ରାଷ୍ଟ୍ରପତି ବାଇଡେନଙ୍କ ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ବ୍ୟକ୍ତିଗତ ରାତ୍ରିଭୋଜନ, ଭାରତ-ଆମେରିକା ସମ୍ପର୍କ ଉପରେ ଦ୍ୱିପାକ୍ଷିକ ଆଲୋଚନା
ନୂଆଦିଲ୍ଲୀ: ଜି-୨୦ ଶିଖର ସମ୍ମିଳନୀ ପୂର୍ବରୁ ରାଷ୍ଟ୍ରପତି ବାଇଡେନ୍ଙ୍କ ଏୟାରଫୋର୍ସ ୱାନ୍ ଦିଲ୍ଲୀରେ ପହଞ୍ଚିବାର କିଛି ସମୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ବିଳମ୍ବିତ ସନ୍ଧ୍ୟାରେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କୁ ତାଙ୍କ ବାସଭବନରେ ଦ୍ୱିପାକ୍ଷିକ ଆଲୋଚନା ପାଇଁ ଭେଟିଛନ୍ତି। ସାକ୍ଷାତ ସମୟରେ ଇସ୍ରୋର ବୈଜ୍ଞାନିକମାନଙ୍କ ଦ୍ବାରା ଭାରତର ସଫଳ ଚନ୍ଦ୍ର ଅଭିଯାନ ଲାଗି ପ୍ରଧାନମନ୍ତ୍ରୀ ମୋଦୀଙ୍କୁ ଅଭିନନ୍ଦନ ଜଣାଇଥିଲେ ରାଷ୍ଟ୍ରପତି ବାଇଡେନ୍। ଏଥିସହ ପ୍ରଥମ ସଫଳ ସୂର୍ଯ୍ୟଅଭିଯାନ ପ୍ରସଙ୍ଗ ମଧ୍ୟ ଉଲ୍ଲେଖ କରିଥିଲେ ବାଇଡେନ୍। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଦୁଇ ନେତାଙ୍କ ବିଭିନ୍ନ ପ୍ରସଙ୍ଗରେ ଆଲୋଚନା କରୁଥିବାର ଫଟୋ ସେୟାର କରିଛି ଯାହା ଭାରତ ଏବଂ ଆମେରିକା ମଧ୍ୟରେ ସମ୍ପର୍କକୁ ଆହୁରି ଗଭୀର କରିବ।
ଉଭୟ ଶୀର୍ଷ ନେତାଙ୍କ ମଧ୍ୟରେ ଜେଟ୍ ଇଞ୍ଜିନ୍ କ୍ରୟ ପାଇଁ ଚୁକ୍ତି, ପ୍ରିଡେଟର ଡ୍ରୋନ୍ କ୍ରୟ ଏବଂ ୫ଜି ଓ ୬ଜି ନେଟୱାର୍କ ଭଳି ଗୁରୁତ୍ୱପୂର୍ଣ୍ଣ ଜ୍ଞାନକୌଶଳରେ ସହଯୋଗ ସମେତ ଅନେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା ହେବାର ସମ୍ଭାବନା ରହିଛି।
ପୂର୍ବରୁ ଏକ ବଡ଼ ରେଳ ଚୁକ୍ତି ବିଷୟରେ ମଧ୍ୟ ଆଲୋଚନା ହୋଇଥିଲା। କିନ୍ତୁ ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ଜେକ୍ ସୁଲିଭାନ୍ ଏହି ରିପୋର୍ଟକୁ ନିଶ୍ଚିତ କରି ନଥିଲେ। ତେବେ ସେ ଏହାକୁ ଏକ ପଦକ୍ଷେପ ଭାବରେ ପ୍ରଶଂସା କରିଥିଲେ ଯେଉଁଥିରେ ଯୁକ୍ତରାଷ୍ଟ୍ର ଆମେରିକା ନିବେଶ କରିଛି। ଆମେ ବିଶ୍ୱାସ କରୁ ଯେ ଭାରତରୁ ମଧ୍ୟପ୍ରାଚ୍ୟରେ ୟୁରୋପକୁ ଯୋଗାଯୋଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଏହା ସମ୍ପୃକ୍ତ ସମସ୍ତ ଦେଶକୁ ଅନେକ ଅର୍ଥନୈତିକ ଏବଂ ରଣନୈତିକ ଫାଇଦା ଆଣିବ।
ନେତାମାନଙ୍କ ଦ୍ୱିପାକ୍ଷିକ ବୈଠକ ପରେ ପ୍ରଧାନମନ୍ତ୍ରୀ ମୋଦୀ ରାଷ୍ଟ୍ରପତି ବାଇଡେନଙ୍କୁ ରାତ୍ରୀ ଭୋଜନରେ ଆପ୍ୟାୟିତ କରିବେ। ରାଷ୍ଟ୍ରପତି ବାଇଡେନ ନୂଆଦିଲ୍ଲୀର ବିଳାସପୂର୍ଣ୍ଣ ଆଇଟିସି ମୌଯ୍ୟ ଶେରାଟନରେ ରାତ୍ରୀ ଯାପନ କରିବେ।