କେବଳ କେଦାରନାଥରେ ପଡିଛି ୧୪ ଫୁଟ ବହଳର ବରଫ

ଡେରାଡୁନ ୨୪।୧: ଗତ ୧୫ ଦିନରୁ ଅଧିକ କାଳ ହେଲା ଜାରି ହୀମପାତ ଯୋଗୁ କେଦାରନାଥରେ ୧୪ ଫୁଟ ବହଳର ବରଫ ଜମି ଯାଇଛି। ସେହିପରି ବଦ୍ରିନାଥ ଧାମରେ ୫ ଓ ହେମକୁଣ୍ଡରେ ୬ ଫୁଟ ବହଳ ବରଫ ଜମିଥିବା ଜଣାପଡିଛି। ଭୀଷଣ ହୀମପାତ ଯୋଗୁ କେଦାରନାଥରେ ସଞ୍ଚାର ସେବା ବନ୍ଦ ହୋଇଯିବା ଲୋକଙ୍କୁ ବାହ୍ୟ ଜଗତରୁ ବିଛିନ୍ନ କରିଛି। ଅସହ୍ୟ ଥଣ୍ଡା ଓ ହୀମପାତ ସତ୍ତ୍ୱେ କେଦାରନାଥରେ ଏବେବି କିଛି ସାଧୁ ରହିଛନ୍ତି। ତେବେ ମୋବାଇଲ ଓ ଅନ୍ୟ ଯୋଗାଯୋଗ ବ୍ୟହତ ହେବା ଯୋଗୁ ସେମାନଙ୍କ ସମ୍ପର୍କରେ କୌଣସି ତଥ୍ୟ ମିଳିପାରୁ ନାହିଁ।

ସେହିପରି ଦ୍ୱିତୀୟ କେଦାର ମହେଶ୍ୱର ଓ ତୃତୀୟ କେଦାର ତୁଙ୍ଗନାଥ ସମେତ ଅନ୍ୟ ଉଚ୍ଚ ସ୍ଥାନଗୁଡିକ ମଧ୍ୟ ବରଫରେ ଲଦି ହୋଇରହିଛି। ରବିବାର ସକାଳୁ ସନ୍ଧ୍ୟାପର୍ଯ୍ୟନ୍ତ କେଦାରନାଥରେ ରହିରହି ଝିପିଝିପି ବର୍ଷା ହୋଇଥିଲା। ତେବେ ବର୍ଷା ସତ୍ତ୍ୱେ ମଧ୍ୟ ହୀମପାତ ଜାରି ଥିଲା। ଫଳରେ ଆଉ ୩ ଫୁଟ ବହଳର ନୂଆ ବରଫ ଜମି ଯାଇଛି। ହୀମପାତ ଯୋଗୁ ରୁଦ୍ରପ୍ରୟାଗ ଜନପଦର ଗୌଣ୍ଡାର, ତୋଷୀ, ତ୍ରିୟୁଗୀ ନାରାୟାଣ, ଚିଲୌଣ୍ଡ, ଚୌମାସୀ ସମେତ ୩୦ରୁ ଅଧିକ ଗାଁ ଲୋକଙ୍କ ଚାଷବାସ ଓ ପଶୁପାଳନ ପ୍ରଭାବିତ ହୋଇଛି।

ବରଫ ଜମିବା ଯୋଗୁ ଜୋଶୀମଠ-ଅଉଲି, ବଦ୍ରିନାଥ ହାଇୱେର ହନୁମାନ ଚଟିରୁ ଆଗକୁ ଗୋପେଶ୍ୱର ଚୌପତା-ଉଖିମଠ ହାଇୱେ ସ୍ଥାନେ ସ୍ଥାନେ ବନ୍ଦ ହୋଇଯାଇଛି। ତେବେ ଅଉଲୀରେ ହୀମପାତ ଯୋଗୁ ସେଠାରେ ଥିବା ପର୍ଯ୍ୟଟକ ଏହାର ବେଶ ମଜା ନେଉଛନ୍ତି। ରାସ୍ତାରେ ବରଫ ପଡି ଜମି ଯାଇଥିବାରୁ ଲୋକେ ରୋପୱେରେ ଅଉଲି ଯାଇ ସେଠାରେ ହୀମପାତର ମଜା ନେଉଛନ୍ତି।