ବାରବାଟୀରେ ଟ୍ବେଣ୍ଟି-୨୦: ଡିସେମ୍ବରରେ ଭାରତ-ଦକ୍ଷିଣ ଆଫ୍ରିକା
ଭୁବନେଶ୍ବର: ମାତ୍ର ୧୧ ମାସ ଭିତରେ ବାରବାଟୀ ଷ୍ଟାଡିୟମ୍ ଦ୍ବିତୀୟ ଥର ପାଇଁ ଏକ ଅନ୍ତର୍ଜାତୀୟ ମ୍ୟାଚ୍ ଆୟୋଜନ କରିବାକୁ ଯାଉଛି। ଡିସେମ୍ବର ମାସରେ ଭାରତ ଗସ୍ତରେ ଦକ୍ଷିଣ ଆଫ୍ରିକା ଦଳ ଖେଳିବାକୁ ଥିବା ୫ ମ୍ୟାଚ୍ ଟ୍ବେଣ୍ଟି-୨୦ ଶୃଙ୍ଖଳାର ପ୍ରଥମ ମ୍ୟାଚ୍ ବାରବାଟୀରେ ଖେଳାଯିବ ବୋଲି ସୂଚନା ମିଳିଛି।
ଶୃଙ୍ଖଳାର ପରବର୍ତ୍ତୀ ମ୍ୟାଚ୍ଗୁଡ଼ିକ ଯଥାକ୍ରମେ ନାଗପୁର (ଡିସେମ୍ବର ୧୧), ଧର୍ମଶାଳା (ଡିସେମ୍ବର ୧୪), ଲକ୍ଷ୍ନୌ (ଡିସେମ୍ବର ୧୭), ଅହମଦାବାଦ (ଡିସେମ୍ବର ୧୯)ରେ ଖେଳାଯିବ। କୋଲକାତାରେ ଶନିବାର ଆଇପିଏଲ୍ର ଉଦ୍ଘାଟନୀ ଉତ୍ସବ ପୂର୍ବରୁ ଅନୁଷ୍ଠିତ ବିସିସିଆଇର ଆପେକ୍ସ କାଉନସିଲ୍ ବୈଠକ ଶେଷରେ ଏହି ସୂଚନା ଦିଆଯାଇଛି। ବାରବାଟୀରେ ମଧ୍ୟ ଏହା ଚତୁର୍ଥ ଟ୍ବେଣ୍ଟି-୨୦ ଅନ୍ତର୍ଜାତୀୟ ହେବ। ପୂର୍ବ ତିନିଟିରୁ ଦୁଇଟିରେ ଦକ୍ଷିଣ ଆଫ୍ରିକା ଖେଳିବା ସହ ବିଜୟୀ ହୋଇଥିଲା। ଭାରତର ଏକମାତ୍ର ବିଜୟ ୨୦୧୭ରେ ଶ୍ରୀଲଙ୍କା ବିପକ୍ଷ ମ୍ୟାଚ୍ରୁ ମିଳିଥିଲା। ୨୦୧୫ ଏବଂ ୨୦୨୨ରେ ଦକ୍ଷିଣ ଆଫ୍ରିକା ଖେଳି ବିଜୟୀ ହୋଇଥିଲା। ସୂଚନାଯୋଗ୍ୟ, ବାରବାଟୀ ଷ୍ଟାଡିୟମ୍ ଚଳିତ ବର୍ଷ ଫେବ୍ରୁଆରି ୯ ତାରିଖରେ ଭାରତ-ଇଂଲଣ୍ଡ ଦିନିକିଆ ମ୍ୟାଚ୍ ଆୟୋଜନ କରିଥିଲା। ଗୋଟିଏ ବର୍ଷ ଭିତରେ ଦୁଇଟି ଅନ୍ତର୍ଜାତୀୟ ମ୍ୟାଚ୍ ଆୟୋଜନ କରିବା ବାରବାଟୀ ପାଇଁ ଦ୍ବିତୀୟ ଉଦାହରଣ ହେବ। ପ୍ରଥମ ତଥା ଶେଷ ଥର ପାଇଁ ୧୯୮୭ ଜାନୁଆରିରେ ଭାରତ-ଶ୍ରୀଲଙ୍କା ଟେଷ୍ଟ୍ ଏବଂ ଅକ୍ଟୋବର ଜିମ୍ବାୱେ-ଅଷ୍ଟ୍ରେଲିଆ ଦିନିକିଆ ବିଶ୍ବକପ୍ ମ୍ୟାଚ୍ ଖେଳାଯାଇଥିଲା।
ଭାରତ ଗସ୍ତରେ ଟ୍ବେଣ୍ଟି-୨୦ ଶୃଙ୍ଖଳା ପୂର୍ବରୁ ଦକ୍ଷିଣ ଆଫ୍ରିକା ନଭେମ୍ବରରେ ଅନୁଷ୍ଠିତ ହେବାକୁ ଥିବା ଟେଷ୍ଟ୍ ଶୃଙ୍ଖଳାର ଦ୍ବିତୀୟ ଟେଷ୍ଟ୍ ଗୁଆହାଟୀରେ ଖେଳାଯିବ। ଏହା ହେଲେ ଗୁଆହାଟୀ ଟେଷ୍ଟ୍ କ୍ରିକେଟ୍ରେ ପଦାର୍ପଣ କରିବ। ଏହା ପୂର୍ବରୁ ଦିଲ୍ଲୀରେ ପ୍ରଥମ ଟେଷ୍ଟ୍ ଖେଳାଯିବ। ଉଭୟ ୩ ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳା ଖେଳିବେ। ଏହି ତିନିଟି ମ୍ୟାଚ୍ ରାଞ୍ଚି, ରାୟପୁର ଓ ବିଶାଖାପାଟଣାରେ ଖେଳାଯିବ।