ଅକ୍ଟୋବର ୨ ରେ ଲଞ୍ଚ ହେବ ପ୍ରଶାନ୍ତ କିଶୋରଙ୍କ ଦଳ, ୨୦ଟି ଆସନରେ ଲଢ଼ିପାରନ୍ତି ନିର୍ବାଚନ

ପାଟନା: ୧୧ ମାସ ଧରି ବିହାରର ଗାଁ ଗାଁ ବୁଲି ପଦଯାତ୍ରା କରୁଥିବା ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର ସକ୍ରିୟ ରାଜନୀତିରେ ପ୍ରବେଶ କରିବାକୁ ପ୍ରସ୍ତୁତ ହେଉଛନ୍ତି। ସୂଚନାନୁସାରେ, ଅକ୍ଟୋବର ୨ ରେ ପିକେ ସୀତାମାଢିରୁ ତାଙ୍କ ନୂଆ ପାର୍ଟି ଘୋଷଣା କରିପାରନ୍ତି। ସୂତ୍ରରୁ ମିଳିଥିବା ସୂଚନା ମୁତାବକ ଦଳର ନାମ ଏବଂ ଚିହ୍ନ ଉପରେ ଆଲୋଚନା ଶେଷ ପର୍ଯ୍ୟାୟରେ ଅଛି। ପିକେ ଉତ୍ତର ବିହାରରେ ମୋତିହାରୀ, ବେତିୟା, ଗୋପାଳଗଞ୍ଜ, ବାଲ୍ମୀକିକିନଗର, ସିୱାନ, ସାରଣ, ମହାରାଜଗଞ୍ଜ, ଶିବହାର, ବୈଶାଳୀ, ଦରଭଙ୍ଗା, ମଧୁବାନି, ସୀତାମାଢି, ସାମସ୍ତିପୁର, ଉଜିଆରପୁର ଏବଂ ମୁଜାଫରପୁର ସମେତ ୨୦ଟି ଲୋକସଭା ଆସନ ଉପରେ ନଜର ରଖିଛନ୍ତି। ୨ ଅକ୍ଟୋବର ୨୦୨୨ରେ, ପ୍ରଶାନ୍ତ କିଶୋର ଚମ୍ପାରଣରୁ ପଦଯାତ୍ରା ଆରମ୍ଭ କରିଥିଲେ। ପ୍ରଶାନ୍ତ କିଶୋରଙ୍କ ଟିମର ଜଣେ ପ୍ରମୁଖ ସଦସ୍ୟ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଯେ ନୂତନ ଦଳରେ ପ୍ରଶାନ୍ତ କିଶୋରଙ୍କ ଭୂମିକା ଜଣେ ମେଣ୍ଟର ଭାବେ ରହିବ ହେବ। ଦଳର ଦାୟିତ୍ୱ ଅନ୍ୟ ଜଣକୁ ଦିଆଯିବ | ଏକ ଦଳିତ କିମ୍ବା ଜଣେ ମୁସଲମାନ ସମ୍ପ୍ରଦାୟର ବ୍ୟକ୍ତିଙ୍କୁ ଦଳର ଅଧ୍ୟକ୍ଷ କରାଯିବ |

ପ୍ରଶାନ୍ତ କିଶୋରଙ୍କ ଦଳ ଉତ୍ତର ବିହାରର ୨୦ଟି ଲୋକସଭା ଆସନରେ ନିର୍ବାଚନ ଲଢ଼ିବାକୁ ପ୍ରସ୍ତୁତ ହେଉଛି । ଲୋକଙ୍କ ସହ ସିଧାସଳଖ ସମ୍ପର୍କ ସ୍ଥାପନ କରିବାକୁ ୩ ପ୍ରକାରର ରଣନୀତି ଗ୍ରହଣ କରାଯାଉଛି | ଗ୍ରାମ ସ୍ତରରେ ୧୮ ରୁ ୨୦ ବର୍ଷର ଯୁବକମାନଙ୍କୁ ନେଇ ଏକ କ୍ଲବ ଗଠନ କରାଯାଉଛି | ଏହାକୁ କ୍ଲବ କମିଟି ଭାବେ ନାମିତ କରାଯାଇଛି। ଏହି କ୍ଲବଗୁଡିକରେ କ୍ରୀଡା ସାମଗ୍ରୀ ରଖାଯାଇଛି | ଟେଲିଭିଜନର ମଧ୍ୟ ବ୍ୟବସ୍ଥା କରାଯାଇଛି। ବିଶ୍ୱବିଦ୍ୟାଳୟ ଏବଂ ମହାବିଦ୍ୟାଳୟରେ ସକ୍ରିୟ ଥିବା ୨୦ ବର୍ଷରୁ ଅଧିକ ଛାତ୍ରଛାତ୍ରୀଙ୍କୁ ନେଇ ଏକ ଯୁବ କମିଟି ଗଠନ କରାଯାଇଛି | ପରୀକ୍ଷା ଏବଂ ବେକାରୀ ସମସ୍ୟା ନେଇ ଏହି କମିଟିଗୁଡ଼ିକୁ ଦାୟିତ୍ୱ ଦିଆଯାଇଛି। ମହିଳାମାନଙ୍କର ମୌଳିକ ପ୍ରସଙ୍ଗ ଉଠାଇବା ପାଇଁ ମହିଳା କମିଟି ମଧ୍ୟ ଗ୍ରାମ ସ୍ତରରେ ସକ୍ରିୟ ହୋଇଛି। ଜନସ୍ୱରାଜର ସୂତ୍ର ଅନୁଯାୟୀ, ପ୍ରଶାନ୍ତ କିଶୋରଙ୍କ ନଜର ତେଜସ୍ୱୀଙ୍କ ଯୁବ ଭୋଟ ଏବଂ ନୀତୀଶଙ୍କ ମହିଳା ଭୋଟରଙ୍କ ଉପରେ ରହିଛି |