ରସଗୋଲାରେ ପାର୍ବତୀଙ୍କ ମାନଭଞ୍ଜନ କଲେ ପ୍ରଭୁ ଶ୍ରୀଲିଙ୍ଗରାଜ

ପାର୍ବତୀଙ୍କ ମାନଭଞ୍ଜନ କରିବା ପାଇଁ ଲିଙ୍ଗରାଜଙ୍କ ପକ୍ଷରୁ ରସଗୋଲା ଭେଟି ଦିଆଯିବା ପରେ ମା’ ପାର୍ବତୀଙ୍କ ରୋଷ ଥମିଥିଲା। ଚାହାଣି ମଣ୍ଡପରୁ ମା’ ପାର୍ବତୀଙ୍କ ସହ ରୁକୁଣା ରଥରେ ଲିଙ୍ଗରାଜଙ୍କ ସମସ୍ତ ନୀତି କାନ୍ତି ସରିଥିଲା। ଏହି ଅବସରରେ ଲିଙ୍ଗରାଜ ମନ୍ଦିରରେ ଶ୍ରଦ୍ଧାଳୁମାନଙ୍କୁ ରସଗୋଲା ବଣ୍ଟନ କରାଯାଇଥିଲା। ତେବେ ଏହି ଉପଲକ୍ଷେ ପୁରା ପରିବେଶ ଭକ୍ତିମୟ ହୋଇଉଠିଥିଲା। ଘଣ୍ଟ ଘଣ୍ଟା ନାଦ ସହ ହର ହର ମହାଦେବ ଧ୍ବନିରେ ପ୍ରକମ୍ପିତ ହୋଇ ପଡ଼ିଥିଲା ସମଗ୍ର ଅଞ୍ଚଳ । ଏହା ବ୍ୟତୀତ ବିଭିନ୍ନ ପ୍ରକାର ଆତସବାଜୀ ସହ ନିଅ ଖେଳ ଓ ଲଉଡ଼ି ଖେଳର ଆସର ମଧ୍ୟ ଦେଖିବାକୁ ମିଳିଥିଲା।