ମହାଦେବ ଆପ୍ ଦୁର୍ନୀତି: ୩ ରାଜ୍ୟରେ ଇଡିର ଚଢ଼ଉ; ୪୧୭ କୋଟି ଟଙ୍କା ଜବତ
ନୂଆଦିଲ୍ଲୀ: ଅନ୍ଲାଇନ୍ ଜୁଆ ଆପ୍ ମହାଦେବ ବୁକ୍ ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଶୁକ୍ରବାର ମୁମ୍ବାଇ, ଭୋପାଳ ଓ କୋଲକାତାରେ ଚଢ଼ଉ କରି ୪୧୭ କୋଟି ଟଙ୍କା ଜବତ କରିଛି। ଏହି ମାମଲାର ତଦନ୍ତରୁ ଜଣାପଡିଛି ଯେ, ଛତିଶଗଡ ଭିଲାଇର ସୌରଭ ଚନ୍ଦ୍ରାକର ଏବଂ ରବି ଉପ୍ପଲ ମହାଦେବ ଅନଲାଇନ ବୁକର ମୁଖ୍ୟ ପ୍ରମୋଟର ଏବଂ ଦୁବାଇରୁ ନିଜର କାରବାର ଚଳାଉଛନ୍ତି। ମହାଦେବ ଅନଲାଇନ୍ ବୁକ୍ ୟୁଏଇର ଏକ କେନ୍ଦ୍ରୀୟ ମୁଖ୍ୟ କାର୍ଯ୍ୟାଳୟରୁ ପରିଚାଳିତ ହୋଇଥାଏ ଏବଂ ମୁଖ୍ୟ କାର୍ଯ୍ୟାଳୟ ୭୦ ପ୍ରତିଶତ ଲାଭ ପାଇଲା ବେଳେ ଶାଖା କାର୍ଯ୍ୟାଳୟ ଚଳାଉଥିବା ସହଯୋଗୀମାନେ ୩୦ ପ୍ରତିଶତ ଲାଭ ପାଇଥାନ୍ତି।
ଇଡିର କହିବା ଅନୁସାରେ, ବେଟିଂରୁ ମିଳୁଥିବା ଆୟକୁ ଅଫ୍ ସୋର (ବିଦେଶରେ ଥିବା) ଆକାଉଣ୍ଟକୁ ପଠାଇବା ପାଇଁ ବ୍ୟାପକ ହାଓ୍ୱଲା ଅପରେସନ୍ କରାଯାଉଛି। ନୂଆ ଉପଭୋକ୍ତା ଏବଂ ଫ୍ରାଞ୍ଚାଇଜ୍ ଆଶାୟୀମାନଙ୍କୁ ଆକୃଷ୍ଟ କରିବା ପାଇଁ ବେଟିଂ ୱେବସାଇଟ୍ର ବିଜ୍ଞାପନ ବାବଦକୁ ଭାରତରେ ବିପୁଳ ପରିମାଣର ନଗଦ ଅର୍ଥ ବ୍ୟୟ କରାଯାଉଛି। ଫେବ୍ରୁଆରି ୨୦୨୩ରେ ଚନ୍ଦ୍ରାକର ୟୁଏଇର ଆରଏକେରେ ବିବାହ କରିଥିଲେ ଏବଂ ଏହି ବିବାହ ସମାରୋହ ପାଇଁ ମହାଦେବ ଏପିପିର ପ୍ରମୋଟରମାନେ ନଗଦ ପ୍ରାୟ ୨୦୦ କୋଟି ଟଙ୍କା ଖର୍ଚ୍ଚ କରିଥିଲେ। ପରିବାର ସଦସ୍ୟଙ୍କୁ ନାଗପୁରରୁ ୟୁଏଇ ନେବା ପାଇଁ ଘରୋଇ ବିମାନ ଭଡ଼ାରେ ନିଆଯାଇଥିଲା। ଏହି ବିବାହରେ ଅଭିନୟ କରିବା ପାଇଁ ସେଲିବ୍ରିଟିମାନଙ୍କୁ ନିୟୋଜିତ କରାଯାଇଥିଲା। ମୁମ୍ବାଇରୁ ୱେଡିଂ ପ୍ଲାନର, ଡ୍ୟାନ୍ସର, ଡେକୋରେଟର ଇତ୍ୟାଦିଙ୍କୁ ନିଯୁକ୍ତି ଦିଆଯାଇଥିଲା ଏବଂ ହାୱଲା ଚ୍ୟାନେଲକୁ ବ୍ୟବହାର କରି ନଗଦ ଟଙ୍କା ଦିଆଯାଇଥିଲା। ମହାଦେବ ଅନ୍ ଲାଇନ୍ ବୁକ୍ ଆପ୍ର ମନି ଲଣ୍ଡରିଂ କାର୍ଯ୍ୟରେ ସମ୍ପୃକ୍ତ ଅନ୍ୟ ପ୍ରମୁଖ ଖେଳାଳିଙ୍କୁ ସଫଳତାର ସହ ଚିହ୍ନଟ କରାଯାଇଛି ବୋଲି ଇଡି କହିଛି।
କୋଲକାତାରେ ରହୁଥିବା ବିକାଶ ଛପାରିଆ ମହାଦେବ ଆପ୍ ପାଇଁ ହାଓ୍ୱାଲା ସମ୍ବନ୍ଧୀୟ ସମସ୍ତ କାର୍ଯ୍ୟ ପରିଚାଳନା କରୁଥିବା ଜଣାପଡ଼ିଥିଲା। ଛପାରିଆଙ୍କ ମାଲିକାନାରେ ଥିବା ସଂସ୍ଥା ନାମରେ ୨୩୬.୩ କୋଟି ଟଙ୍କାର ନଗଦ ଡେରିଭେଟିଭ୍ ଏବଂ ଅନ୍ୟାନ୍ୟ ସିକ୍ୟୁରିଟି ହୋଲ୍ଡିଂକୁ ଇଡି ମନି ଲଣ୍ଡରିଂ ନିବାରଣ ଆଇନ, ୨୦୦୨ (ପିଏମ୍ଏଲ୍ଏ) ଅନୁଯାୟୀ ଜବତ କରିଛି। ଅନ୍ୟତମ ସହଯୋଗୀ ଗୋବିଦ କେଡିଆଙ୍କ ଡିମାଟ୍ ହୋଲ୍ଡିଂରେ ଥିବା ୧୬୦ କୋଟି ଟଙ୍କାର ସମ୍ପତ୍ତିକୁ ମଧ୍ୟ ଇଡି ଫ୍ରିଜ୍ କରିଛି। କେଡିଆଙ୍କ ଘରେ ଚଢ଼ାଉ କରି ୧୮ ଲକ୍ଷ ଟଙ୍କା, ୧୩ କୋଟି ଟଙ୍କାର ସୁନା ଓ ଅଳଙ୍କାର ଜବତ କରାଯାଇଛି। ନିକଟରେ ଇଡି ଏହି ମାମଲାରେ ଛତିଶଗଡ଼ ପୁଲିସର ଆସିଷ୍ଟାଣ୍ଟ ସବ୍ ଇନ୍ସପେକ୍ଟର (ଏଏସ୍ଆଇ) ଚନ୍ଦ୍ରଭୂଷଣ ବର୍ମା, ବ୍ୟବସାୟୀ ସତୀଶ ଚନ୍ଦ୍ରାକର, ହାଓ୍ୱାଲା ଅପରେଟର ଅନିଲ ଦାମମଣି ଏବଂ ସୁନୀଲ ଦାମମଣିଙ୍କୁ ଗିରଫ କରିଥିଲା। ଅନଲାଇନ୍ ଜୁଆ ଆପ୍ ମହାଦେବ ବୁକ୍ ସହ ଜଡ଼ିତ ମନି ଲଣ୍ଡରିଂ ମାମଲାରେ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲଙ୍କ ରାଜନୈତିକ ପରାମର୍ଶଦାତା ବିନୋଦ ବର୍ମାଙ୍କୁ ମଧ୍ୟ ଇଡି ପଚରାଉଚରା କରିଥିଲା।