୭୬ କିଲୋଗ୍ରାମ ଓଜନର ଲଡୁ ସହ ୭୬ତମ ଜନ୍ମଦିନ ପାଳନ କଲେ ଲାଲୁ ଯାଦବ

ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡି ସୁପ୍ରିମୋ ଲାଲୁ ପ୍ରସାଦ ଆଜି ତାଙ୍କର ୭୬ତମ ଜନ୍ମଦିନ ପାଳନ କରିଛନ୍ତି । ପରିବାର ସଦସ୍ୟ ଓ ଆରଜେଡି ନେତାଙ୍କ ଉପସ୍ଥିତିରେ ଲାଲୁ ଜନ୍ମଦିନ ପାଳନ କରିଛନ୍ତି | ଏହି ଅବସରରେ ବିଭିନ୍ନ ସ୍ଥାନରେ ଦଳ ଦ୍ୱାରା ଅନେକ କାର୍ଯ୍ୟକ୍ରମ ଆୟୋଜିତ ହୋଇଛି। ପାଟନାରେ ଲାଲୁ ଯାଦବଙ୍କ ପୁରା ପରିବାର ତାଙ୍କୁ ଜନ୍ମଦିନରେ ଅଭିନନ୍ଦନ ଜଣାଇଛନ୍ତି। ଏହି ଅବସରରେ କେକ ମଧ୍ୟ କଟାଯାଇଥିଲା। ଏହି ସମୟରେ ଲାଲୁଙ୍କ ପତ୍ନୀ ତଥା ପୂର୍ବତନ ମୁଖ୍ୟମନ୍ତ୍ରୀ ରାବଡି ଦେବୀ, ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ, ଲାଲୁଙ୍କ ବୋହୂ ରାଜଶ୍ରୀ ଯାଦବ, ଝିଅ ମିସା ଭାରତୀ, ରୋହିଣୀ ଆଚାର୍ଯ୍ୟ ଏବଂ ଅନ୍ୟ ଦୁଇ ଝିଅଙ୍କୁ ମଧ୍ୟ ଏକାଠି ଦେଖିବାକୁ ମିଳିଥିଲା। ଏହି ଅବସରରେ ଲାଲୁ ଯାଦବଙ୍କ ସମର୍ଥକମାନେ ତାଙ୍କୁ ସମ୍ମାନ ଜଣାଇବା ପାଇଁ ୭୬ କିଲୋଗ୍ରାମ ଓଜନର ଏକ ଲଡୁ ପ୍ରଦାନ କରିଥିଲେ |

ଜେଡିୟୁ ମୁଖ୍ୟ ଲଲନ ସିଂ ଏବଂ ବିହାର ବିଧାନସଭା ବାଚସ୍ପତି ଆୱାଧ ବିହାରୀ ଚୌଧୁରୀ ମଧ୍ୟ ଲାଲୁଙ୍କ ଭେଟି ଶୁଭକାମନା ଜଣାଇଥିଲେ | ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ମଧ୍ୟ ଫୋନ ଯୋଗେ ଲାଲୁ ଯାଦବଙ୍କୁ ଶୁଭେଚ୍ଛା ଜଣାଇଛନ୍ତି। ଲାଲୁ ଯାଦବ ୧୧ ଜୁନ୍ ୧୯୪୮ରେ ବିହାରର ଗୋପାଳଗଞ୍ଜରେ ଜନ୍ମ ହୋଇଥିଲେ | ଲାଲୁ ଯାଦବ ଜୟପ୍ରକାଶ ନାରାୟଣଙ୍କ ଦ୍ୱାରା ପରିଚାଳିତ ଆନ୍ଦୋଳନରେ ଯୋଗ ଦେଇ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିଲେ।