ଅଂଶୁଘାତ ମୁକାବିଲା ପାଇଁ ବୈଠକ ପ୍ରସ୍ତୁତି

ବାଙ୍କୀ: ବାଙ୍କୀ ପ୍ରଶାସନ ପକ୍ଷରୁ ଗ୍ରୀଷ୍ମ ଋତୁରେ  ଅଂଶୁଘାତର ମୁକାବିଲା ପାଇଁ ଆଜି ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଉପଜିଲ୍ଲାପାଳ ରଞ୍ଜନ କୁମାର ଜେନାଙ୍କ ଅଧ୍ୟକ୍ଷତାରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ କାର୍ଯ୍ୟକ୍ରମରେ ବିଭିନ୍ନ କାର୍ଯ୍ୟାଳୟର ପଦାଧିକାରୀ, ବୁଦ୍ଧିଜିବୀ ଓ ଗଣମାଧ୍ୟମ ପ୍ରତିନିଧି ଯୋଗଦେଇ ଆଲୋଚନାରେ ଅଂଶଗ୍ରହଣ କରିବା ସହିତ ଅଂଶୁଘାତ ପରିଚାଳନା ପାଇଁ ଆବଶ୍ୟକ କାର୍ଯ୍ୟଧାରା ସମ୍ପର୍କରେ ମତ ରଖିଥିଲେ। ପାନୀୟଜଳ ଅଭାବ ଅଞ୍ଚଳରେ ପାନୀୟଜଳ ଯୋଗାଣ ବିଭାଗ ଗ୍ରାମାଞ୍ଚଳରେ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇବା ସହିତ ବାଙ୍କୀ ଏନଏସି ଅଞ୍ଚଳରେ ମଧ୍ୟ ସମାନ ପରିମାଣରେ ଦୃଷ୍ଟି ଦେବାପାଇଁ ଉପଜିଲ୍ଲାପାଳ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଉପଖଣ୍ଡ ଚିକିତ୍ସାଳୟ, ଡମପଡା ଗୋଷ୍ଠୀ ଚିକିତ୍ସାଳୟ ଏବଂ ସୁବର୍ଣ୍ଣପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଶୀତତାପ ନିୟନ୍ତ୍ରଣ କକ୍ଷ ପ୍ରସ୍ତୁତ ରଖିବାକୁ ପରାମର୍ଶ ଦିଆଯାଇଛି। ଦିନ ୧୧ଟାରୁ ୩ଘଟିକା ପର୍ଯ୍ୟନ୍ତ ମଜୁରୀ କାମ ବନ୍ଦ ରହିବ, ଯାତାୟତ କରୁଥିବା ଯାତ୍ରୀବାହୀ ବସ୍‍ ଗୁଡିକରେ ପାନୀୟଜଳ ବ୍ୟବସ୍ଥା, ଓଆରଏସ ଏବଂ ପ୍ରାଥମିକ ଚିକିତ୍ସା ସହାୟତାର ବ୍ୟବସ୍ଥା ଗାଡି ମାଲିକମାନେ ପ୍ରଦାନ କରିବା ପାଇଁ କାର୍ଯ୍ୟକାରୀ ହେଉଥିବା ମୋଟର ମାଲିକ ସଂଘକୁ ପରାମର୍ଶ ଦିଆଯାଇଛି। ସେହିପରି ପଶୁପକ୍ଷୀମାନଙ୍କୁ ଅଂଶୁଘାତରୁ ରକ୍ଷା କରିବା ପାଇଁ ନଳକୂଅ ନିକଟରେ ଚୁଆ ଖୋଳିବା, ପଥଚାରୀମାନଙ୍କ ପାଇଁ ନିର୍ଦ୍ଧାରିତ ସ୍ଥାନରେ ଆବଶ୍ୟକ ଜଳଛତ୍ର ଖୋଲିବା, ସମସ୍ତ ବିଭାଗରେ ୨୪ଘଣ୍ଟିଆ କଣ୍ଟ୍ରୋଲରୁମ ଖୋଲିବା ସମ୍ପର୍କରେ ଆଲୋଚନା କରାଯାଇଛି। ଅଂଶୁଘାତରେ ମୃତାହତ ଶୂନ ପାଇଁ ଦୃଷ୍ଟି ଦିଆଯିବ। କୌଣସି ପରିସ୍ଥିତିରେ ଅଂଶୁଘାତ ପ୍ରଭାବରେ କୌଣସି ବ୍ୟକ୍ତିର ମୃତ୍ୟୁ ହେଲେ ତୁରନ୍ତ ତହସିଲଦାରଙ୍କୁ ଜଣାଇବା ଏବଂ ତହସିଲଦାର ଓ ଉପଖଣ୍ଡ ଚିକିତ୍ସାଧିକାରୀଙ୍କ ଯୁଗ୍ମ ତଦନ୍ତ ବିବରଣୀ ଉପଜିଲ୍ଲାପାଳଙ୍କୁ ଜଣାଇବା ପାଇଁ ଆଲୋଚନା କରାଯାଇଛି। ଏହି ବୈଠକରେ ଡମପଡା ତହସିଲଦାର କ୍ଷୀତିସ ବେହେରା, ବାଙ୍କୀ ଏନଏସି ନିର୍ବାହୀ ଅଧିକାରୀ ଯୋଗେଶ୍ୱର ନାୟକ, ଡାକ୍ତର ପଦ୍ମ ଲୋଚନ ପଣ୍ଡା, ଡମପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧିକ୍ଷିକା ପୁଷ୍ପଲତା ମହାପାତ୍ର, ଭାରପ୍ରାପ୍ତ ସୂଚନା ଓ ଲୋକସମ୍ପର୍କ ଅଧିକାରୀ କାଳୀଚରଣ ତ୍ରିପାଠୀ, ସହକାରୀ ଜିଲ୍ଲାପାଳ ଦେବେନ୍ଦ୍ର ଖଟୁଆ, ସୀତାକାନ୍ତ ରାଉତ ପ୍ରମୁଖ ବହୁ ବିଭାଗୀୟ ଅଧିକାରୀ ଉପସ୍ଥିତ ଥିଲେ।