ଆମେରିକା-ଇରାନ ଉତ୍ତେଜନା ମଧ୍ୟରେ ତେଲ ଟ୍ୟାଙ୍କର ‘ଦେଶ ଗରିମା’ ହର୍ମୁଜ୍ ପ୍ରଣାଳୀ ପାର କରି ଭାରତରେ ପହଞ୍ଚିଲା

ଭାରତୀୟ ତୈଳ ଟ୍ୟାଙ୍କର୍ ‘ଦେଶ ଗରିମା’ ହର୍ମୁଜ୍ ପ୍ରଣାଳୀ ପାର ହୋଇ ଭାରତରେ ପହଞ୍ଚିଛି। ଦେଶ ଗରିମା ଅଶୋଧିତ ତୈଳ ଟ୍ୟାଙ୍କର୍ ବିପୁଳ ପରିମାଣର ତେଲ ନେଇ ଭାରତରେ ପହଞ୍ଚିଛି କିନ୍ତୁ ବର୍ତ୍ତମାନ ସମୁଦ୍ରରେ ଲଙ୍ଗର ପକାଇଛି। ଏହି ଜାହାଜ ମୁମ୍ବାଇ ଉପକୂଳରୁ କିଛି ନଟିକାଲ୍ ମାଇଲ୍ ଦୂରରେ ରହିଛି। ଏହି ଜାହାଜ ୧୮ ଏପ୍ରିଲରେ ହର୍ମୁଜ୍ ଛାଡିଥିଲା । ଭାରତୀୟ ପତାକା ଉଡ଼ାଇ ଏହି ଟ୍ୟାଙ୍କର୍ ଜାହାଜ ହର୍ମୁଜ୍ ପ୍ରଣାଳୀରେ ଆଇଆର୍‌ଜିସି ଦ୍ୱାରା ଗୁଳିଚାଳନା ପରେ ମଧ୍ୟ ଆଗକୁ ବଢ଼ି ଚାଲିଥିଲା ଏବଂ ବର୍ତ୍ତମାନ ସୁରକ୍ଷିତ ଭାବରେ ଭାରତରେ ପହଞ୍ଚିଛି। ସୂଚନା ଅନୁଯାୟୀ, ଏହି ଜାହାଜରେ ୩୧ ଜଣ ଭାରତୀୟ ନାବିକ ଅଛନ୍ତି। ଏହାର ସୁରକ୍ଷିତ ଆଗମନ ଇନ୍ଧନ ଅଭାବ ସମୟରେ ଆଶ୍ବସ୍ତି ଦେବ।ମଧ୍ୟପ୍ରାଚ୍ୟ ଉତ୍ତେଜନା ମଧ୍ୟରେ ମାର୍ଚ୍ଚ ମାସଠାରୁ ଦେଶ ଗରିମା ହେଉଛି ଦଶମ ଭାରତୀୟ ଜାହାଜ ଯାହା ହର୍ମୁଜ୍ ପ୍ରଣାଳୀ ଦେଇ ଦେଶରେ ପହଞ୍ଚିଛି। ଭାରତ ବାଣିଜ୍ୟ ଜାହାଜ ଏବଂ ନାବିକଙ୍କ ସୁରକ୍ଷା ସମ୍ପର୍କରେ ନିଜର ସ୍ଥିତି ସ୍ପଷ୍ଟ କରିଛି ଏବଂ ଇରାନକୁ ହର୍ମୁଜ୍ ପ୍ରଣାଳୀ ଦେଇ ଭାରତୀୟ ଜାହାଜଗୁଡ଼ିକୁ ସୁରକ୍ଷିତ ପଥ ପ୍ରଦାନ କରିବାକୁ ଦାବି କରିଛି। ଯୁଦ୍ଧ ମଧ୍ୟରେ ପରିବର୍ତ୍ତିତ ପରିସ୍ଥିତି ଏବଂ ତୈଳ ସଙ୍କଟ ସମୟରେ ଇରାନ ପୂର୍ବରୁ ଭାରତକୁ ସହାୟତା ଯୋଗାଇଛି। ଭାରତ ଏବଂ ଇରାନ ମଧ୍ୟରେ ସମ୍ପର୍କ ସର୍ବଦା ସୌହାର୍ଦ୍ଦ୍ୟପୂର୍ଣ୍ଣ ରହିଛି।