍କୁ ମୈଦାନକୁ ଓହ୍ଲାଇବାକୁ ଚିନ୍ତା କରୁଛି ଗେରୁଆ ଦଳ ? ଏହାକୁ ନେଇ କଳ୍ପନାଜଳ୍ପନା ଜାରି ରହିଛି । ତେବେ ଏହାରି ଭିତରେ ଯୋଗୀ ଆଦିତ୍ୟନାଥ ଅଯୋଧ୍ୟାରୁ ନିର୍ବାଚନ ଲଢିପାରନ୍ତି ବୋଲି ଖବର ସାମ୍ନାକୁ ଆସିଛି । ଯୋଗୀ ଆଦିତ୍ୟନାଥ ୨୦୨୨ର ବିଧାନସଭା ନିର୍ବାଚନ ଅଯୋଧ୍ୟରୁ ଲଢିପାରିନ୍ତି।

ବିଜେପିର କେନ୍ଦ୍ରୀୟ ନେତୃମଣ୍ଡଳ ଏହା ଉପରେ ବିଚାର କରୁଥିବା ଜଣାପଡିଛି । ଦଳୀୟ ନେତାଙ୍କ ମତ, ଅଯୋଧ୍ୟା ହିନ୍ଦୁତ୍ୱ ଏବଂ ବିକାଶ ଉଭୟର ମଡେଲ୍। ଏଥିପାଇଁ ମୁଖ୍ୟମନ୍ତ୍ରୀଙ୍କୁ ସେଠାରୁ ନିର୍ବାଚନ ଲଢିବା ଦରକାର । ଏହାଦ୍ୱାରା ଏହି ଅଞ୍ଚଳ ସହ ସାରା ରାଜ୍ୟରେ ଏକ ସକାରାତ୍ମକ ବାର୍ତ୍ତା ଯିବ । ତେବେ ଯୋଗୀ ଆଦିତ୍ୟନାଥ କେଉଁଠାରୁ ନିର୍ବାଚନ ଲଢିବେ ଏହାର ନିଷ୍ପତ୍ତି ବିଜେପିର କେନ୍ଦ୍ରୀୟ ନିର୍ବାଚନ କମିଟି ହିଁ ନେବ ।

ଏହା ପୂର୍ବରୁ ଯୋଗୀ ଆଦିତ୍ୟନାଥ ମଥୁରାରୁ ନିର୍ବାଚନ ଲଢିବା ନେଇ ମଧ୍ୟ ଚର୍ଚ୍ଚା ଜୋର ଧରିଥିଲା। କିନ୍ତୁ ବୁଧବାର ଏହି ଚର୍ଚ୍ଚା ଉପରେ ବିରାମ ଲାଗିଥିଲା ଏବଂ ଯୋଗୀ ମଥୁରାରୁ ନିର୍ବାଚନୀ ମୈଦାନକୁ ଓହ୍ଲାଇବେ ନାହିଁ ବୋଲି ସ୍ପଷ୍ଟ ହୋଇଥିଲା।