ଶିବଲିଙ୍ଗ ଉପରେ ଦିଆଯାଇଥିବା ଭୋଗ ଗ୍ରହଣ କରିବା ଉଚିତ ନା ନୁହେଁ ? ଜାଣନ୍ତୁ କଣ କରିବେ

ଦେବ ଦେବ ମହାଦେବଙ୍କୁ ପୂଜା କରିବା ପାଇଁ ସର୍ବୋତ୍ତମ ଦିନ ହେଉଛି ସୋମବାର । ସୋମବାର ଦିନ ଭଗବାନ ଶିବ ଏବଂ ଶିବଲିଙ୍ଗଙ୍କୁ ପୂଜା କରି ଭକ୍ତମାନେ ଆଶୀର୍ବାଦ ପାଇଥାନ୍ତି । ପୂଜା ସମୟରେ ଭୋଳାନାଥଙ୍କୁ ତାଙ୍କ ପସନ୍ଦର ଭୋଗ ମଧ୍ୟ ଦିଆଯାଏ । ଅନେକ ଲୋକ ଅଛନ୍ତି ଯେଉଁମାନେ ଶିବଲିଙ୍ଗରେ ଦିଆଯାଇଥିବା ପ୍ରସାଦକୁ ଗ୍ରହଣ କରନ୍ତି । କିନ୍ତୁ ଆପଣ ଜାଣିଛନ୍ତି କି ଶିବଲିଙ୍ଗ ଉପରେ ଦିଆଯାଇଥିବା ଭୋଗ ଗ୍ରହଣ କରିବା ଉଚିତ ନା ନୁହେଁ ? ତେବେ ଏହାକୁ ନେଇ ଧାର୍ମିକ ପୁସ୍ତକରେ କଣ ଅଛି ଆସନ୍ତୁ ଜାଣିବା ।

ଧାର୍ମିକ ଗ୍ରନ୍ଥରେ କୁହାଯାଇଛି ଯେ ଭଗବାନ ଶିବଙ୍କ ପ୍ରତିମା ଏବଂ ଶିବଲିଙ୍ଗ ପୂଜା କରିବାର ନିୟମ ଭିନ୍ନ ଭିନ୍ନ ଥାଏ । ସମାନ ପଦ୍ଧତିରେ ଉଭୟଙ୍କୁ କେବେବି ପୂଜା କରାଯିବା ଉଚିତ୍ ନୁହେଁ । ଏପରିକି ଭଗବାନ ଶିବ ଏବଂ ଶିବଲିଙ୍ଗକୁ ଭୋଗ ଅର୍ପଣ କରିବାର ନିୟମ ମଧ୍ୟ ଅଲଗା ରହିଛି ।

ଆପଣ ନିଶ୍ଚୟ ଅନ୍ୟ ଦେବତା ଏବଂ ଦେବୀଙ୍କ ମନ୍ଦିରରେ ଦେଖିଥିବେ ଯେ ପୂଜା ସମୟରେ ଭଗବାନଙ୍କୁ ଯେଉଁ ଭୋଗ ଅର୍ପଣ କରାଯାଏ । ସେହି ଭୋଗ ଶେଷରେ ଭକ୍ତମାନଙ୍କ ମଧ୍ୟରେ ପ୍ରସାଦ ରୂପରେ ବଣ୍ଟାଯାଏ । କିନ୍ତୁ ଶିବଲିଙ୍ଗରେ ଦିଆଯାଇଥିବା ଭୋଗ ପ୍ରସାଦ ଭାବେ ନ ଖାଇବାକୁ ପରାମର୍ଶ ଦିଆଯାଇଛି । ଭୁଲରେ ମଧ୍ୟ ଏହି ଭୋଗ ଗ୍ରହଣ କରିବା ଉଚିତ୍ ନୁହେଁ ।

ଧାର୍ମିକ ଗ୍ରନ୍ଥ ଅନୁଯାୟୀ, ମହାଦେବଙ୍କ ମୁଖରୁ ଭୂତ ଓ ଆତ୍ମାମାନଙ୍କର ମୁଖ୍ୟ ଚଣ୍ଡେଶ୍ୱର ପ୍ରକଟ ହୋଇଥିଲା । ପ୍ରଚଳିତ ମାନ୍ୟତା ଅନୁସାରେ ଶିବଲିଙ୍ଗ ଉପରେ ଦିଆଯାଇଥିବା ଭୋଗ ଚଣ୍ଡେଶ୍ୱରର ଏକ ଅଂଶ । ଏହି କାରଣରୁ ଶିବଲିଙ୍ଗରେ ଦିଆଯାଇଥିବା ଭୋଗକୁ ପ୍ରସାଦ ଭାବରେ ଗ୍ରହଣ କରିବା ନିଷେଧ ହୋଇଥାଏ ।

ଧାର୍ମିକ ବିଶ୍ୱାସ ଅନୁଯାୟୀ, ଶିବଲିଙ୍ଗ ଉପରେ ଦିଆଯାଇଥିବା ଭୋଗ ନଦୀରେ ପ୍ରବାହିତ କରିବା ଉଚିତ୍ । ଯଦି ଆପଣ ଧାତୁ କିମ୍ବା ପାରଦର ଶିବଲିଙ୍ଗ ଉପରେ ଭୋଗ ଅର୍ପଣ କରିଛନ୍ତି ତେବେ ଏହାକୁ ପ୍ରସାଦ ଭାବରେ ଗ୍ରହଣ କରାଯାଇପାରିବ । ଧାର୍ମିକ ଗ୍ରନ୍ଥ ଅନୁଯାୟୀ ଭଗବାନ ଶିବଙ୍କ ପ୍ରତିମାରେ ଦିଆଯାଇଥିବା ଭୋଗକୁ ପ୍ରସାଦ ଭାବରେ ଗ୍ରହଣ କରାଯାଇପାରିବ। ଏହା କରିବା ଦ୍ୱାରା ପ୍ରସାଦ ଗ୍ରହଣ କରୁଥିବା ଭକ୍ତମାନେ ପୂଣ୍ୟ ଫଳ ପାଆନ୍ତି ।