କିଡ୍ନିକୁ ସୁସ୍ଥ ରଖିବେ କେମିତି?
କେମିତି କିଡ୍ନିକୁ ସୁସ୍ଥ ରଖିବେ? ଆସନ୍ତୁ ବିଶିଷ୍ଟ କିଡ୍ନି ରୋଗ ବିଶେଷଜ୍ଞ ଡାକ୍ତର ମାନସ ରଞ୍ଜନ ପ୍ରଧାନଙ୍କଠାରୁ ଏବିଷୟରେ ବିସ୍ତୃତ ଭାବେ ଜାଣିବା।
କିଡ୍ନି ସୁସ୍ଥ ରହିବା କାହିଁକି ଜରୁରୀ?
ସୁସ୍ଥ କିଡ୍ନି ପାଇଁ କ’ଣ ଖାଇବେ?
ସୁସ୍ଥ କିଡ୍ନି ପାଇଁ କେତେ ପାଣି ପିଇବେ?
ନିୟମିତ ବ୍ୟାୟାମ କରନ୍ତୁ
ଆମ ଶରୀରରେ କିଡ୍ନି ହେଉଛି ଏକ ଫିଲଟର୍ ଭଳି। ଅପରିଷ୍କାର ରକ୍ତକୁ ଛାଣି ଶରୀରକୁ ବିଶୁଦ୍ଧ ରକ୍ତ ଯୋଗାଇବା କିଡ୍ନିର ମୁଖ୍ୟ କାମ। ତେଣୁ କିଡ୍ନିକୁ ସୁସ୍ଥ ରଖିବା ନିହାତି ଦରକାର।
ଶରୀରରୁ ବର୍ଜ୍ୟବସ୍ତୁ ବାହାରିଗଲେ ତାହା ସୁସ୍ଥ ରହିଥାଏ। ଯଦି ଅପରିଷ୍କାର ଜିନିଷ ଦେହ ଭିତରେ ରହେ, ତେବେ ଭୋକ ହେବନି, ମୁହଁ ହାତ ଫୁଲିଯିବ, କାମ କରିବାକୁ ଆଗ୍ରହ ହୋଇନଥାଏ, ଦୁର୍ବଳ ଲାଗିବ। କିଡ୍ନିର ଆଉ ଏକ ମୁଖ୍ୟ କାର୍ଯ୍ୟ ହେଉଛି ଶରୀରରେ ପାଣିର ମାତ୍ରା, ୟୁରିଆ, କ୍ରିଏଟିନିନ୍, କ୍ୟାଲ୍ସିୟମ୍, ଫସ୍ଫରସ୍ ଆଦିକୁ ସନ୍ତୁଳିତ କରିବା। ଅର୍ଥାତ୍ ଶରୀରକୁ ଯେତିକି ଦରକାର ସେତିକି ରଖି ବର୍ଜ୍ୟବସ୍ତୁକୁ ଝାଡ଼ା ପରିସ୍ରା ମାଧ୍ୟମରେ ବାହାରକରିଦିଏ। ଯଦି ଶରୀରରୁ ଅପରିଷ୍କାର ଜିନିଷ ବାହାରେ ନାହିଁ, ତେବେ ଏହା ଦେହରେ ଜମା ହୋଇ ରହେ, ଫଳରେ ଧୀରେ ଧୀରେ ଦେହ ଅସୁସ୍ଥ ହେବାର ଆରମ୍ଭ କରେ। ତେଣୁ ଦେହକୁ ସୁସ୍ଥ ରଖିବା ପାଇଁ କିଡ୍ନି ସୁସ୍ଥ ରହିବା ନିହାତି ଆବଶ୍ୟକ।
ସୁସ୍ଥ କିଡ୍ନି ପାଇଁ କ’ଣ ଖାଇବେ? (What to eat for a Healthy Kidney in Odia)
କେବଳ କିଡ୍ନି ନୁହେଁ ସମ୍ପୂର୍ଣ୍ଣ ଶରୀରକୁ ସୁସ୍ଥ ରଖିବା ପାଇଁ ବାଲାନ୍ସ ଡାଏଟ୍ ବା ସନ୍ତୁଳିତ ଆହାର ସେବନ କରିବା ଜରୁରୀ। ଦୈନିକ ଖାଦ୍ୟ ତାଲିକାରେ ପନିପରିବା, ଫଳ ଆଦିକୁ ସାମିଲ କରିବା ଦରକାର। ପୂର୍ବରୁ ଆମ ଜେଜେ ବାପାମା’ ଯେଉଁଭଳି ଖାଦ୍ୟ ଖାଉଥିଲେ ଯେପରିକି ଭାତ, ରୁଟି ଭଳି ଦେଶୀ ଆହାରକୁ ଖାଦ୍ୟରେ ସାମିଲ କରନ୍ତୁ।
