ପାଳଲହଡ଼ା ଗଣଦୁଷ୍କର୍ମ ଓ ହତ୍ୟା ଘଟଣା; ଗିରଫ ହେଲା ଜଣେ ଅଭିଯୁକ୍ତ

ଅନୁଗୁଳ: ଏ ହେଉଛି ସେଦିନ ରାତିର ଲୋମ ଟାଙ୍କୁରା ଦୃଶ୍ୟ । ଏଭଳି ଭାବେ ଗଣ ଦୁଷ୍କର୍ମ ହତ୍ୟା କରାଯାଇଛି କହିଲେ ଲୋମ ଟାଙ୍କୁରି ଉଠିବ । ଶୁଣିଲେ ଛାତି ଥରିବ । ଆଜ୍ଞା ହଁ, ଏମିତି ଏକ ବିଭତ୍ସ ହତ୍ୟାକାଣ୍ଡ ଘଟିଛି ପାଳଲହଡା ଉପଖଣ୍ଡ ସିଗଡ଼ ପଞ୍ଚାୟତ ନନ୍ଦିନିପାଲ ଗାଁରେ । ଯାହା ଗତ ୪ ଦିନ ହେବ ଚର୍ଚ୍ଚା ର ବିଷୟ ପାଲଟିଛି । ଗତ ୨୧ ତାରିଖ ସନ୍ଧ୍ୟାରେ ଗ୍ରାମବାସୀଙ୍କ ପକ୍ଷରୁ ଫୋନ୍ ଯାଏ ପୋଲିସ ପାଖକୁ । ଆଉ ଘଟଣାସ୍ଥଳକୁ ପୋଲିସ ଆସିଲା ବେଳକୁ ଅର୍ଦ୍ଧ ନଗ୍ନ ଅବସ୍ଥାରେ ପଡ଼ିଥାଏ ମହିଳାଙ୍କ ମୃତ ଦେହ । ଖବର ପାଇ ପରିବାର ଲୋକେ ମଧ୍ୟ ଆସି ପହଞ୍ଚିଥିଲେ । ଆଉ ଦୋଷୀକୁ ଖୋଜି ବାହାର କରିବାକୁ ପୋଲିସକୁ ଅନୁରୋଧ କରିଥିଲେ । କିନ୍ତୁ ମୃତଦେହ ମିଳିବା ଦିନ ଠାରୁ ଶବ ଉଠିବା ପର୍ଯ୍ୟନ୍ତ ପୁରା ଗାଁ ରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା ।

ମୃତ ମହିଳା ସ୍ଵାମୀଙ୍କ ଅଭିଯୋଗ ଆଧାରରେ ତା’ ପରଦିନ ଆରମ୍ଭ ହୋଇଥିଲା ପୋଲିସ, ସାଇଣ୍ଟିଫିକ ଟିମ୍ ଓ ସନ୍ଧାନୀ କୁକୁରର ତଦନ୍ତ । ମୃତ ମହିଳାଙ୍କୁ ଅଭିଯୁକ୍ତ ଅଜୁ ନାଏକ କୌଣସି କାମ ବାହାନା କରି ବାହାରକୁ ଡାକି ନେଇ ଏକାକୀ ପାଇ ଦୁଷ୍କର୍ମ କରିଥିଲେ । ଏହି ସବୁ ଘଟଣା ଗାଁ ରେ ପ୍ରକାଶ କରିଦେବାକୁ କହିଲାରୁ ଉତ୍ତ୍ୟକ୍ତ ହୋଇ ଅଜୁ ତାଙ୍କୁ ହତ୍ୟା କରିଥିଲେ । ପୋଲିସ ଅଭିଯୁକ୍ତ ଅଜୁକୁ ଗିରଫ କରି ତାକୁ କୋର୍ଟ ଚାଲାଣ କରିଛନ୍ତି । ଯଦି ଅନ୍ୟ କେହି ଏଥିରେ ସଂପୃକ୍ତ ଥିବେ ତଦନ୍ତ ଅନୁଯାୟୀ ତାଙ୍କୁ ମଧ୍ୟ ଗିରଫ କରାଯିବ ବୋଲି ପାଳଲହଡ଼ା SDPO କୈଳାସ ଚନ୍ଦ୍ର ସେଠୀ ପ୍ରେସ ମିଟ୍ ମାଧ୍ୟମରେ ସୂଚନା ଦେଇଛନ୍ତି ।

ତେବେ ସାଧାରଣ ଲୋକଙ୍କ କହିବା ଅନୁଯାୟୀ ଏତେବଡ଼ ଜଘନ୍ୟ ହତ୍ୟା କାଣ୍ଡ କେହି ଜଣେ ଲୋକ କରିବା ଅସମ୍ଭବ । ଜଣଙ୍କୁ କାହିଁକି ଗିରଫ କରାଗଲା ଅନ୍ୟମାନେ କାହିଁକି ଏଯାଏଁ ଗିରଫ ହୋଇନାହାଁନ୍ତି । ଏଥିରେ ଏକାଧିକ ଲୋକ ସମ୍ପୃକ୍ତ ଥିବା ସନ୍ଦେହ ହେଉଛି । ତେଣୁ ପ୍ରକୃତ ଦୋଷୀ ମାନଙ୍କୁ ଧରିବା, ସଠିକ୍ ତଦନ୍ତ କରିବା ଓ ପ୍ରକୃତ ସତ୍ୟାସତ୍ୟକୁ ପର୍ଦ୍ଦାଫାଶ କରିବା ଦାବିରେ SUSI ପକ୍ଷରୁ ଥାନା ଘେରାଉ କରାଯାଇ ଦାବି ପତ୍ର ପ୍ରଦାନ କରା ଯାଇଥିଲା ।