ସ୍ୱର୍ଗତଃ ବିଷ୍ଣୁ ସେଠୀଙ୍କ ଅସ୍ଥି କଳସ ବିସର୍ଜନ ଯାତ୍ରାରେ ଯୋଗ ଦେଲେ ରାଜ୍ୟ ସଭାପତି

ଭୁବନେଶ୍ୱର/ ଭଦ୍ରକ, ତା.୧୦/୦୯: ସ୍ୱର୍ଗତଃ ବିିଷ୍ଣୁ ସେଠୀ ସୁସଙ୍ଗଠକ ଥିଲେ ଓ ଦୀର୍ଘ ୩୦ବର୍ଷରୁ ଊର୍ଦ୍ଧ୍ୱ ସମୟ ଭାରତୀୟ ଜନତା ପାର୍ଟି ସହ କାର୍ଯ୍ୟ କରିଛନ୍ତି । ଭଦ୍ରକ ଅଂଚଳର ବିକାଶ ପାଇଁ ବହୁ ପଦକ୍ଷେପ ନେଇଥିଲେ । ସ୍ୱର୍ଗତଃ ସେଠୀ ଜଣେ ଜନନେତା ଥିବାରୁ ଭଦ୍ରକବାସୀ ତଥା ଓଡ଼ିଶାବାସୀଙ୍କ ମନରେ ଚିରସ୍ମରଣୀୟ ହୋଇ ରହିଛନ୍ତି । ସ୍ୱର୍ଗତଃ ସେଠୀଙ୍କ କାର୍ଯ୍ୟ ଆମ ସମସ୍ତଙ୍କ ପାଇଁ ପ୍ରେରଣା ହୋଇ ରହିବ ବୋଲି ରାଜ୍ୟ ସଭାପତି ଶ୍ରୀ ମନମୋହନ ସାମଲ କହିଛନ୍ତି ।

ଦିବଙ୍ଗତ ନେତା ସ୍ୱର୍ଗତଃ ବିଷ୍ଣୁ ସେଠୀଙ୍କ ଆଜି ପ୍ରଥମ ଶ୍ରାଦ୍ଧବାର୍ଷିକ । ଏହି ଉପଲକ୍ଷେ ଭଦ୍ରକ ଜିଲ୍ଲା ତିହିଡି ବ୍ଲକ ମଙ୍ଗରାଜପୁରରୁ ସ୍ୱର୍ଗତଃ ସେଠୀଙ୍କ ଅସ୍ଥି କଳସ ବିସର୍ଜନ ଶୋଭାଯାତ୍ରା ବାହାରି ତିହିଡି ବଜାର, ଦୋଳସାହି, ବୋଡକ, ସହିଦନଗର, ମଙ୍ଗଳପୁର, ଅସୁରାଳୀ, କୋଠାର, ଧାମନଗର, ଦୋବଲ, ଆନନ୍ଦପୁର ନିର୍ବାଚନୀ ମଣ୍ଡଳୀର ଘର ଘର ବୁଲିବା ପରେ ଶେଷରେ ବୈତରଣୀ ନଦୀ ସିଦ୍ଧେଶ୍ୱର ଘାଟରେ ବିସର୍ଜନ କରାଯାଇଛି । ଏହି ଶୋଭାଯାତ୍ରାରେ ରାଜ୍ୟ ସଭାପତି ଶ୍ରୀ ସାମଲଙ୍କ ସହ ହଜାର ହଜାର ବିଜେପି କର୍ମୀ ସାମିଲ ହୋଇଛନ୍ତି । ଏହି ଅସ୍ଥି ବିସର୍ଜନ କରିଛନ୍ତି ସ୍ୱର୍ଗତଃ ସେଠୀଙ୍କ ପୁଅ ତଥା ବିଧାୟକ ସୂର୍ଯ୍ୟବଂଶୀ ସୁରଜ ।
ଏହି ଶୋଭାଯାତ୍ରାରେ ପୂର୍ବତନ ରାଜ୍ୟ ସଭାପତି ସମୀର ମହାନ୍ତି, ରାଜ୍ୟ ଉପସଭାପତି ବିରଂଚି ନାରାୟଣ ତ୍ରିପାଠୀ, ରାଜ୍ୟ ସଂପାଦକ ସରୋଜ କୁମାର କର, ଭଦ୍ରକ ଜିଲ୍ଲା ସଭାପତି ହେମନ୍ତ ପାଢ଼ୀଙ୍କ ସମେତ ଶତାଧିକ କାର୍ଯ୍ୟକର୍ତା ଉପସ୍ଥିତ ଥିଲେ ।