ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତିର ମୁଳ କାରଣ ବିଜେଡି ନେତା, ପୋଲିସ ଓ ପ୍ରଶାସନର ମଧୁଚନ୍ଦ୍ରିକା: ଡ.ଲେଖାଶ୍ରୀ

ଭୁବନେଶ୍ୱର,ତା.୧୪/୦୮: ନବୀନ ଓଡ଼ିଶାରେ ମା’ ଓ ଭଉଣୀଙ୍କୁ ସମ୍ମାନର ମିଥ୍ୟା ପ୍ରଚାର କରାଯାଉଛି । ୨୩ବର୍ଷର ବିଜେଡି ଶାସନରେ ରାଜ୍ୟର ମାଁ ଓ ଭଉଣୀ ଆଜି ବି ନିଜକୁ ଅସୁରକ୍ଷିତ ମନେ କରୁଛନ୍ତି । ମହିଳାଙ୍କୁ ସୁରକ୍ଷା ଦେବାରେ ବିଫଳ ହୋଇଛି ବିଜେଡି ସରକାର । ଅଧିକାଂଶ କ୍ଷେତ୍ରରେ ଶାସକ ବିଜୁ ଜନତା ଦଳର ନେତା ଓ ମନ୍ତ୍ରୀଙ୍କ ସଂପୃକ୍ତି କାରଣରୁ ମହିଳା ନିର୍ଯ୍ୟାତନା, ଦୁଷ୍କର୍ମ, ଅପହରଣ ସଂଖ୍ୟା ଦିନକୁ ଦିନ ବଢିବାରେ ଲାଗିଛି । ମୁଖ୍ୟମନ୍ତ୍ରୀ ନିଜ ଦଳର ଅଭିଯୁକ୍ତ ନେତା ଓ ମନ୍ତ୍ରୀଙ୍କୁ ସୁରକ୍ଷା ଦେବା କାରଣରୁ ଅପରାଧ ଓ ଅପରାଧୀଙ୍କ ଚରାଭୁଇଁ ପାଲଟିଛି ଓଡିଶା । ମହିଳା ଅପରାଧ ଓ ହିଂସାରେ ସର୍ବଭାରତୀୟ ସ୍ତରରେ ଓଡିଶାର ସ୍ଥାନ ତଳେ ଥିବା ସତ୍ୱେ ରାଜ୍ୟ ସରକାରଙ୍କ ଚେତା ପଶୁନାହିଁ । ଅପରାଧୀମାନେ ନିର୍ବିଘ୍ନରେ ଅପରାଧ ଭିଆଇ ଚାଲିଛନ୍ତି ଏବଂ ପୋଲିସ ପ୍ରଶାସନ ଶାସକ ବିଜେଡିର ହାତବାରିସୀ ସାଜି ତଦନ୍ତ ପ୍ରକ୍ରିୟାରେ ମଧ୍ୟ ପକ୍ଷପାତିତା କରୁଛି । ଏହାର ଏକ ଜ୍ୱଳନ୍ତ ଉଦାହରଣ ଗତ ଦୁଇ ମାସ ତଳେ କଟକ ଜିଲ୍ଲା ମାହାଙ୍ଗାଠାରେ ଘଟିଯାଇଥିବା ଜଣେ ନାବାଳିକା ଛାତ୍ରୀ ମୃତ୍ୟୁ ଘଟଣାରେ ଦେଖିବାକୁ ମିଳିଛି । ଓଡିଶାରେ ବଡୁଥିବା ଅପରାଧ, ମହିଳା ବିରୋଧୀ ହିଂସା ଓ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତିର ମୁଳ କାରଣ ବିଜୁ ଜନତା ନେତା, ପୋଲିସ ଓ ପ୍ରଶାସନର ମଧୁଚନ୍ଦ୍ରିକା ବୋଲି ଏହି ଘଟଣା ପ୍ରମାଣିତ କରୁଥିବାର ରାଜ୍ୟ ଉପସଭାପତି ଡ.ଲେଖାଶ୍ରୀ ସାମନ୍ତସିଂହାର କହିଛନ୍ତି ।