ଆଜିକାଲି ବଡିବିଲ୍ଡିଂ କରୁଥିବା ଲୋକେ ଅଧିକ ପରିମାଣର ପ୍ରୋଟିନ୍ ଖାଉଛନ୍ତି। ହେଲେ ଅଧିକ ପ୍ରୋଟିନ୍ କିଡ୍ନି ପାଇଁ କ୍ଷତିକାରକ। ତେଣୁ, ଶରୀରର ଆବଶ୍ୟକତା ଅନୁଯାୟୀ ପ୍ରୋଟିନ୍ର ମାତ୍ରା ନେବା ଆବଶ୍ୟକ।
ସବୁବେଳେ ପାଣିକୁ ଫିଲଟର କରି ପିଇବା ଆବଶ୍ୟକ। ନିୟମିତ ବ୍ୟାୟାମ କରିବା ଆବଶ୍ୟକ। ଏହା ହୃଦୟଠାରୁ ଆରମ୍ଭ କରି ଫୁସ୍ଫୁସ୍ ଓ କିଡ୍ନିକୁ ସୁସ୍ଥ ରଖିଥାଏ।
ତା’ଛଡ଼ା କେତେକ ଔଷଧ ଅଛି, ଯେଉଁଥିରେ ବିଭିନ୍ନ ପ୍ରକାରର ଧାତୁ ଥାଏ, ଯାହା କିଡ୍ନି ଖରାପ କରିଥାଏ। ତେଣୁ, ସବୁବେଳେ ଅଭିଜ୍ଞ ଡାକ୍ତରଙ୍କ ପରାମର୍ଶ କ୍ରମେ ଔଷଧ ଖାଇବା ଆବଶ୍ୟକ। ଅତ୍ୟଧିକ ପେନ୍ କିଲର ଖାଇବା ଯୋଗୁଁ ମଧ୍ୟ କିଡ୍ନି ଖରାପ ହୋଇପାରେ।
ସୁସ୍ଥ କିଡ୍ନି ପାଇଁ କେତେ ପାଣି ପିଇବେ? (Importance of water for a Healthy Kidney in Odia)
ପାଣିକୁ ନେଇ ଆମ ସମାଜରେ ବହୁତଗୁଡ଼ିଏ ଭୁଲ ଧାରଣା ରହିଛି। ଲୋକେ ଭାବନ୍ତି ବହୁତ ପାଣି ପିଇଲେ ଭଲ। ହେଲେ ବହୁତ ପାଣି ପଇବା ଚକ୍କରରେ କେତେ ପାଣି ପିଇବା ଆବଶ୍ୟକ ତାହା ଜାଣିନଥାଆନ୍ତି। କେତେକ ଲୋକ ଗୋଟେ ଦିନରେ ୧୦-୧୨ ଲିଟର ପାଣି ପିଇଥାଆନ୍ତି। ହେଲେ ଏହା କିଡ୍ନି ଉପରେ ଖରାପ ପ୍ରଭାବ ପକାଇଥାଏ।
ଜଣେ ସାଧାରଣ ଲୋକ ଦୈନିକ ୮-୧୦ ଗ୍ଲାସ୍ ପାଣି ପିଇବା ଆବଶ୍ୟକ। ଜାଣିରଖନ୍ତୁ, ଆପଣ କାମ କ’ଣ କରୁଛନ୍ତି ତାହା ଉପରେ ଆପଣଙ୍କ ପାଣି ପିଇବା ନିର୍ଭର କରୁଛି। ମନେକର ଖେତବାଡ଼ିରେ କାମ କରୁଥିବା ଲୋକ ଓ ଜିମ୍ ଯାଉଥିବା ଲୋକଙ୍କର ଝାଳ ଅଧିକ ବାହାରିଥାଏ। ଯଦି ଜଣଙ୍କର ଝାଳ ବେଶୀ ବାହାରୁଛି, ତାହାହେଲେ ବ୍ୟକ୍ତି ୩ରୁ ସାଢ଼େ ତିନି ଲିଟର ପାଣି ପିଇପାରିବେ। ଯଦି ଆପଣ ଅଫିସ୍ରେ ବସି ରହି କାମ କରୁଛନ୍ତି ବା ଝାଳ କମ୍ ବାହାରୁଛି, ତେବେ ୨ରୁ ଅଢ଼େଇ ଲିଟର ପାଣି ପଇବା ଯଥେଷ୍ଟ।