ପୁରୀ ଠାରୁ ୭୦ କିଲୋମିଟର ଦୂରରେ ଜୱାଦ

ଭୁବନେଶ୍ୱର: ଦୁର୍ବଳ ହେବାରେ ଲାଗିଛି ଜୱାଦ୍ । ଆଉ କିଛି ସମୟ ପରେ ଗଭୀର ଅବପାତ ଅବପାତରେ ପରିଣତ ହେବ । ପୁରୀ ଉପକୂଳ ଦେଇ ଉତ୍ତର-ଉତ୍ତର ପୂର୍ବ ଦିଗକୁ ଗତି କରିବ । ମୋଟାମୋଟି ଭାବେ ପଶ୍ଚିମବଙ୍ଗ ଏବଂ ବାଂଲାଦେଶ ଆଡ଼କୁ ଗତି କରିବ ଜୱାଦ । ଘଣ୍ଟାକୁ ୧୮ କିଲୋମିଟର ବେଗରେ ବର୍ତ୍ତମାନ ଗତି କରୁଛି ବାତ୍ୟା  । ଏହାର ପ୍ରଭାବରେ ଭୁବନେଶ୍ୱର ସମେତ ରାଜ୍ୟର ଉପକୂଳ ଜିଲ୍ଲାରେ ବର୍ଷା ଲାଗି ରହିଛି । ଯଦିଓ ଏହାର ବଡ ପ୍ରଭାବ ରାଜ୍ୟ ଉପରେ ନାହିଁ, ତଥାପି ଉପକୂଳ ଜିଲ୍ଲାରେ ପ୍ରବଳ ବର୍ଷା ହେବ ।

ପାଣିପାଗ ବିଭାଗର ସୂଚନା ମୁତାବକ ପବନର ବେଗ ସର୍ବାଧିକ ୬୫ କିଲୋମିଟର ଯାଏ ପହଞ୍ଚିବ । ଜୱାଦ ଏବେ ପୁରୀ ଠାରୁ ୭୦ କିଲୋମିଟର ଦୂରେ ରହିଛି । ସେହିପରି ଗୋପାଳପୁରଠାରୁ ୧୦୦ ଓ ପାରଦୀପଠାରୁ ୧୫୦ କିଲୋମିଟର ଦୂରରେ ରହିଛି ଜଓ୍ୱାଦ । ଏହା ପ୍ରଭାବରେ ଉତ୍ତର ଓଡ଼ିଶାରେ ୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ହୋଇପାରେ । ସମଗ୍ର ଓଡ଼ିଶାରେ ୧୬ ମିଲିମିଟର ବର୍ଷା ରେକର୍ଡ ହୋଇଛି । ପ୍ରଭାବରେ ଉପକୂଳ ଜିଲ୍ଲାରେ ସର୍ବାଧିକ ବର୍ଷା ରେକର୍ଡ ହୋଇଛି । ଆସନ୍ତାକାଲିଠାରୁ ପାଗ ଶୁଖିଲା ରହିବ ବୋଲି ସୂଚନା ଦେଇଛି ପାଣିପାଗ ବିଭାଗ ।

ସେପଟେ ଜଓ୍ୱାଦ ପ୍ରଭାବରେ ଗଞ୍ଜାମରେ ସର୍ବାଧିକ ବର୍ଷା ରେକର୍ଡ ହୋଇଛି । ବର୍ଷା କେବଳ ଆଜି ଅର୍ଥାତ ରବିବାର ହେବାକୁ ଥିବାବେଳେ ସୋମବାର ଆଡ଼କୁ  ଧୀରେ ଧୀରେ ସ୍ଥିତି ସ୍ୱାଭାବିକ ହେବ । ତେବେ ସୋମବାର ପାଇଁ କୌଣସି ହେଭି ଓ୍ବାର୍ଣ୍ଣିଂ ଅନୁମାନ କରାଯାଇ ନାହିଁ । ୫ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହେବା ନେଇ ଆଲର୍ଟ କରାଯାଇଛି । କେନ୍ଦ୍ରାପଡ଼ା, ଗଞ୍ଜାମ, ପୁରୀ, ଖୋର୍ଦ୍ଧା, ଜଗତସିଂହପୁରକୁ ଅରେଞ୍ଜ ଆଲର୍ଟ ଜାରି ହୋଇଛି । ସେହିପରି କଟକ ଓ ଭୁବନେଶ୍ୱରରେ ବି ପ୍ରବଳ ବର୍ଷା ସମ୍ଭାବନା ରହିଛି ବୋଲି କହିଛି ପାଣିପାଗ ବିଭାଗ ।