କେଜ୍ରିଓ୍ବାଲଙ୍କ ମନୋବଳ ଭାଙ୍ଗିବାକୁ ଉଦ୍ୟମ କରାଯାଉଛି : ଆପ୍
ନୂଆଦିଲ୍ଲୀ: ଆପର ଦିଲ୍ଲୀରୁ ରାଜ୍ୟସଭା ସାଂସଦ ସଞ୍ଜୟ ସିଂହ ଶନିବାର ସକାଳେ ଏକ ସାମ୍ବାଦିକ ସମ୍ମିଳନୀ କରିଛନ୍ତି। ସେ କହିଛନ୍ତି ଯେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଜେଲ ଭିତରେ ନିର୍ଯାତନା ଦିଆଯାଉଛି। ସେମାନଙ୍କ ମନୋବଳ ଭାଙ୍ଗିବା ପାଇଁ ଏହି ପଦକ୍ଷେପ ନିଆଯାଉଛି ବୋଲି ଶ୍ରୀ ସିଂହ ଗଣମାଧ୍ୟମକୁ କହିଛନ୍ତି। ନିୟମ ଅନୁଯାୟୀ ଏବଂ ଜେଲ୍ ମାନୁଆଲରେ ଉଲ୍ଲେଖ କରାଯାଇଥିବା ଅନୁଯାୟୀ ଜେଲ୍ ରେ ଥିବା ବ୍ୟକ୍ତିମାନଙ୍କୁ ମୁହାଁମୁହିଁ ସାକ୍ଷାତ କରିବାକୁ ଅନୁମତି ଦିଆଯାଇଛି। କିନ୍ତୁ ତାଙ୍କ (ମୁଖ୍ୟମନ୍ତ୍ରୀ କେଜରିୱାଲ)ଙ୍କ ପତ୍ନୀଙ୍କୁ ମୁହାଁମୁହିଁ ଭେଟିବାକୁ ଅନୁମତି ଦିଆଯାଉନାହିଁ।
ସଞ୍ଜୟ ସିଂହ ଆହୁରି ମଧ୍ୟ କହିଛନ୍ତି ଯେ ଜେଲ୍ ପ୍ରଶାସନ ମୁଖ୍ୟମନ୍ତ୍ରୀଙ୍କ ପତ୍ନୀଙ୍କୁ ଭେଟିବାକୁ ଦେଉନାହିଁ, କୁହାଯାଉଛି ଯେ ଆପଣ କାଚ କାନ୍ଥ ସେପଟେ ବସି ସାକ୍ଷାତ କରିପାରିବେ। ମୁଁ ଦାୟିତ୍ୱ ସହ କହୁଛି ଯେ ବ୍ୟାରେକରେ ଦୁର୍ଦ୍ଦାନ୍ତ ଅପରାଧୀଙ୍କୁ ମଧ୍ୟ ଭେଟିବାକୁ ସୁଯୋଗ ଦିଆଯାଏ, କିନ୍ତୁ ତିନି ଥର ନିର୍ବାଚିତ ମୁଖ୍ୟମନ୍ତ୍ରୀ ଥିବା ଏହି ବ୍ୟକ୍ତିଙ୍କୁ ସେପରି ସୁଯୋଗ ଦିଆଯାନାହିଁ, ଏହା ଏକ ଅତ୍ୟାଚାର ।
ସେ ଆହୁରି ମଧ୍ୟ କହିଛନ୍ତି ଯେ ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନଙ୍କୁ ପ୍ରଥମେ ଭେଟିବାକୁ ଅନୁମତି ଦିଆଯାଇଥିଲା, କିନ୍ତୁ ରାତିରେ ଏକ ମେଲ ଆସିଲା ଯେ ତାଙ୍କୁ ସୁରକ୍ଷା କାରଣରୁ ତାଙ୍କ ସହ ସାକ୍ଷାତ କରାଯାଇପାରିବ ନାହିଁ । ପରେ ପୁଣି ତାଙ୍କୁ କାଚ ସେପଟେ ସାକ୍ଷାତ କରିବାକୁ ଅନୁମତି ଦିଆଯାଇଥିଲା । ଏହା ଦ୍ବାରା ସେମାନେ କେଜ୍ରିଓ୍ବାଲ ଓ ଭଗଓ୍ବନ୍ତଙ୍କ ମନୋବଳ ଭାଙ୍ଗିବାକୁ ଉଦ୍ୟମ କରୁଛନ୍ତି ।