ଦେଶ ଛାଡ଼ିବାକୁ ପାକିସ୍ତାନ ସୀମାରେ ଆଫଗାନ ନାଗରିକଙ୍କ ଅସମ୍ଭାଳ ଭିଡ଼, ସାମ୍ନାକୁ ଆସିଲା ସାଟେଲାଇଟ୍ ଚିତ୍ର
ନୂଆଦିଲ୍ଲୀ ୧୩/୦୯: ଆଫଗାନିସ୍ତାନକୁ ତାଲିବାନ କବଜା କରିବା ପରେ ସେଠାକାର ନାଗରିକ କୌଣସି ମତେ ଦେଶ ଛାଡ଼ି ଚାଲିଯିବାକୁ ଚେଷ୍ଟା ଜାରି ରଖିଛନ୍ତି। ଏବେ ବି ଆଫଗାନ ନାଗରିକ କେମିତି ଦେଶ ଛାଡ଼ି ଯିବେ ସେନେଇ ବିଭିନ୍ନ ପ୍ରୟାସ ମଧ୍ୟ କରୁଛନ୍ତି। କିନ୍ତୁ ଏବେ ଏବେ ଏନଡି ଟିଭିକୁ ମିଳିଥିବା ସାଟେଲାଇଟ୍ ଫଟୋରେ ଦୟନୀୟ ଦୃଶ୍ୟ ଦେଖିବାକୁ ମିଳିଛି।
ହଜାର ହଜାର ଆଫଗାନିସ୍ତାନ ନାଗରିକ ପାକିସ୍ତାନ ସୀମାରେ ଡେରା ପକାଇଥିବା ଦେଖିବାକୁ ମିଳିଛି। ଆଫଗାନିସ୍ତାନ ସହ ଲାଗି ଥିବା ପାକ ସୀମାରେ ବହୁ ସଂଖ୍ୟକ ଲୋକ ଫସି ରହିଥିବା ବେଳେ ଦେଶ ଛାଡ଼ିବାକୁ ଚେଷ୍ଟା କରୁଛନ୍ତି । ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ସ୍ପିନ୍ ବୋଲ୍ଡକ୍ରେ ଚମନ ସୀମାର ଗ୍ରାଉଣ୍ଡ ସ୍ଥିତି ଏହି ଫଟୋରେ ସ୍ପଷ୍ଟ ଜଣାପଡ଼ୁଛି।
ଚମନ ସୀମା ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ସବୁଠୁ ବ୍ୟସ୍ତବହୁଳ କ୍ରସିଂ ମଧ୍ୟରୁ ଗୋଟିଏ । ଅନକେ ପରିବାର କାବୁଲରୁ ନିଜ ଘର ଦ୍ବାର ଛାଡ଼ି ସୀମାରେ ଅସ୍ତାୟୀ କ୍ୟାମ୍ପ କରି ପଡ଼ିରହିଥିବା ବେଳେ ନିଜ ପାଳି କେବେ ଆସିବ ଏବଂ ଦେଶ ଛାଡ଼ି ଚାଲିଯିବେ ସେନେଇ ଅପେକ୍ଷା କରିଛନ୍ତି ।