ସ୍ନାନପୂର୍ଣ୍ଣିମାରେ ଭକ୍ତିର ମହାସମୁଦ୍ର , ସାହାଣମେଲାରେ ମହାପ୍ରଭୁଙ୍କ ଦିବ୍ୟ ଦର୍ଶନ

ଆଜି ପବିତ୍ର ସ୍ନାନପୂର୍ଣ୍ଣିମା । ମର୍ତ୍ତ୍ୟ ବୈକୁଣ୍ଠ ପୁରୀରେ ଭକ୍ତି ଓ ଆସ୍ଥାର ଅପୂର୍ବ ସଙ୍ଗମ ଦେଖିବାକୁ ମିଳିଛି । ସ୍ନାନବେଦିରେ ବିରାଜମାନ ମହାପ୍ରଭୁ ଶ୍ରୀଜଗନ୍ନାଥ, ବଡ଼ ଠାକୁର ଶ୍ରୀବଳଭଦ୍ର ଓ ଦେବୀ ସୁଭଦ୍ରାଙ୍କ ଦିବ୍ୟ ଦର୍ଶନ ପାଇଁ ପୁରୀରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଛି । ବଡ଼ଦାଣ୍ଡଠାରୁ ସ୍ନାନମଣ୍ଡପ ପର୍ଯ୍ୟନ୍ତ ସବୁଠି କେବଳ ଭକ୍ତଙ୍କ ଭିଡ଼, ହରିନାମ ସଂକୀର୍ତ୍ତନ ଓ “ଜୟ ଜଗନ୍ନାଥ” ଧ୍ୱନିରେ ପ୍ରକମ୍ପିତ ହେଉଛି ସମଗ୍ର ପରିବେଶ । ସ୍ନାନଯାତ୍ରାର ସବୁଠୁ ଆକର୍ଷଣୀୟ ନୀତି ହେଉଛି ସାହାଣମେଲା ଦର୍ଶନ । ବର୍ଷର କେତେକ ବିରଳ ଅବସର ମଧ୍ୟରୁ ଏହା ଅନ୍ୟତମ, ଯେତେବେଳେ ଭକ୍ତମାନେ ଅତି ନିକଟରୁ ମହାପ୍ରଭୁଙ୍କ ଦିବ୍ୟ ରୂପକୁ ଦର୍ଶନ କରିବାର ସୌଭାଗ୍ୟ ପାଆନ୍ତି । ଏହି ଦର୍ଶନ ପାଇଁ ସକାଳଠାରୁ ଶ୍ରଦ୍ଧାଳୁମାନେ ଧୈର୍ଯ୍ୟର ସହ ଧାଡ଼ିରେ ଅପେକ୍ଷା କରୁଛନ୍ତି ।କାହା ହାତରେ ତୁଳସୀ, କାହା ହାତରେ ନଡ଼ିଆ, ଆଉ କାହା ଆଖିରେ କେବଳ ପ୍ରଭୁଙ୍କୁ ଦେଖିବାର ଅପାର ଆକାଂକ୍ଷା । ସାହାଣମେଲାରେ ପ୍ରଭୁଙ୍କ ଦର୍ଶନ କରିବା ପରେ ଅନେକ ଭକ୍ତ ଭାବବିହ୍ୱଳ ହୋଇପଡ଼ୁଛନ୍ତି । କାହାର ଆଖିରୁ ଆନନ୍ଦାଶ୍ରୁ ଝରୁଛି, ତ କାହାର ଓଠରେ କେବଳ ଗୋଟିଏ ଶବ୍ଦ—”ଜୟ ଜଗନ୍ନାଥ” । ଭକ୍ତମାନଙ୍କ ବିଶ୍ୱାସ, ସ୍ନାନପୂର୍ଣ୍ଣିମା ଦିନ ସାହାଣମେଲାରେ ମହାପ୍ରଭୁଙ୍କ ଦର୍ଶନ କଲେ ସମସ୍ତ ପାପ କ୍ଷୟ ହୁଏ ଏବଂ ଜୀବନ ଧନ୍ୟ ହୋଇଯାଏ । ପୁରୀ ବଡ଼ଦାଣ୍ଡ ଆଜି ସତେ ଯେପରି ଭକ୍ତିର ମହାସାଗର ପାଲଟିଛି । ଘଣ୍ଟଘଣ୍ଟା, ମୃଦଙ୍ଗ, ଝାଞ୍ଜ ଓ ଶଙ୍ଖଧ୍ୱନିରେ ସାରା ଶ୍ରୀକ୍ଷେତ୍ର ଗୁଞ୍ଜରିତ । ଦେଶର କୋଣ ଅନୁକୋଣରୁ ଆସିଥିବା ଭକ୍ତଙ୍କ ସହ ବିଦେଶୀ ପର୍ଯ୍ୟଟକମାନେ ମଧ୍ୟ ଏହି ଅପୂର୍ବ ଆଧ୍ୟାତ୍ମିକ ପରିବେଶରେ ନିଜକୁ ସାମିଲ କରିଛନ୍ତି ।

ସ୍ନାନବେଦିରେ ବିରାଜମାନ ଚକାନୟନଙ୍କୁ ଦେଖିବା ପାଇଁ ଲକ୍ଷ ଲକ୍ଷ ଆଖି ଚାହିଁ ରହିଛି । ମହାପ୍ରଭୁଙ୍କ ଦିବ୍ୟ ମୁଖମଣ୍ଡଳର ଗୋଟିଏ ଝଲକ ପାଇବା ମାତ୍ରେ ଭକ୍ତମାନେ ନିଜକୁ କୃତାର୍ଥ ମନେ କରୁଛନ୍ତି । ଲାଗୁଛି ଯେପରି ଭକ୍ତ ଓ ଭଗବାନଙ୍କ ମଧ୍ୟରେ ଆଜି ଏକ ନିରବ ଆତ୍ମିକ ସମ୍ବାଦ ଚାଲିଛି । ସ୍ନାନପୂର୍ଣ୍ଣିମା କେବଳ ଏକ ପର୍ବ ନୁହେଁ, ଏହା ହେଉଛି ଭକ୍ତି, ଆସ୍ଥା, ସମର୍ପଣ ଓ ସନାତନ ପରମ୍ପରାର ଏକ ଜୀବନ୍ତ ମହୋତ୍ସବ । ଆଜିର ଏହି ସାହାଣମେଲା ଦର୍ଶନ ପ୍ରମାଣ କରିଦେଇଛି ଯେ, ଯୁଗ ବଦଳିପାରେ, ସମୟ ବଦଳିପାରେ, କିନ୍ତୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପ୍ରତି ଭକ୍ତଙ୍କ ଅଟୁଟ ବିଶ୍ୱାସ ଓ ଅପାର ଭକ୍ତି କେବେ ବଦଳିବ ନାହିଁ । “ଜୟ ଜଗନ୍ନାଥ”ର ଧ୍ୱନି ସହ ଆଜି ସମଗ୍ର ପୁରୀ ଭକ୍ତିର ମହାସାଗରରେ ମଗ୍ନ ।