ପଶ୍ଚିମବଙ୍ଗର ବାଙ୍କୁଡ଼ାରେ ମାଲ୍ବାହୀ ଟ୍ରେନ୍ ଧକ୍କା; ୧୨ ବଗି ଲାଇନ୍ଚ୍ୟୁତ
ବାଙ୍କୁଡ଼ା: ଶନିବାର ରାତି ପ୍ରାୟ ୪ଟା ବେଳେ ପଶ୍ଚିମବଙ୍ଗର ବାଙ୍କୁଡ଼ା ନିକଟରେ ୨ଟି ମାଲବାହୀ ଟ୍ରେନ୍ ମଧ୍ୟରେ ଧକ୍କା ହେବାରୁ କେତେଗୁଡ଼ିଏ ୱାଗନ୍ ଧାରଣାଚ୍ୟୁତ ହୋଇଥିବା କଥା ରେଳବାଇ ଅଧିକାରୀମାନେ କହିଛନ୍ତି। ସଂଗୃହୀତ ସୂଚନା ଅନୁସାରେ, ଓନ୍ଦାଗ୍ରାମ ବା ଓନ୍ଦା ଷ୍ଟେସନ୍ ନିକଟରେ ଏହି ଦୁର୍ଘଟଣା ଘଟିଛି। ଗୋଟାଏ ମାଲ୍ବାହୀ ଟ୍ରେନ୍ ଅନ୍ୟ ଗୋଟାଏ ମାଲ୍ବାହୀ ଟ୍ରେନ୍ର ପଛରେ ଧକ୍କାଖାଇବାରୁ ୧୨ଟି ୱାଗନ୍ ଧାରଣାରୁ ବାହାରି ଯାଇଛି। ଏହି ଦୁର୍ଘଟଣାରେ କାହାର ମୃତ୍ୟୁ ନ ଘଟିଥିଲେ ବି ଗୋଟିଏ ମାଲ୍ବାହୀ ଟ୍ରେନ୍ର ଚାଳକ ସାମାନ୍ୟ ଆହତ ହୋଇଛନ୍ତି।
ରେଳବାଇ ଅଧିକାରୀମାନେ ଜାରି କରିଥିବା ବିବୃତି ଅନୁସାରେ, ଦୁର୍ଘଟଣାଗ୍ରସ୍ତ ହୋଇଥିବା ମାଲ୍ବାହୀ ଟ୍ରେନ୍ ଦୁଇଟି ଖାଲି ଥିଲା। କିନ୍ତୁ, ଟ୍ରେନ୍ ଦୁଇଟି କେମିତି ଧକ୍କା ଖାଇଲେ ଓ ଧକ୍କା ଖାଇବାର କାରଣ ସ୍ପଷ୍ଟ ହୋଇନାହିଁ। ଦୁର୍ଘଟଣା ଯୋଗୁଁ ଆଦ୍ରା ଡିଭିଜନ୍ର ରେଳ ଚଳାଚଳ ପ୍ରଭାବିତ ହୋଇଛି। ଆଦ୍ରା ଡିଭିଜନ୍ ପଶ୍ଚିମବଙ୍ଗର ୪ଟି ଜିଲ୍ଲା ଯଥା:- ପଶ୍ଚିମ ମିଦନାପୁର, ବାଙ୍କୁଡ଼ା, ପୁରୁଲିଆ ଓ ବର୍ଦ୍ଦମାନ ଏବଂ ଝାଡ଼ଖଣ୍ଡର ଧାନବାଦ, ବୋକାରୋ ଓ ସିଂହଭୂମ ଜିଲ୍ଲା ପାଇଁ ରେଳସେବା ଯୋଗାଇ ଦେଇଥାଏ। ଏ ସମସ୍ତ ଜିଲ୍ଲା ଦକ୍ଷିଣ-ପୂର୍ବ ରେଳବାଇର ଅନ୍ତର୍ଭୁକ୍ତ ଅଟେ। ଏହି ସେକ୍ସନ୍ରୁ ‘ପୁରୁଲିଆ ଏକ୍ସପ୍ରେସ୍’ ଭଳି କେତେକ ଟ୍ରେନ୍ ଚଳାଚଳ ନିମନ୍ତେ ଯଥା ଶୀଘ୍ର ସମ୍ଭବ ‘ଅପ୍ଲାଇନ୍’ ଖୋଲିବା ଲାଗି ରେଳ କର୍ତ୍ତୃପକ୍ଷମାନେ ଉଦ୍ୟମ ଚଳାଇଛନ୍ତି।