ଅଧିଷ୍ଠାତ୍ରୀ ଦେବୀ ମା’ ଭୈରବୀଙ୍କ ନବାନ୍ନ ଲଗ୍ନ ଧାର୍ଯ୍ୟ, ସେପ୍ଟେମ୍ବର ୧୧ରେ ଲାଗି ହେବ ନବାନ୍ନ

ବୌଦ୍ଧ ୨।୯: ପଶ୍ଚିମ ଓଡିଶାର ଗଣପର୍ବ ନୂଆଖାଇ ପାଇଁ ପରମ୍ପରା ଅନୁସାରେ ବୌଦ୍ଧର ଅଧିଷ୍ଠାତ୍ରୀ ଦେବୀ ମା’ ଭୈରବୀଙ୍କ ନବାନ୍ନ ଲଗ୍ନ ଧାର୍ଯ୍ୟ କରାଯାଇଛି । ଭାଦ୍ରବ ମାସ ଶୁକ୍ଳପକ୍ଷ ପଂଚମୀ ଶନିବାର ସେପ୍ଟେମ୍ବର ୧୧ ତାରିଖ  ସକାଳ ୧୦.୨୧ ରୁ ୧୨.୪୯  ମଧ୍ୟେ ଅଧିଷ୍ଠାତ୍ରୀ ଦେବୀ ମା’ ଭୈରବୀଙ୍କଠାରେ ନବାନ୍ନ ଭୋଗ ଲାଗିବ ।

ମା’ ଭୈରବୀଙ୍କ ପୀଠରେ ପ୍ରଥମେ ନବାନ୍ନ ଲାଗି ହେବା ପରେ ଅନ୍ୟ ଦେବାଦେବୀଙ୍କ ଠାରେ ନବାନ୍ନ ଅର୍ପଣ କରାଯିବା ପରେ ଜନସାଧାରଣ ନିଜ ନିଜ ଇଷ୍ଟ ଦେବାଦେବୀଙ୍କଠାରେ ନବାନ୍ନ ଅର୍ପଣ କରି ନବାନ୍ନ ଗ୍ରହଣ କରିବେ ବୋଲି ମୁଖ୍ୟ ପୂଜକ ଗୌରୀଶଙ୍କର ବଡମାଳୀ ପ୍ରକାଶ କରିଛନ୍ତି ।

ବ୍ରାହ୍ମଣ ସମାଜର ପଣ୍ଡିତମାନଙ୍କ ମଧ୍ୟରେ ଆଲୋଚନା କରାଯାଇ ଲଗ୍ନ ଧାର୍ଯ୍ୟ ସଂପର୍କିତ ମତାମତ ନିଆଯିବା ପରେ ସର୍ବସମ୍ମତି କ୍ରମେ ଲଗ୍ନ ଧାର୍ଯ୍ୟ  କରାଯାଇଛି । ଲଗ୍ନ ଧାର୍ଯ୍ୟ କରାଯିବା ପରେ ମା’ ଭୈରବୀଙ୍କଠାରେ ଲଗ୍ନ ପତ୍ର ସମର୍ପଣ କରାଯାଇଥିଲା ।  ଏହି ଅବସରରେ ପାଳିଆ ପୂଜକ ସାନନ୍ଦ ବଡମାଳି, ପୂଜକ ହରିହର ବଡମାଳୀ ପ୍ରମୁଖ ଉପସ୍ଥିତ ରହିଥିଲେ ।