ତାଳଚେର ଓଡ଼ିଶାର ସବୁଠୁ ପ୍ରଦୂଷିତ ସହର : ରିପୋର୍ଟ

ଭୁବନେଶ୍ବର : ସ୍ବିଜରଲାଣ୍ଡର ସଂସ୍ଥା ଆଇକ୍ୟୁଏୟାର ପକ୍ଷରୁ ବର୍ଷ ୨୦୨୨ ପାଇଁ ବିଶ୍ବର ଏୟାର କ୍ବାଲିଟି ରିପୋର୍ଟ ପ୍ରକାଶ ପାଇଛି । ରିପୋର୍ଟରେ କୁହାଯାଇଛି ଯେ ବିଶ୍ବର ୫୦ଟି ସବୁଠାରୁ ପ୍ରଦୂଷିତ ସହର ମଧ୍ୟରୁ ଭାରତର ୩୯ଟି ଅଛି । ଏହି ତାଲିକାରେ ଓଡ଼ିଶାର ତାଳଚେର ରହିଛି । ତାଳଚେର ସମ୍ପର୍କରେ ରିପୋର୍ଟରେ କୁହାଯାଇଛି ଯେ ଏହାର ବାୟୁ ଗୁଣବତ୍ତା ସୂଚକାଙ୍କ ୧୫୨ ରହିଛି ।  ସେହିପରି ପ୍ରଦୂଷଣ ପରିମାପରେ ଏକ ପ୍ରମୁଖ ସୂଚକ ଭାବେ ପରିଗଣିତ ହେଉଥିବା ପିଏମ ୨.୫ (ପାର୍ଟିକୁଲେଟ୍ ମ୍ୟାଟର ୨.୫) କ୍ଷେତ୍ରରେ ବି ତାଳଚେରର ସ୍ଥିତି ଖରାପ ରହିଛି । ତାଳଚେର ବାୟୁମଣ୍ଡଳରେ ପିଏମ ୨.୫ର ସାନ୍ଧ୍ରତା ୫୮.୨ (ମାଇକ୍ରୋଗ୍ରାମ ପ୍ରତି ଘନ ମିଟର) ରହିଛି । ଏହା ବିଶ୍ବ ସ୍ବାସ୍ଥ୍ୟ ସଂଗଠନର ବାର୍ଷିକ ବାୟୁ ଗୁଣବତ୍ତା ଅନୁମୋଦିତ ମୂଲ୍ୟର ପ୍ରାୟ ୧୧.୬ ଗୁଣ ରହିଛି । ଏଣୁ ରହିବା ଲାଗି ଏହି ସହର ଅସ୍ବାସ୍ଥ୍ୟକର ବୋଲି ରିପୋର୍ଟରେ କୁହାଯାଇଛି । ଓଡ଼ିଶାର ଆଉ ଏକ ଶିଳ୍ପ ନଗରୀ ଝାରସୁଗୁଡ଼ାର ବାୟୁ ଗୁଣବତ୍ତା ସୂଚକାଙ୍କ ୧୪୨ ଥିବାବେଳେ ପିଏମ୨.୫ମାତ୍ରା  ୫୨.୨ ରହିଛି । ଭୁବନେଶ୍ବରର ବାୟୁ ଗୁଣବତ୍ତା ସୂଚକାଙ୍କ ୧୨୦ ଥିବାବେଳେ ପିଏମ୨.୫ ମାତ୍ରା ୪୩.୨ ରହିଛି ।

ସୂଚନାଯୋଗ୍ୟ ଯେ ପାର୍ଟିକୁଲେଟ ମ୍ୟାଟର ହେଉଛି ବାୟୁମଣ୍ଡଳରେ ଥିବା ଅତି ସୂକ୍ଷ୍ମ କଣିକା ଯାହାକି ମଣିଷ ଶରୀର ପାଇଁ ବେଶ ହାନୀକାରକ ହୋଇଥାଏ । ଏସବୁ କଣିକା ଅଧିକ ମାତ୍ରାରେ ବାୟୁମଣ୍ଡଳରେ ରହିବା ଦ୍ବାରା ସହରଗୁଡ଼ିକ ଧୂଆଁଳିଆ ଦେଖାଯାଏ । ତାଳଚେରରେ କୋଇଲା ଖଣି ସମେତ ବିଭିନ୍ନ ପ୍ରକାରର ଶିଳ୍ପାନୁଷ୍ଠାନ ଥିବାରୁ ସହରର ପ୍ରଦୂଷଣମାତ୍ରା ନିୟମିତ ଭାବେ ଅଧିକ ରହିଆସିଛି ।