୮୦ କୋଟିରୁ ଅଧିକ ଆୟ କରି ସାରିଲାଣି ‘ଦ କେରଳ ଷ୍ଟୋରି
ନୂଆଦିଲ୍ଲୀ: ରିଲିଜ୍ ପୂର୍ବରୁ ବିବାଦ ଘେରକୁ ଚାଲି ଆସିଥିବା ଚଳଚ୍ଚିତ୍ର ‘ଦ କେରଳ ଷ୍ଟୋରି’ ରିଲିଜ୍ ହେବାର ସପ୍ତାହକ ମଧ୍ୟରେ ୮୦ କୋଟିରୁ ଅଧିକ ଆୟ କରିଲାଣି ବୋଲି କହିଛନ୍ତି ନିର୍ଦ୍ଦେଶକ ସୁଦୀପ୍ତ ସେନ।
ନିର୍ଦ୍ଦେଶକ ସେନ୍ କହିଛନ୍ତି ଯେ କେରଳ ଷ୍ଟୋରି ବକ୍ସ ଅଫିସରେ ଅତୁଟ ରହିଛି। ପଶ୍ଚିମବଙ୍ଗରେ ବ୍ୟାନ୍ ସତ୍ତ୍ୱେ ଏହି ଫିଲ୍ମ ଟଙ୍କା ରୋଜଗାର କରୁଛି। ବାସ୍ତବରେ ଏହା ରିଲିଜ୍ ହେବାର ମାତ୍ର ଏକ ସପ୍ତାହ ବିତିଯାଇଛି ଏବଂ ଏହା ୧୦୦ କୋଟି ଛୁଇଁବାର ନିକଟତର ହୋଇସାରିଛି। ଦ୍ଵିତୀୟ ଶନିବାର ସୁଦ୍ଧା ନିଶ୍ଚିତ ଭାବେ ଏହି ସଂଖ୍ୟା ଅତିକ୍ରମ କରିବ। ଦର୍ଶକଙ୍କ ଠାରୁ ଏଭଳି ସ୍ୱାଗତ ପାଇବା ପରେ ନିର୍ଦ୍ଦେଶକ ସୁଦୀପ୍ତ ସେନ ଟ୍ଵିଟରରେ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି।
ନିର୍ଦ୍ଦେଶକ ସୁଦୀପ୍ତ ସେନ୍ ତାଙ୍କ ଫିଲ୍ମ ’ଦ କେରଳ ଷ୍ଟୋରି’କୁ ନେଇ ଖୁସି ଅଛନ୍ତି ଏବଂ ମାତ୍ର ୭ ଦିନରେ ୮୧ କୋଟି ଟଙ୍କା ଆୟ କରିଛନ୍ତି। ମେ’ ୮ ତାରିଖରୁ ପଶ୍ଚିମବଙ୍ଗରେ ଏହି ଫିଲ୍ମକୁ ବ୍ୟାନ୍ କରାଯାଇଛି। ସେହିପରି ୟୁପି, ହରିୟାଣା ଓ ମଧ୍ୟପ୍ରଦେଶରେ ଏହାକୁ ଟିକସ ମୁକ୍ତ କରାଯାଇଛି। ଫିଲ୍ମକୁ ମିଳିଥିବା ବିପୁଳ ଭଲପାଇବା ଉପରେ ପ୍ରତିକ୍ରିୟା ଦେଇ ସେ ଲେଖିଛନ୍ତି, ଭାରତରେ ଏପର୍ଯ୍ୟନ୍ତ ୬୦ ଲକ୍ଷରୁ ଅଧିକ ଲୋକ ଏହି ଫିଲ୍ମକୁ ଦେଖି ସାରିଲେଣି। ଆଜିଠାରୁ ଆରମ୍ଭ ହେଉଛି ନୂଆ ଅଧ୍ୟାୟ। କେରଳ ଷ୍ଟୋରି ୪୦ରୁ ଅଧିକ ଦେଶରେ ଏକାଠି ରିଲିଜ କରୁଛି। ଅଧିକରୁ ଅଧିକ ସଂଖ୍ୟା ଯୋଡିବାକୁ ଯାଉଛି। ଅଧିକରୁ ଅଧିକ ଆଶୀର୍ବାଦ, ଭଲପାଇବା ଏବଂ ପ୍ରଶଂସା ଆମକୁ ପ୍ରଭାବିତ କରିବ। ଆମେ ଅଧିକ ଦାୟିତ୍ୱବାନ ଅନୁଭବ କରିବୁ।
ସୁଦୀପ୍ତ ସେନଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମରେ ଦର୍ଶାଯାଇଛି ଯେ କେରଳର ମହିଳାମାନଙ୍କୁ କିପରି ଇସଲାମ ଧର୍ମ ଗ୍ରହଣ କରିବାକୁ ବାଧ୍ୟ କରାଯାଇଥିଲା ଏବଂ ଆତଙ୍କବାଦୀ ସଂଗଠନ ଆଇଏସଆଇଏସ ଦ୍ୱାରା ନିଯୁକ୍ତି ଦିଆଯାଇଥିଲା। ଗତ ସପ୍ତାହରେ ମୁକ୍ତିଲାଭ କରିବା ପରଠାରୁ ଏହି ଚଳଚ୍ଚିତ୍ର ବିବାଦର କେନ୍ଦ୍ରବିନ୍ଦୁରେ ରହିଛି।