ଆସନ୍ତା ୩ରୁ ଟିକା ନେବେ୧୫-୧୮ ବର୍ଷ ବୟସ୍କ ପିଲା, ଆଜିଠୁ କୋଓ୍ୱିନ୍ରେ ପଞ୍ଜିକରଣ
ନୂଆଦିଲ୍ଲୀ ୦୧।୦୧: କାୟା ମେଲାଉଛି ଓମିକ୍ରନ୍ । ତାମଧ୍ୟରେ ୧୫-୧୮ ବର୍ଷର ପିଲାଙ୍କୁ ଟିକାକରଣ ନେଇ ପ୍ରସ୍ତୁତି ଶେଷ ପର୍ଯ୍ୟାୟରେ । ୧୫-୧୮ ବର୍ଷ ବୟସ୍କ ପିଲାମାନେ ଟିକା ନେବା ପାଇଁ ଆଜିଠୁ ଆରମ୍ଭ ହେବ ପଞ୍ଜିକରଣ । କୋୱିନ ପ୍ଲାଟଫର୍ମରେ ଅନଲାଇନ ଜରିଆରେ ପଞ୍ଜୀକରଣ କରାଇପାରିବେ । ପିଲାଙ୍କ ଟିକାକରଣ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୫ ଡିସେମ୍ବରରେ କରିଥିବା ଘୋଷଣା ଅନୁଯାୟୀ, ୧୫-୧୮ ବର୍ଷ ବୟସ୍କ ପିଲାମାନଙ୍କ ପାଇଁ ସୋମବାର ୩ ତାରିଖ ଠାରୁ ଟିକାକରଣ ଆରମ୍ଭ କରାଯିବ। ଅନଲାଇନ ପଞ୍ଜୀକରଣ ନ କରିପାରିଲେ ଜାନୁଆରୀ ୩ରୁ ଟିକାକରଣ ଆରମ୍ଭ ହେବା ପରେ ନିଜେ ଟିକା କେନ୍ଦ୍ରକୁ ଯାଇ କୋୱିନ ଅଫଲାଇନ ପଞ୍ଜୀକରଣର ଲାଭ ନେଇପାରିବେ। ଯେଉଁମାନଙ୍କର ଜନ୍ମ ୨୦୦୭ କିମ୍ବା ତା’ପୂର୍ବରୁ ହୋଇଛି କେବଳ ସେହିମାନେ ହିଁ ଟିକା ନେବା ପାଇଁ ଯୋଗ୍ୟ ଅଟନ୍ତି।
ସେପଟେ ଟିକାକରଣ କେନ୍ଦ୍ରରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ୧୫-୧୮ ବର୍ଷ ବୟସ୍କ ପିଲାମାନଙ୍କୁ ଦୃଷ୍ଟିରେ ରଖି ସମସ୍ତ ବ୍ୟବସ୍ଥା କରାଯାଇଛି । ଏପରିକି କେତେକ ଟିକାଦାନ କେନ୍ଦ୍ରରେ କାର୍ଟୁନର ଚିତ୍ର ହୋଇଛି । ପିଲାମାନଙ୍କୁ ଟିକାଦାନ କେନ୍ଦ୍ରକୁ ଆକୃଷ୍ଟ କରିବା ପାଇଁ ଏପରି ବ୍ୟବସ୍ଥା କରାଯାଇଛି । ଓମିକ୍ରନ୍ ସଂକ୍ରମଣର ଭୟ ମଧ୍ୟରେ ପିଲାମାନଙ୍କୁ ଟିକାଦାନ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟ ବୋଲି ବିଶେଷଜ୍ଞମାନେ କହିଛନ୍ତି ।