ବିଜୟ, ଶିବ ଓଡ଼ିଶା ଭଲିବଲ୍ ସଂଘ ଉପସଭାପତି
ଭୁବନେଶ୍ବର: ଓଡ଼ିଶା ଭଲିବଲ୍ ସଂଘ (ଓଭିଏ)ର କାର୍ଯ୍ୟକାରିଣୀ ପରିଷଦ ବୈଠକ ରବିବାର କଟକସ୍ଥିତ ବାରବାଟୀ ଷ୍ଟାଡିୟମ କାଉନସିଲ ହଲ୍ରେ ଅନୁଷ୍ଠିତ ହୋଇଯାଇଛି। ସଂଘର କାର୍ଯ୍ୟକାରୀ ସଭାପତି କମଳା କାନ୍ତ ପାଣ୍ଡେଙ୍କ ତତ୍ତ୍ବାବଧାନରେ ଆୟୋଜିତ ଏହି ବୈଠକରେ ଦୁଇ ଜଣ ଉପସଭାପତିଙ୍କୁ ମନୋନୀତ କରାଯାଇଥିଲା। ସଭାପତି ଅଚ୍ୟୁତ ସାମନ୍ତଙ୍କ ଅନୁମୋଦନ କ୍ରମେ ଯାଜପୁରର ବିଜୟ କୁମାର ଧଳ ଏବଂ କନ୍ଧମାଳର ଶିବ ପ୍ରସାଦ ତ୍ରିପାଠୀଙ୍କୁ ଉପସଭାପତି ଦାୟିତ୍ବ ମିଳିଥିଲା।ନୂତନ ଭାବେ ମନୋନୀତ ଦୁଇ ଉପସଭାପତିଙ୍କୁ ବୈଠକ ସମୟରେ ଫୁଲତୋଡ଼ା ଦେଇ ସ୍ବାଗତ କରାଯାଇଥିଲା। ବୈଠକରେ ସଂଘର ଉପସଭାପତି ଜନାର୍ଦ୍ଦନ ଦାଶ ଓ ସମ୍ପାଦକ ଗଗନେନ୍ଦୁ ଦାଶ ସଂଘର ବିଭିନ୍ନ କାର୍ଯ୍ୟକ୍ରମ ଉପରେ ସଦସ୍ୟମାନଙ୍କୁ ସୂଚନା ଦେଇଥିଲେ। ଶେଷରେ ବରିଷ୍ଠ ଉପସଭାପତି ସୟଦ ଅକମଲ ଅଲୀ ଧନ୍ୟବାଦ ଅର୍ପଣ କରିଥିଲେ।