ଖୁବଶୀଘ୍ର ତାମିଲନାଡୁର ରିମୋର୍ଟ କଣ୍ଟ୍ରୋଲ ତାମିଲନାଡୁ ଚାଲିଯିବେ:ସ୍ମୃତି ଇରାନୀ

ଭୁବନେଶ୍ୱର: ଚଳିତ ନିର୍ବାଚନରେ କେନ୍ଦ୍ର ବିଜେପି ନେତାମାନେ ବାରମ୍ବାର ଆସି ଓଡିଶାରେ ନିର୍ବାଚନ ପ୍ରଚାର କରୁଛନ୍ତି।  ଏହି କ୍ରମରେ ଆଜି ବିଜେପିରେ ଫାୟାରବ୍ରାଣ୍ଡ ନେତ୍ରୀ କୁହାଯାଉଥିବା କେନ୍ଦ୍ରମନ୍ତ୍ରୀ ସ୍ମୃତି ଇରାନୀ କେନ୍ଦ୍ରାପଡା ଜିଲ୍ଲା ଆଳି ନିର୍ବାଚନ ମଣ୍ଡଳୀରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି । ଆଜି ଆଳିରେ ଆୟୋଜିତ ଜନସଭାକୁ ସମ୍ବୋଧନ କରି ସ୍ମୃତି ଇରାନୀ କହିଛନ୍ତି, ଆମେଥିରୁ ଗାନ୍ଧି ପରିବାରର ବେଡିଂ ବିସ୍ତର ଆମେ ବାନ୍ଧି ଦେଇଛୁ। ତେଣୁ କେନ୍ଦ୍ରାପଡ଼ାରୁ ବି ତାମିଲନାଡୁ ରିମୋଟ୍ର ବେଡିଂ ବିସ୍ତର ବାନ୍ଧି ଦିଅନ୍ତୁ। ସ୍ୱର ଏପରି ଉଚ୍ଚାରଣ କରନ୍ତୁ ଯେପରି ତାହା ସିଧା ତାମିଲନାଡୁ ରିମୋଟରେ ପହଞ୍ଚିଯିବ।

କେନ୍ଦ୍ରାପଡ଼ା ବାସୀ ବର୍ଷ ବର୍ଷ ଧରି ମେଡିକାଲ କଲେଜ ଦାବି କରୁଥିବା ବେଳେ ତାହା କାହିଁକି ପୂରଣ ହେଉନି ବୋଲି ସେ ପ୍ରଶ୍ନ ପଚାରିଛନ୍ତି? ଏଥିସହ କହିଛନ୍ତି, ମୋଦି ଚାଷୀଙ୍କୁ ୬ ହଜାର ଦେଲେ, ହେଲେ ତାମିଲ ଠିକାଦାର ତାହାକୁ ଖାଇଗଲେ। ମୋଦି ଜଳ ଜୀବନ ମିଶନ ପାଇଁ ଟଙ୍କା ଦେଲେ, ତାମିଲ ଠିକାଦାର ନେଇଗଲେ। ଆବାସ ପାଇଁ ମୋଦି ଟଙ୍କା ଦେଲେ, ଠିକା ନେଲେ ତାମିଲନାଡୁ ରିମୋଟ୍ କଣ୍ଟ୍ରୋଲ।

ରତ୍ନଭଣ୍ଡାର ଚାବି କାହିଁକି ହଜିଲା ସମସ୍ତେ ପ୍ରଶ୍ନ କରୁଛନ୍ତି। ଚାବି ରିପୋର୍ଟ କାହିଁକି ଚାପି ବସିଛନ୍ତି ତାମିଲ ଠିକାଦାର ବୋଲି ପ୍ରଶ୍ନ ପଚାରି ବର୍ଷିଛନ୍ତି ମନ୍ତ୍ରୀ ଇରାନୀ। ଏଥିସହ ସେ କହିଛନ୍ତି, ଆମ ସରକାର ଆସିଲେ ରିପୋର୍ଟ ସାର୍ବଜନୀନ ହେବ। ଅଧର୍ମୀଙ୍କୁ ଧୂଳି ଚଟାଯିବ ବୋଲି ବି ସେ ଚେତାବନୀ ଦେଇଛନ୍ତି। ଏଥିସହ ସେ କହିଛନ୍ତି, ଓଡ଼ିଶା ଲୋକ ଚାହାନ୍ତି, ମୋଦିଙ୍କ ଗ୍ୟାରେଣ୍ଟି। ବିଜେପି ଆସିଲେ ସୁଭଦ୍ରା ଯୋଜନାରେ ୫୦ ହଜାର ମିଳିବ । ବିକାଶର ଲକ୍ଷ୍ମୀଙ୍କୁ ଘରକୁ ଆଣିବାକୁ ଜନତାଙ୍କୁ ଆହ୍ୱାନ ଦେଇଛନ୍ତି ସ୍ମୃତି ଇରାନୀ।

ଏହି ଅବସରରେ କେନ୍ଦ୍ରାପଡ଼ା ଲୋକସଭା ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତକୁ ବଦଳାଇ ସାରିଛନ୍ତି। ୨୫ କୋଟି ଲୋକଙ୍କୁ ଗରୀବ ସୀମାରେଖା ତଳୁ ଉଠାଇ ସାରିଛନ୍ତି। ତେଣୁ ଏଥର ସେ ପୁଣି ଥରେ ପ୍ରଧାନମନ୍ତ୍ରୀ ହେବା ସୁନିଶ୍ଚିତ। ଶାସକ ଦଳ ଯେଉଁପରି ନାରୀଙ୍କ ଉପରେ ନିର୍ଯାତନା କରିଛି, ଦୁଷ୍କର୍ମ, ହତ୍ୟା, ଅପହରଣ ମାମଲା ବଢ଼ି ଚାଲିଛି ତାହାକୁ ସମାପ୍ତ କରିବାର ସମୟ ଆସି ଯାଇଛି।କେନ୍ଦ୍ରାପଡ଼ାକୁ ରେଳ ଲାଇନ୍ ବିଛା ଯାଇ ସରିଛି। ତେଣୁ ଧାମରା-ପାରାଦୀପ ପୋର୍ଟର କରିଡ଼ର ହେବ କେନ୍ଦ୍ରାପଡ଼ା। ଏଥର ଦୀର୍ଘ ବର୍ଷର ଅପେକ୍ଷାର ଅନ୍ତ ଘଟିବ। କେନ୍ଦ୍ରାପଡ଼ାରେ ଶିଳ୍ପ ପ୍ରତିଷ୍ଠା ହେବ। ଫଳରେ ଏହି ଜିଲ୍ଲାର ଯୁବକଙ୍କୁ ଆଉ ବାହାର ରାଜ୍ୟକୁ ଯିବାକୁ ପଡ଼ିବନି ବୋଲି କହିଛନ୍ତି ବୈଜୟନ୍ତ ପଣ୍ଡା।