ମାହାଙ୍ଗା ନାବାଳିକା ଛାତ୍ରୀ ମୃତ୍ୟୁ ପ୍ରସଙ୍ଗରେ ଡ.ଲେଖାଶ୍ରୀଙ୍କ ନେତୃତ୍ୱରେ ଏକ ପ୍ରତିନିଧି ଦଳ ରାଜ୍ୟ ପୋଲିସ ମହାନିର୍ଦ୍ଦେଶକଙ୍କୁ ଭେଟି ଘଟଣା ସଂପର୍କରେ ବିସ୍ତୃତ ଆଲୋଚନା କରିଛନ୍ତି ।
ଓଡ଼ିଶାରେ ଆଇନଶୃଙ୍ଖଳା ଓ ପ୍ରଶାସନିକ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ । ୨ମାସ ତଳେ କଟକ ଜିଲ୍ଲା ମାହାଙ୍ଗା ଥାନା ଅନ୍ତର୍ଗତ ଗୋକନ ଗାଁର ପ୍ରମୋଦ ଦାସଙ୍କ ନାବାଳିକା ଝିଅ ସ୍ୱର୍ଣ୍ଣଲତା ଦାସ(୧୫)ଙ୍କ ମୃତ୍ୟୁ ହୋଇଥିଲା । ନାବାଳିକା ମୃତ୍ୟୁକୁ ନେଇ ପୋଲିସ କିମ୍ବା ପ୍ରଶାସନ ସମ୍ପୂର୍ଣ୍ଣ ନିଷ୍କ୍ରିୟ । ମୃତ ଶରୀରକୁ ଆଇନ ସମ୍ମତ ପୋଷ୍ଟମଂଟମ ନକରି ପୋଡି ଦେଇ ରଫାଦଫା କରି ଦିଆଗଲା । ଏହି ନାବାଳିକାର କେମିତି ମୃତ୍ୟୁ ହେଲା ସେ ନେଇ ମଧ୍ୟ ପୋଲିସ କୌଣସି ତଦାଘନା କରିଲାନାହିଁ । ମୃତ ନାବାଳିକାର ସେହି ସ୍କୁଲର ଖେଳ ଶିକ୍ଷକଙ୍କ ସହ ଥିବା ସଂପର୍କକୁ ଝିଅର ପରିବାର ବିରୋଧ କରିଥିଲେ ଏବଂ କିଛି ଦିନ ପରେ ହଠାତ୍ ସେହି ଝିଅର ମୃତ୍ୟୁ ହୋଇଥିଲା । ଝିଅର ମୃତ୍ୟୁ ସଂପର୍କରେ ବିଦ୍ୟାଳୟର ଶିକ୍ଷୟିତ୍ରୀ ଜଣକ ତାଙ୍କ ସ୍ୱାମୀ ଯିଏକି ପୂର୍ବତନ ବ୍ଲକ ଅଧ୍ୟକ୍ଷ ଏବଂ ବର୍ତମାନ ଉକ୍ତ ବିଦ୍ୟାଳୟର ସଂପାଦକ ଶରତ ନାୟକଙ୍କୁ ଅବଗତ କରାଇଥିଲେ । ମାମଲାକୁ ରଫାଦଫା କରିବାକୁ ଯାଇ ଶ୍ରୀ ନାୟକ ପୋଲିସ, ଗଣମାଧ୍ୟମ, ମଣ୍ଡଳ ଅଧିକାରୀଙ୍କୁ ପ୍ରଭାବିତ କରି ବିନା ମୃତ ନାବାଳିକା ଝିଅର ଶବକୁ ପୋଷ୍ଟମର୍ଟମ ନକରି ଜନସାଧାରଣଙ୍କ ଅଜ୍ଞାତରେ ଶବଦାହ କରିବା ପରେ ପ୍ରମାଣ ନଷ୍ଟ କରିବାକୁ ଯାଇ ସମସ୍ତ ତଥ୍ୟ ଓ ପ୍ରମାଣ ନଦୀରେ ଭସାଇ ଦେଇଥିଲେ । ଏହା ପରେ ଶ୍ରୀ ନାୟକ ମୁଖ୍ୟ ଅଭିଯୁକ୍ତ ଉକ୍ତ ଖେଳ ଶିକ୍ଷକଙ୍କ ମା’ଙ୍କୁ ଫୋନ କରି ଖର୍ଚ୍ଚ ବାବଦରେ ୭୦ ହଜାର ଟଙ୍କା ଦାବୀ କରିଥିଲେ । ଏହି ବାର୍ତାଳପର ଏକ ଅଡିଓ କ୍ଲିପ ଘଟଣାର ୨ ମାସ ପରେ ସାର୍ବଜନୀନ ହେବା ପରେ ଏ ସମସ୍ତ ଘଟଣା ବର୍ତମାନ ସାମ୍ନାକୁ ଆସିଛି । ଅପମୃତ୍ୟୁ ହୋଇଥିବା ନାବାଳିକା ଝିଅର ବିନା ପୋଷ୍ଟମର୍ଟମରେ ଶବସତ୍କାର କରାଯିବା ସଂପୂର୍ଣ୍ଣ ବେଆଇନ ବୋଲି ଡ.ଲେଖାଶ୍ରୀ କହିଛନ୍ତି ।
ଏଅନ୍ୟ ପଟେ ଶ୍ରୀ ଶରତ ନାୟକ ଯିଏକି ଶାସକ ବିଜେଡିର ପୂର୍ବତନ ବ୍ଲକ ଅଧ୍ୟକ୍ଷ ଏବଂ ସ୍ଥାନୀୟ ବିଧାୟକ ତଥା ପୂର୍ବତନ ମନ୍ତ୍ରୀ ଶ୍ରୀ ପ୍ରତାପ ଜେନାଙ୍କ ଅତ୍ୟନ୍ତ ଘନିଷ୍ଟ ସହଯୋଗୀ । ବହୁଚର୍ଚ୍ଚିତ ମାହାଙ୍ଗା କ୍ୱାଡ୍ରପଲ୍ ମର୍ଡର ଘଟଣାର ମୁଖ୍ୟ ସାକ୍ଷୀ କାବୁଆ ହତ୍ୟାକାଣ୍ଡରେ ସନ୍ଦେହ ଘେରରେ ଶରତ ନାୟକ ଅଛନ୍ତି । ମୃତ୍ୟୁ ପୁର୍ବରୁ କାବୁଆକୁ ଶରତ ନାୟକ ବହୁ ଥର କଲ୍ କରିଥିଲେ । ଏହି ଘଟଣାକୁ ଚାପି ଦେବା ପାଇଁ ସ୍ଥାନୀୟ ବିଧାୟକ ଶ୍ରୀ ଜେନା ଚାପ ପକାଉଛନ୍ତି ଏବଂ ଏହି କାରଣରୁ ନାବାଳିକାର ପରିବାର ନ୍ୟାୟ ପାଇବାରୁ ବଂଚିତ ହେଉଛନ୍ତି । ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଉକ୍ତ ନାବାଳିକା ହତ୍ୟାକାଣ୍ଡର ସମସ୍ତ ଗୁପ୍ତ ତଥ୍ୟ ଲୋକଲୋଚନକୁ ଆଣିବା ପାଇଁ ପୋଲିସ ମହାନିର୍ଦ୍ଦେଶକଙ୍କୁ ଭେଟି ଦାବି କରିଛନ୍ତି ବୋଲି ଡ.ଲେଖାଶ୍ରୀ କହିଛନ୍ତି ।
ଏହି ପ୍ରତିନିଧି ଦଳରେ ଓବିସି ମୋର୍ଚ୍ଚା ରାଜ୍ୟ ସଭାପତି ସୁରଥ ବିଶ୍ୱାଳ, ରାଜ୍ୟ ଗଣମାଧ୍ୟମ ସହମୁଖ୍ୟ ସୁଜିତ୍ କୁମାର ଦାସ୍‌, ପବିତ୍ର ଦାସ, ଜୟନ୍ତ ଜେନା, ରଶ୍ମିରଞ୍ଜନ କାନୁନଗୋ, କଟକ ଜିଲ୍ଲା ମହିଳା ମୋର୍ଚ୍ଚା ସଭାନେତ୍ରୀ ଯାଜ୍ଞସେନୀ ଜେନା ପ୍ରମୁଖ ଉପସ୍ଥିତ ଥିଲେ ।